Lêwiyî 12 - Kurmanji Încîl

Jinên zarok tînin

¹ Xudan ji Mûsa re got:

² “Ji gelê Îsraêl re bêje: ‘Heke jinek bi zaro bimîne û kurekî bîne, wê wekî rojên ku bi potan ketiye, heft rojan qirêj bê hesibandin.

³ Di roja heştan de wê lawik bê sinetkirin.

⁴ Ji bo ku jinik ji xwînê paqij bibe, wê sî û sê rojan bisekine. Heta rojên paqijbûna wê temam dibin, wê destê xwe bi tiştekî pîroz neke û neçe Pîrozgehê.

⁵ Heke keçek bîne, wekî rojên ku bi potan dikeve, wê du hefte qirêj bê hesibandin. Ji bo ku jin ji xwînê paqij bibe, divê şêst û şeş roj derbas bibe.

⁶ “‘Gava rojên paqijbûna ji bo kur an keçekê temam bûn, wê wekî qurbana şewitandinê berxekî yeksalî û wekî pêşkêşiya paqijiyê jî kevok an qumriyekê bîne ber deriyê Konê Hevdîtinê û bide kahin.

⁷ Wê kahin pêşkêşiyên wê li hizûra Xudan pêşkêş bike û ji bo jinikê kefaretê bide. Bi vî awayî wê jinik ji xwînê paqij bibe. Ev e rê û rêbaza jina ku zarokên kurîn an keçîn tîne.

⁸ “‘Heke hêza wê têra dayîna berxekî neke, wê du kevok an du qumriyan bîne ku yekê wekî qurbana şewitandinê û yekê jî wekî pêşkêşiya paqijiyê be. Wê kahin wan ji bo jinikê kefaretê bide û wê ew paqij bibe.’”