Lêwiyî 1 - Kurmanji Încîl

Qurbana Şewitandinê

¹ Xudan gazî Mûsa kir û ji Konê Hevdîtinê jê re got:

² “Bi gelê Îsraêl re bipeyive û ji wan re bêje: ‘Gava kesekî ji we pêşkêşiyeke heywanî pêşkêşî Xudan kir, divê hûn pez an dewarekî bînin.

³ “‘Heke pêşkêşî qurbana şewitandinê ya dewêr be, divê nêr û bêqisûr be. Wê ew kes bîne ber deriyê Konê Hevdîtinê ku ew li hizûra Xwedê bê qebûlkirin.

⁴ Wê destê xwe deyne ser serê qurbana şewitandinê û wê ji bo kefareta wî bê qebûlkirin.

⁵ Wê conega li hizûra Xudan bê serjêkirin. Wê kurên Harûn ku kahin in xwînê pêşkêş bikin. Wê bi her aliyên gorîgehê ve bireşînin ku li ber deriyê Konê Hevdîtinê ye.

⁶ Wê qurbana şewitandinê bê gurandin û perçekirin.

⁷ Wê kurên Harûnê Kahin li gorîgehê êgir pêxin û êzingan deynin ser.

⁸ Wê kurên Harûn ku kahin in perçeyên wî, tevî ser û bezê wî yên hundir, deynin ser êzingên agirê li ser gorîgehê.

⁹ Lê wê ûr û rovî û pepikên wî bi avê bên şûştin. Paşê wê kahin wan hemûyan wekî qurbana şewitandinê li ser gorîgehê bişewitîne. Ev pêşkêşiya şewitandinê ye ku bêhna wê bi Xudan xweş tê.

¹⁰ “‘Heke pêşkêşî qurbana şewitandinê ya pêz be, mî yan bizin, divê nêr û bêqisûr be.

¹¹ Wê li bakurê gorîgehê, li hizûra Xudan bê serjêkirin. Wê kurên Harûn ku kahin in xwînê bi her aliyên gorîgehê ve bireşînin.

¹² Wê tevî serê wî û bezê wî yên hundir bê perçekirin û wê kahin perçeyan li ser êzingên agirê li ser gorîgehê pêxistî ye bi cih bike.

¹³ Lê wê ûr û rovî û pepikên wî bi avê bên şûştin. Paşê wê kahin hemûyan li ser gorîgehê bişewitîne û pêşkêş bike. Ev qurbana şewitandinê ye. Ev pêşkêşiya şewitandinê ye ku bêhna wê bi Xudan xweş tê.

¹⁴ “‘An heke pêşkêşî qurbana şewitandinê ya ji bo Xudan a ji çivîkan be, divê ji qumrî yan têjikên kevokan be.

¹⁵ Wê kahin bîne gorîgehê, serê wê jêke û li ser gorîgehê bişewitîne. Wê xwîna wê bi ser kêleka gorîgehê ve bê herikandin.

¹⁶ Wê kahin xursika çivîkê bi zîrça wê ve derxe û bavêje ser xweliya rojhilatê gorîgehê.

¹⁷ Wê bi baskên çivîkê bigire ji hev cuda bike, lê wê bi tevahî ji hev veneqetîne. Paşê wê kahin li ser êzingên agirê li ser gorîgehê pêxistî ye bişewitîne. Ev qurbana şewitandinê ye. Ev pêşkêşiya şewitandinê ye ku bêhna wê bi Xudan xweş tê.