Îşaya 10 - Kurmanji Încîl

¹ Wey li wan kesan Ku qanûnên neheq dertînin Û rêbazên nerast dinivîsin

² Ku heqê belengazan averê bikin, Mafê bindestên gelê min bistînin, Jinebiyan talan bikin Û sêwiyan bişelînin.

³ Di roja cezakirinê de, Dema helakbûn ji dûrî ve tê serê we, Hûnê çi bikin? Ji bo alîkariyê ber bi kê ve birevin? Hebûna xwe deynin ku derê?

⁴ Yan hûnê di nav êsîran de çok bidin, Yan jî hûnê di bin kuştiyan de bimînin. Lê dîsa jî wê hêrsa Xudan danekeve, Wê destê wî li dijî wan dirêjkirî bimîne.

Dadbarkirina Aşûrê

⁵ Wey li Aşûrê ku gopalê hêrsa min e! Darê destê wê, xezeba min e.

⁶ Ezê wê bişînim ser miletê xwedênenas, Ezê ferman bidim wê ku here ser miletê lê hêrs bûme Ku bişelînin û talan bikin Û wan wek heriya kuçeyê biperçiqîne.

⁷ Lê Padîşahê Aşûrê wiha nafikire, Şêwra xwe wiha nake. Di dilê wî de tenê tunekirin heye Û miletên ku dixwaze wan helak bike, Qet ne kêm in.

⁸ Ew dibêje: “Ma hemû fermandarên min ne padîşah in?

⁹ Ma Kalno ne wekî Karkemîş e? Hama ne wekî Arpadê ye? Samerya jî ne wekî Şamê ye?

¹⁰ Çawa destê min gihîştibe welatên wan îlahan Ku pûtên wan ji yên Orşelîm û Sameryayê zêdetir in,

¹¹ Min çi anîbe serê Sameryayê û îlahên wê, Ma ezê neyînim serê Orşelîm û pûtên wê jî?”

¹² Gava Reb li Çiyayê Siyon û Orşelîmê hemû karên xwe birin serî, wê encama pozbilindiya Padîşahê Aşûrê û awirên wî yên qure ceza bike.

¹³ Çimkî wî got: “Min her tiştî bi hêza destê xwe Û şehrezayiya xwe kir. Çimkî ez fêmdar im. Min sînorên miletan rakirin, Min xezîneyên wan şelandin Û min bi mêrxasî padîşah ji ser têxt xistin.

¹⁴ Çawa ku hêlînekê bibîne, Destê min dewlemendiya miletan dît. Çawa hêkên hêlînên terikî tên hilanîn, Min jî tevahiya dinyayê wisa da hev. Yekî jî baskê xwe nehejand, Devê xwe venekir û nekir çîveçîv.”

¹⁵ Ma bivir dikare bi yê ku pê dibire, Pesnê xwe bide? Ma birek dikare li ber yê ku pê dibire, Berziya xwe nîşan bide? Gelo gopal dikare, Kesê ew hildide bihejîne? Yan jî dar dikare Yê ne dar bilind bike?

¹⁶ Loma wê Reb Xudanê Karîndar, Zilamên Aşûrê yên xurt, Bi êşa jarbûnê ceza bike. Rûmeta wî bibe pêt û agir û bişewite.

¹⁷ Wê ronahiya Îsraêl bibe agir Û Pîrozê wê bibe pêt. Wê devî û diriyên Aşûrê Di rojekê de bişewitîne, Bixwe û biqedîne.

¹⁸ Wê rûmeta daristan û bexçeyên wê yên berdar, Heta can û bedena wê telef bibe, Çawa ku nexweşek dihele.

¹⁹ Wê hejmara darên wê yên daristanê Ewqas kêm be ku zarokek jî bikaribe binivîse.

Bermayî tobe dikin

²⁰ Wê rojê bermayiyên Îsraêl û ji Mala Aqûb ên sax mane wê cardin xwe nespêrin kesê li wan dixe. Wê bi dil û can xwe bispêrin Pîrozê Îsraêl, Xudan.

²¹ Kesên mayî, kesên ji ber Mala Aqûb sax mane, wê li Xwedayê hêzdar vegerin.

²² Ya Îsraêl, gelê te bi qasî sêlaka deryayê zêde be jî, wê tenê hinek bermayiyên wan vegerin. Biryara wêrankirineke tam adil hatiye dayîn.

²³ Çimkî wê Reb Xudanê Karîndar, li tevahiya dinyayê dawiyekê bîne û biryara vê yekê hatiye dayîn.

Wê Xwedê Aşûrê ceza bike

²⁴ Loma Reb Xudanê Karîndar wiha dibêje: “Ya gelê min ê li Siyonê rûdine! Ji Aşûriyan netirse ku wekî Misriyan bi gopalan li te xistibûn û bi daran li dijî te rabûbûn.

²⁵ Çimkî wê di demeke nêzîk de xezeba min a li dijî te nemîne. Hêrsa min jî berê xwe bide xerakirina wan.

²⁶ Çawa ku wî Mîdyanî li Zinarê Orêvê têk birin, wê Xudanê Karîndar qemçî li dijî wan rake. Wê gopalê wî li ser deryayê be û wekî wî li Misrê kir, wê li dijî wan jî rake.

²⁷ Wê rojê wê barê wan ji ser milê we rabe. Wê nîrê ser stûyê we ji ber xurtiya we bê şikandin.”

Êrîşa dagirkeran

²⁸ Aşûrî bi ser Eyatê de hatin. Ew ji Mîgronê derbas bûn, Barê xwe li Mîkmasê hiştin.

²⁹ Ew ji gelî derbas bûn Û li Gevayê konên xwe vedan. Rama ji tirsan lerizî, Gîvaya Şawûl jî reviya.

³⁰ Ya Gallîma keç bi dengekî bilind biqîre! Ya Layşa guhdar be! Ya Enatot bersivê bide!

³¹ Madmêna direve, Şêniyên Gêvîmê li dereke sitarê digere.

³² Îro wê Aşûrî li Novê bisekinin, Ji Çiyayê Siyona keç re, Ji Girê Orşelîmê re kulma xwe rakin.

³³ Va ye Reb Xudanê Karîndar, Wê çiqlan bibire ku bi dengekî tirsdar li erdê bikevin. Wê bejinbilind bên birîn û pozbilind nizim bibin.

³⁴ Wê derên gur ên daristanê bi biviran bibire, Wê Lubnan bi saya yê Karîndar bikeve.