Lêwiyî 10 - Kurmanji Încîl

Mirina Nadav û Avîhû

¹ Nadav û Avîhû yên kurên Harûn bixûrdankên xwe hildan, agir xistin hundirê wan û bixûr danîn ser. Wan li hizûra Xudan agirekî xerîb ku wî li wan emir nekiriye pêşkêş kir.

² Agirek ji hizûra Xudan rabû û ew daqurtandin. Ew li hizûra Xudan mirin.

³ Mûsa ji Harûn re got: “Xudan gotibû: “‘Bi saya kesên ku nêzîkî min dikin, Ezê pîroziya xwe nîşan bidim. Li ber çavê tevahiya gel, Ezê birûmet bim.’” Harûn bêdeng ma.

⁴ Mûsa gazî Mîşaêl û Êlsafan ên kurên Ûzziyêlê apê Harûn kir û got: “Werin, birayên xwe ji ber Pîrozgehê hildin û derxin derveyî artêşgehê.”

⁵ Ew hatin û wekî Mûsa got bi mîntanên li ser wan ew deranîn derveyî artêşgehê.

⁶ Mûsa ji Harûn û ji kurên wî Êlezar û Îtamar re got: “Porên xwe neyînin xwarê, kincên xwe jî neçirînin. Yan na hûnê jî bimirin û wê Xudan li tevahiya civakê hêrs bibe. Lê bila mirovên we û tevahiya Mala Îsraêl, ji bo agirê Xudan bigirîn.

⁷ Ji deriyê Konê Hevdîtinê veneqetin, an na hûnê bimirin. Çimkî rûnê kifşkirina Xudan li ser we ye.” Wan bi ya Mûsa kirin.

⁸ Xudan ji Harûn re got:

⁹ “Gava hûn ketin Konê Hevdîtinê, divê tu û kurên te mey û şerabê venexwin, an na hûnê bimirin. Wê ev di nav nifşên we de qanûneke herheyî be.

¹⁰ Divê hûn tiştên pîroz û gelemperî, tiştên qirêj û paqij ji hev veqetînin.

¹¹ Divê hûn hemû qanûnên ku Xudan bi riya Mûsa ji gelê Îsraêl re got hînî wan bikin.”

¹² Mûsa ji Harûn û kurên wî yên saxmayî Êlezar û Îtamar re got: “Ji pêşkêşiyên şewitandinê yên ji bo Xudan, pêşkêşiya dexlê ya mayî hilînin û wî bêhevîrtirş li ber gorîgehê bixwin. Çimkî gelekî pîroz e.

¹³ Hûnê wî li dereke pîroz bixwin, çimkî ev para te û kurên te ku ji pêşkêşiyên şewitandinê ya ji bo Xudan e. Çimkî wisa li min hatiye emirkirin.

¹⁴ Singê pêşkêşiya raberkirinê û hêta raberkirî, tu û kur û keçên xwe dikarin li dereke paqij bixwin. Çimkî ev, ji qurbanên aştiyê yên ku gelê Îsraêl pêşkêş dike para te û kurên te ye.

¹⁵ Singê hejandinê û hêta ku hat pêşkêşkirin bi bezê pêşkêşiyên şewitandinê re bînin û wekî pêşkêşiyên hejandinê li hizûra Xudan bihejînin. Çawa ku Xudan emir kiriye, wê ev her û her para te û kurên te bin.”

¹⁶ Mûsa li ser nêriyê pêşkêşiya paqijiyê pirs kir, çimkî ew hatibû şewitandin. Ew li Harûn û kurên wî yên saxmayî Êlezar û Îtamar hêrs bû û got:

¹⁷ “We çima pêşkêşiya paqijiyê li dereke pîroz nexwar? Ew gelekî pîroz e. Ji bo ku hûn sûcên civakê rakin û li hizûra wî ji bo wan kefaretê bidin, Xudan ew dabû we.

¹⁸ Va ye, xwîna nêrî nehatiye hundirê pîrozgehê. Wekî min emir kir, divê hûn esse li dera pîroz bixwin.”

¹⁹ Harûn ji Mûsa re got: “Va ye, wan îro pêşkêşiya xwe ya paqijiyê û qurbana şewitandinê pêşkêşî Xudan kirin û ev tişt jî hatin serê min. Heke min îro ji pêşkêşiya paqijiyê bixwara, gelo wê li çavê Xudan xweş bihata?”

²⁰ Gava Mûsa ev bihîst, razî bû.