Îşaya 11 - Kurmanji Încîl

Hêviya aştiyê

¹ Wê ji qurmê Yêşa şax bavêje, Ji koka wî çiqlek fêkî bide.

² Wê Ruhê Xudan, Ruhê şehrezabûn û fêmdariyê, Ruhê şîret û hêzdariyê, Ruhê zanîn û tirsa Xudan li ser wî be.

³ Wê bi tirsa Xudan şa bibe. Wê li gorî dîtina çavê xwe dadbar neke Û li gorî bihîstina guhê xwe biryarê nede.

⁴ Wê bi edaletê belengazan dadbar bike, Ji bo bindestên welêt bi wekhevî biryarê bide. Wê bi gopalê devê xwe li dinyayê bixe, Bi hilma lêvên xwe xeraban bikuje.

⁵ Wê piştênka pişta wî edalet, Kembera nava wî dilsozî be.

⁶ Wê gur û mî bi hev re bijîn, Piling jî bi berxikê re razê. Wê golik, şêrê ciwan û gayê dermalekirî bi hev re bin, Zarokekî biçûk jî şivantiya wan bike.

⁷ Wê hirç tevî çêlekê biçêre, Têjikên wan jî bi hev re razên, Wê şêr wekî conegê ka bixwe.

⁸ Wê zarokê berşîr li ser qula marê reş bileyize, Zarokê ji şîr vekirî, destê xwe bixe qula marê kor.

⁹ Wê tu kes li ser tevahiya çiyayê min ê pîroz, Xisarê nede û wêran neke. Çimkî çawa av deryayan tije dike, Dinya jî wê bi zanîna Xudan tije bibe.

Wê sirgûnkirî vegerin

¹⁰ Wê rojê, wê koka Yêşa wekî alekê gelan bisekine. Wê milet lê bigerin û cihê wî birûmet be.

¹¹ Wê rojê, wê Reb careke din destê xwe dirêj bike ku bermayiyên gelê xwe ji Aşûr, Misir, Patros, Kûş, Elam, Şînar, Hama û keviyên deryayan vegerîne.

¹² Wê ji bo miletan alekê biçikîne, Wê sirgûnên gelê Îsraêl bide hev. Wê mirovên Cihûdayî yên ku belav bûne, Ji çar aliyên dinyayê berhev bike.

¹³ Wê Efrayîm dexesiya Cihûda neke, Kesên Cihûdayê ditengijînin bên avêtin. Wê Efrayîm ji Cihûdayê nedexise Û Cihûda Efrayîmê netengijîne.

¹⁴ Wê herdu li rojava êrîşê Filîstiyan bikin Û bi hev re gelên rojhilat talan bikin. Wê dest deynin ser erdê Edom û Moavê, Wê Emmonî jî bi ya wan bikin.

¹⁵ Wê Xudan Kendava Suweyşa Misrê Bi tevahî biçikîne. Wê destê xwe bi bayê şewatê Li ser Çemê Feratê bihejîne. Wê lê bixe û di nav heft newalan de parve bike Ku mirov bi çaroxan tê re derbas bibin.

¹⁶ Wekî roja ku ji welatê Misrê derketin, Ji bo Îsraêl riyek hebû, Ji bo bermayiyên gelê Xwedê yê li Aşûrê jî Wê riyeke mezin hebe.