Îşaya 37 - Kurmanji Încîl

Hîzqiyayê Padîşah bi Îşayayê Pêxember dişêwire

¹ Gava Hîzqiyayê Padîşah ev bihîst kincê xwe çirand, çûx li xwe kir û ket Mala Xudan.

² Wî Êlyaqîmê berpirsê qesrê, Şevnayê nivîsende û kahinên mezin ku çûx li wan bû, şandin ba Pêxember Îşayayê kurê Amots.

³ Wan ji Îşaya re got: “Hîzqiya wiha dibêje: ‘Îro roja tengasî, erzşikandin û şermê ye. Dema zarokanînê hat, lê hêza ku wan bîne tuneye.

⁴ Belkî Xwedayê te Xudan, gotinên fermandarê ku xweyê wî Padîşahê Aşûrê ew şandî û pê Xwedayê Jîndar tinazên xwe kirin, bibihîze û ji ber van gotinan wî ceza bike. Divê tu ji kesên me yên mayî re dua bikî.’”

⁵ Gava xulamên Hîzqiyayê Padîşah hatin ba Îşaya,

⁶ wî ji wan re got: “Ji xweyê xwe re wiha bêjin: ‘Xudan wiha dibêje: Tu ji gotinên te bihîstin û çêrên ku xulamên Padîşahê Aşûrê bi min kirin, netirse.

⁷ Ezê ruhekî bixim nava wî, wê xeberekê bibihîze, bizivire welatê xwe û ezê wî li welatê wî, bi şûr bidim kuştin.’”

⁸ Fermandar vegeriya û dît ku Padîşahê Aşûrê, li dijî Lîvnayê şer dike. Çimkî wî bihîstibû ku padîşah ji Laxîşê derketiye.

⁹ Padîşahê Aşûrê bihîst ku Tîrhaqayê Padîşahê Kûşê ji bo ku li dijî wî şer bike bi rê ketiye. Gava ev yek bihîst, wî qasid şandin ba Hîzqiya û got:

¹⁰ “Ji Hîzqiyayê Padîşahê Cihûdayê re bibêjin: ‘Bila Xwedayê tu pê ewle yî û dibêje wê Orşelîm nekeve destê Padîşahê Aşûrê, te nexapîne.

¹¹ Te bihîstiye ku padîşahên Aşûrê çi anîne serê hemû welatan û çawa bi tevahî tune kirine. Ma tê rizgar bibî?

¹² Gozanî, Heranî, Resefî û Edeniyên li Telassarê dijiyan ku bav û kalên min ew helak kirin, gelo îlahên wan miletan karibûn wan rizgar bikin?

¹³ Ka padîşahên Hama û Arpadê li ku ne? Padîşahên Laîr, Sefarwayîm, Hêna û Îwayê li ku ne?’”

Duaya Hîzqiyayê Padîşah

¹⁴ Hîzqiya name ji destê qasidan stand û xwend. Hîzqiya çû Mala Xudan, name vekir

¹⁵ û ji Xudan re dua kir û got:

¹⁶ “Ya Xudanê Karîndar, Xwedayê Îsraêl ku li ser xerûban rûniştî ye. Tenê tu Xwedayê hemû padîşahiyên dinyayê yî. Te erd û ezman afirandin.

¹⁷ Ya Xudan, guh bide û bibihîze. Ya Xudan çavên xwe veke û binêre. Hemû gotinên Sanhêrîv şandin bibihîze ku bi wan gotinan tinazan bi Xwedayê Jîndar dikirin.

¹⁸ Ya Xudan, rastî ev e ku padîşahên Aşûrê hemû milet û welat wêran kirin.

¹⁹ Îlahên wan miletan avêtin nav êgir. Çimkî ew ne Xwedê bûn, karên destê mirovan, ji dar û keviran bûn. Loma wan ew tune kirin.

²⁰ Ya Xwedayê me Xudan, niha me ji destê Sanhêrîv rizgar bike ku hemû padîşahiyên dinyayê bizanibin tenê tu Xudan î.”

Gotinên Îşayayê Pêxember pêk tên

²¹ Îşayayê kurê Amots ji Hîzqiya re xeber şand û got: “Xwedayê Îsraêl Xudan wiha dibêje: ‘Ji ber ku te li ser Sanhêrîvê Padîşahê Aşûrê ji min re dua kir,

²² peyva ku Xudan li dijî Sanhêrîvê Padîşahê Aşûrê dibêje ev e: “‘Ya Sanhêrîv, Siyona keça xama te kêm dibîne, Henekê xwe bi te dike. Keça Orşelîmê bi tinazan Di pey te re serê xwe dihejîne.

²³ Te tinazên xwe bi kê kir, te çêrî kê kir? Te li dijî kê dengê xwe rakir û pozbilindî kir? Te li dijî Pîrozê Îsraêl kir!

²⁴ Bi riya xulamên xwe Te tinazên xwe bi Reb kir û got: Ez bi gelek erebeyên şer re Çûm serê çiyayên bilind, Gihîştim serê bilindciyên Lubnanê. Min darên bilind ên sedrê Darên bijare yên çaman birîn. Ez çûm dera herî bilind Ez çûm daristana herî gur.

²⁵ Min bîr kolan û av vexwar, Min bi binê piyên xwe Hemû çemên Misrê çikandin.

²⁶ “‘Ma te nebihîst Ku ji gelek demên berê ve min ev kifş kiribû? Ji demên qedîm ve min ev pîlan kiribû. Niha min ev pêk anî. Wêrankirina bajarên bisûr, Bila bibe karê te.

²⁷ Loma hêza şêniyên van bajaran, Kêm bû, ew bêhêvî û şermezar bûn. Wekî giyayê zeviyan, giyayê ter û giyayê serbanan Yên ku berî şîn bibin, Li ber bayê dikevin.

²⁸ Ez bi rûniştina te, Ketin û derketina te, Orîna hêrsa te ya li dijî min dizanim.

²⁹ Ji ber ku tu li dijî min oriyayî, Ji ber pozbilindiya te hat guhên min, Ezê xelekê li pozê te, Lixabê li devê te bixim. Ezê berê te bidim riya tu jê hatî.

³⁰ “‘Ya Hîzqiya, wê ev ji te re bibe nîşan: Hûnê îsal berhemê ji ber xwe derketî, Sala diduyan a pey çêbe bixwin. Sala sisêyan biçînin û hilînin, Rezan deynin û fêkiyên wan bixwin.

³¹ Kesên ji Mala Cihûda filitîn û sax man, Wê dîsa ber bi jêr ve kok bidin, Ber bi jor ve jî fêkî bidin.

³² Çimkî wê bermayî ji Orşelîmê, Wê sax ji Çiyayê Siyonê derkevin. Wê xîreta Xudanê Karîndar vê yekê pêk bîne.’

³³ “Xudan li ser Padîşahê Aşûrê wiha dibêje: “‘Wê nekeve vî bajarî û tîran navêjê. Wê bi mertalan nêzîkî bajêr nebe Û li ber sûrên wê pal çêneke.

³⁴ Wê berê wî bide riya ku jê hatiye û neyê vî bajarî.’ Ev e gotina Xudan.

³⁵ “‘Ezê ji bo xwe û ji bo xatirê xulamê xwe Dawid Vî bajarî biparêzim û rizgar bikim.’”

Sanhêrîvê Padîşahê Aşûrê têk diçe

³⁶ Milyaketê Xudan derket û ji artêşgeha Aşûrê sed û heştê û pênc hezar kes kuştin. Serê sibê tenê cendek hebûn.

³⁷ Sanhêrîvê Padîşahê Aşûrê artêşa xwe berda, reviya Nînewayê û li wir ma.

³⁸ Gava ew li mala îlahê xwe Nîsrox çû ser çokan, Adram-Melek û Sareserê kurên wî, rabûn ew bi şûran kuştin û reviyan herêma Araratê. Kurê wî Êsar-Haddon li cihê wî bû padîşah.