Îşaya 19 - Kurmanji Încîl

Pêxemberiya li dijî Misrê

¹ Peyama li ser Misrê: Va ye, Xudan li ewrê bi lez siwar bûye Û diçe Misrê. Pûtên Misrê li ber wî dilerizin, Dilê Misriyan di nava wan de dihele.

² Dibêje: “Ezê Misriyan li dijî Misriyan rakim ser piyan. Wê bira li dijî bira, Cîran li dijî cîran, Bajar li dijî bajaran, Padîşahî li dijî xwe şer bike.

³ Wê ziravê Misriyan biqete, Ezê şêwra wan tevlihev bikim. Wê ji pûtan, ji ruhên miriyan, Ji cinbaz û kesên bi ruhan dişêwirîn bipirsin.

⁴ Ezê Misriyan bidim destê serwerekî dijwar. Wê padîşahekî dilhişk li ser wan serweriyê bike.” Ev e gotina Reb Xudanê Karîndar.

⁵ Wê avên Nîlê ziwa bin, Wê çem biçike û biterike.

⁶ Wê bêhn bikeve coyên wê, Wê avên şaxên Nîla Misrê kêm bibin û biçikin. Wê zil û qamîş biçilmisin.

⁷ Wê keviyên Nîlê, zilên li ber devê wê Û hemû zeviyên li ber çêm ziwa bin. Berê wan li ber bayê bikeve û tune be.

⁸ Wê masîgir bikin axîn, Hemû kesên nîka xwe davêjin Nîlê Wê şînê bikin. Kesên tora xwe davêjin ser rûyê avê jî Wê perîşan bin.

⁹ Wê kesên karê kitana şehkirî Û cawê spî dihonin şermezar bin.

¹⁰ Wê tevinkarên Misrê dilşikestî bin Û hemû kesên bi destheqê xwe dixebitin, Wê aciz bin.

¹¹ Serekên Soanê çiqas ehmeq in, Şêwirmendên Firewn ên şehreza, Şîretên bêhişan dikin. Hûn çawa ji Firewn re dibêjin: “Ez kurê şehreza me, Ez kurê padîşahên berê me?”

¹² Ka şehrezayên te li ku ne? Bila ew ji te re bêjin, Bila ew bidin zanîn Ku şêwra Xudanê Karîndar ya ji bo Misrê çi ye.

¹³ Serekên Soanê bûn wekî ehmeqan, Serekên Memfîsê xapiyan. Kevirên serê riknên eşîrên Misrê, Ew ji rê derxist.

¹⁴ Xudan ruhekî tevlihev xist nav wan. Çawa ku serxweş bi vereşana xwe dişewişe, Wan Misir jî di her karên wê de şewişand.

¹⁵ Ne serî û ne binî, Ne çiqlên dara xurmê û ne zil, Yê ku ji bo Misrê tiştekî bike nema.

Wê Misir bi Xudan ve bê girêdan

¹⁶ Wê rojê wê Misrî ji ber destê Xudanê Karîndar ê ku li dijî wan rake, bilerizin û bikevin sawê.

¹⁷ Wê welatê Cihûda ji bo Misrê bibe tirs û xof. Ji ber niyeta Xudanê Karîndar ê li dijî wan, her kesê ku navê wî bibihîze wê bikeve sawê.

¹⁸ Wê rojê wê li welatê Misrê pênc bajar hebin ku bi zimanê Kenanê dipeyivin. Wê ev bajar ji Xudanê Karîndar re sonda hevalbendiyê bixwin. Wê navê bajarekî ji wan bibe “Bajarê Tavê.”

¹⁹ Wê rojê wê li nav welatê Misrê ji Xudan re gorîgehek û li sînorê wê ji Xudan re kevirbel bê çikandin.

²⁰ Wê ev yek ji bo Xudanê Karîndar li welatê Misrê nîşan û şahid be. Gava gel ji ber zordarên xwe ji Xudan re bikin hewar, wê Xudan ji wan re rizgarkar bişîne. Wê parêzeriya wan bike û wan rizgar bike.

²¹ Wê Xudan xwe bi Misrê bide zanîn û wê rojê wê Misrî Xudan nas bikin. Wê bi qurban û pêşkêşiyan xulamiya Xudan bikin. Wê ji Xudan re soz bidin û pêk bînin.

²² Wê Xudan li Misrê bixe û paşê baş bike. Wê bizivirin Xudan. Wê lavakirina wan bibihîze û wan baş bike.

²³ Wê rojê wê ji Misrê heta Aşûrê riyeke mezin hebe. Wê Aşûrî werin Misrê û Misrî herin Aşûrê. Wê Misrî û Aşûrî bi hev re biperizin.

²⁴ Wê rojê wê Îsraêl bi Misir û Aşûrê re bibe welatê sisêyan û li nav dinyayê bereket hebe.

²⁵ Çimkî Xudanê Karîndar ew pîroz kirin û got: “Bila gelê min Misir, karê destê min Aşûr û mîrasa min Îsraêl pîroz be.”