Îşaya 56 - Kurmanji Încîl

Xwedê gelan qebûl dike

¹ Xudan wiha dibêje: “Heqiyê biparêzin û edaletê pêk bînin. Çimkî rizgarkirina min nêzîk e Û wê edaleta min xuya be.

² Xwezî bi wî mirovî Ku vê yekê pêk tîne û qewîn pê digire. Xwezî kurê mirovan yê ku Roja Septê digire, Mirdar nake û xwe ji her cure xerabiyê dûr dixe.”

³ Bila her xerîbê ku xwe bi Xudan ve girê daye, nebêje: “Wê Xudan esse min ji gelê xwe veqetîne.” Bila tu nemêr jî nebêje: “Ez dareke hişk im.”

⁴ Çimkî Xudan wiha dibêje: “Ji nemêrên rojên min ên Septê digirin, Tiştên ku dilê min jê xweş in hildibijêrin Û qewîn bi peymana min digirin re

⁵ Ezê wan li mala xwe, Di nav dîwarên xwe de, Nav û cihekî bîranînê bidim wan Ku ji ya kur û keçan çêtir in. Ezê navekî herheyî bidim wan ku nayê avêtin.

⁶ “Xerîbên ku xwe bi Xudan ve girê dabûn Ku jê re xizmetê bikin, Ji navê Xudan hez bikin Û bibin xulamên wî, Erê, her xerîbê Roja Septê digire, mirdar nake Û bi peymana min qewîn digire,

⁷ Ezê wan bînim çiyayê xwe yê pîroz Û li mala xwe ya duayê şa bikim. Wê qurbanên wan ên şewitandinê û qurbanên wan ên din Li ser gorîgeha min bên qebûlkirin. Çimkî wê ji mala min re, Mala duayê bê gotin Ku ji bo hemû miletan e.”

⁸ Gotina Reb Xudan ê ku sirgûnên Îsraêl dicivîne, ev e: “Ji xeynî kesên êdî civiyane, Ezê kesên din jî bi ser wan de bicivînim.”

Dadbarkirina serekên xerab

⁹ Ya hemû heywanên çolê, Ya hemû heywanên daristanan werin bixwin!

¹⁰ Nobedarên Îsraêl kor in, Hemû nezan in. Wekî seyên bêziman in, Hemû nikarin biewtin. Radizin û xewnan dibînin Ji xewê hez dikin!

¹¹ Rast e, ev se têrnexwar in, Nizanin têrbûn çi ye. Ew şivanên nezan in. Gava her kesî qezenc kir, Hemûyan da ser riya xwe.

¹² Ew dibêjin: “Werin em şerabê bînin Û têra xwe meyê vexwin. Wê sibê jî wekî îro be Û wê gelekî zêdetir be.”