Lavijên Şînê 3 - Kurmanji Încîl

Lavija sêyemîn a şînê: Ceza û hêvî א alef

אalef

¹ Ew mirovê ku ji ber xezeba gopalê Xudan Êş û elem kişand, ez im.

² Wî ez ajotim û ne di ronahiyê de, Lê di tariyê de meşandim.

³ Tevahiya rojê, dîsa dîsa Bi dijwarî li dijî min destê xwe radike.

ב bêt

בbêt

⁴ Wî çerm û goştê min helandin, Wî hestiyên min şikandin.

⁵ Wî li dijî min dîwar çêkir Û der û dora min bi êş û tengasiyê pêça.

⁶ Wekî miriyên dema berê, Wî ez li taristanê dam rûniştandin.

ג gîmel

גgîmel

⁷ Wî li dora min dîwar danî, Ez nikarim derkevim derve, Wî zincîrên min giran kirin.

⁸ Tevî ku diqîrim û dikim hewar, Ew derî li ber duaya min digire.

⁹ Wî bi kevirên necirandî riya min birî, Riyên min xwarovîçko kirin.

ד dalet

דdalet

¹⁰ Ew ji bo min wekî hirçekî di kozikê de ye, Mîna şêrekî xwe veşartî ye.

¹¹ Wî ez ji rê averê kirim, Wî ez perçe û wêran kirim.

¹² Wî kevanê xwe tikand Û ji bo tîr ez kirim nîşan.

ה hê

הhê

¹³ Wî tîrên tîrdanka xwe Di gurçikên min de avêtin.

¹⁴ Ez li ber gelê xwe bûm pêkenok, Tevahiya rojê bûm kilama devê wan.

¹⁵ Wî ez bi giyayê tehl têr kirim, Wî ava zirîçkê bi min da vexwarin.

ו waw

וwaw

¹⁶ Wî diranên min bi kevirokan şikandin, Wî ez nizim kirim nav xweliyê.

¹⁷ Wî canê min ji aştiyê dûr xist, Min qencî ji bîr kir.

¹⁸ Loma ez dibêjim: “Dermanê min nema, Hêviya min a ji Xudan tuneye.”

ז zayin

זzayin

¹⁹ Tengasî û bêmaliya min Bi êş û giyayê zirîçkê tê bîra min!

²⁰ Canê min hergav li ser difikire Û di hundirê min de dihele.

²¹ Lê ez vê yekê tînim bîra xwe Loma ez hêvîdar im.

ח xet

חxet

²² Dilovaniya Xudan bêdawî ye, Rehma wî qet naqede.

²³ Ew her sibe nû ye, Dilsoziya te mezin e.

²⁴ Canê min dibêje: “Para min Xudan e, Loma ez pê hêvîdar im.”

ט tet

טtet

²⁵ Xudan ji bo hêvîdarên xwe Ji canên lê digerin re qenc e.

²⁶ Mayîna bêdengî ya li benda rizgariya Xudan, qenc e.

²⁷ Erê, ji bo mirov qenc e Ku di xortaniya xwe de nîr hilgirtin.

י yod

יyod

²⁸ Bila ew bi tena serê xwe rûne û bêdeng be, Çimkî Xudan ev nîr danî ser.

²⁹ Bila bêyî ku hêvî bibire, Bi nefsbiçûkî bi devê xwe axê maç bike.

³⁰ Bila rûçikê xwe bide kesê lê dixe Û bi riswatiyê têr bibe.

כ kaf

כkaf

³¹ Çimkî Reb mirovekî her û her red nake.

³² Tevî ku ew aciz jî dike, Li gorî zêdebûna dilovaniya xwe, Wê dîsa were rehmê.

³³ Çimkî ew bi dilxwazî Ew mirovekî aciz û eziyet nake.

ל lamed

לlamed

³⁴ Gava hemû girtiyên welêt Di bin lingan de diperçiqînin,

³⁵ Çaxê li hizûra Xwedayê Herî Berz Mafên mirovahiyê dixwin,

³⁶ Dema dozan şaş dikin, Ma Reb tiştekî nabîne?

מ mem

מmem

³⁷ Heta Reb emir neke, Kî tiştekî dibêje û pêk tîne?

³⁸ Ma gotina devê Xwedayê Herî Berz Hem qencî hem xerabî nayîne?

³⁹ Gelo mirovê zindî Dikare ji cezayê gunehê xwe gazinan bike?

נ nûn

נnûn

⁴⁰ Em li riyên xwe bikolin û biceribînin, Em li Xudan vegerin.

⁴¹ Ji Xwedayê li ezmanan re Em dil û destên xwe vekin.

⁴² Me guneh û serhildan kir Û te em êdî nebexişandin.

ס samex

סsamex

⁴³ Te hêrs li xwe kir, Tu ketî pey me, Te bêrehm kuştin.

⁴⁴ Te xwe bi ewran nixamt Ku duayek tê re derbas nebe.

⁴⁵ Te em di nav miletan de kirin pîs û zibil.

פ pê

פpê

⁴⁶ Hemû dijmin li dijî me devê xwe vekir.

⁴⁷ Saw û çal, wêranbûn û şikestin hatin ser me.

⁴⁸ Ji ber şikestina gelê min ê delal, Hêsir ji çavê min dibarin.

ע eyîn

עeyîn

⁴⁹ Bêyî bêhnvedan, bêyî rawestan, Hêsir ji çavê min tên,

⁵⁰ Heta ku Xudan li jêr binêre, Heta ku ji ezmanan bibîne.

⁵¹ Ji ber rewşa hemû keçên bajarê min, Jana çavê min avêt canê min.

צ sadê

צsadê

⁵² Kesên bêsedem bûne dijminên min, Wekî teyrekî ez nêçîr kirim.

⁵³ Wan ez sax avêtim bîrê Û kevir avêtin ser min.

⁵⁴ Av bi ser min de ket, Min got: “Ez helak bûm!”

ק qof

קqof

⁵⁵ Ji binê bîrê min gazî navê te kir: “Ya Xudan!”

⁵⁶ Te dengê min bihîst: “Axîn û hewara min piştguh neke!”

⁵⁷ Roja min gazî te kir, tu nêzîk bûyî, Te got: “Netirse!”

ר reş

רreş

⁵⁸ Ya Reb! Te parastina doza min kir, Te canê min rizgar kir.

⁵⁹ Ya Xudan! Te neheqiya ku wan li min kir dît, Mafê min biparêze.

⁶⁰ Te hemû tola wan a li dijî min, Hemû fen û fûtên wan ên li dijî min dîtin.

ש sîn/şîn

שsîn/şîn

⁶¹ Ya Xudan! Te riswatiya wan, Hemû fen û fûtên wan ên li dijî min bihîstin.

⁶² Pistepista ser lêvên dijberên min, Tevahiya rojê li dijî min derdikeve.

⁶³ Binêre! Gava rabûn û rûniştin, Ez kilama devê wan im.

ת taw

תtaw

⁶⁴ Ya Xudan! Li gorî karê destê wan bergîdana wan bide.

⁶⁵ Dilhişkiyê bide wan, naleta te li wan be.

⁶⁶ Bi hêrs bide pey wan Û ji binê ezmanan tune bike, ya Xudan!