Îşaya 1 - Kurmanji Încîl

¹ Dîtiniya ku Îşayayê kurê Amots di rojên Ûzziya, Yotam, Ahaz û Hîzqiyayê Padîşahên Cihûdayê de li ser Cihûda û Orşelîmê dît.

Xerabiyên Cihûdayê

² Ezmano, bibihîze! Erdo, guh bide! Çimkî Xudan got: “Min kur mezin û xweyî kirin, Lê wan serî rakir li ber min.

³ Ga xweyê xwe dizane, Ker jî afirê xweyê xwe. Lê Îsraêl nizane, Gelê min fêm nake.”

⁴ Wey li wî miletê guneh dike, Gelê neheqî li xwe barkirî, Ziriyeta xerabkaran, Zarokên xerabûyî! Wan dev ji Xudan berda Û Pîrozê Îsraêl kêm dît. Wan pişta xwe danê.

⁵ Çima hûn dixwazin dîsa lêdan bixwin? Çima hûn serî hildidin? Serî bi tevahî nexweş, Dil bi tevahî xayîs e.

⁶ Ji binê piyan Heta serî siheta we nemaye. Tenê derb, birînên kevin û nû hene. Hemû birînên we jî Nepaqijkirî, nepêçayî, nerûnkirî ne.

⁷ Welatê we wêran bûye, Bajarên we şewitî ne. Li ber çavê we, Xerîb axa we dixwin. Çawa ku xerîban serobino kiribin, Welat wisa wêran bûbû.

⁸ Siyona keç Wekî holika nav rez, Çardaxa nav bostanê xiyaran Û bajarekî dorpêçkirî maye.

⁹ Heke Xudanê Karîndar, Hinek ji me sax nehişta, Emê bibûna wekî Sodomê, Emê bibûna mîna Gomorayê.

¹⁰ Ya serwerên Sodomê, Gotina Xudan bibihîzin! Ya gelê Gomorayê, Guh bidin Şerîeta Xwedayê me!

¹¹ Xudan dibêje: “Min çi ji zêdebûna qurbanên we ye? Ez ji qurbanên şewitandinê yê beranan Û ji bezê golikên dermalekirî têr bûme. Xwîna conega, berx û nêriyan ne bi dilê min in.

¹² Gava hûn hatin pêşberî min, Kî ev ji destê we xwest? Êdî pê li hewşên min nekin.

¹³ Êdî pêşkêşiyên vala neyînin, Bixûr ji bo min kirêt e. Êdî ez gazîkirina civînên Heyva Nû û Roja Septê, Civînên we yên mezin ranagirim.

¹⁴ Ez ji Heyva Nû û hemû cejnên we yên din nefret dikim. Ew li ser pişta min bûn bar, Ez westiyam ji hilgirtina wan.

¹⁵ “Gava hûn destên xwe vekin, Ezê çavê xwe ji we bidim alî. Hûn çiqas jî dua bikin, Ezê guhdarî nekim. Hûn destbixwîn in.

¹⁶ Xwe bişon û paqij bikin, Ji ber çavê min xerabîkirinê rakin, Dawî li xerabiyê bînin.

¹⁷ Hînî qenciyê bibin, Li heqiyê bigerin, Bînin rê zordestan. Biparêzin mafê sêwiyan, Binêrin li doza jinebiyan.”

¹⁸ Xudan dibêje: “Niha werin em li doza xwe binêrin. Gunehên we bi xwînê sor jî bûbin, Wê wekî berfê spî bibin. Bûbin wekî qirmizê sor jî, Wê wekî hiriyê spî bibin.

¹⁹ Heke hûn dilxwaz û guhdar bin, Hûnê berê herî baş ê welêt bixwin.

²⁰ Lê hûn nexwazin û serî rakin, Wê şûr we bixwe û biqedîne.” Çimkî devê Xudan wiha gotiye.

Bajarê gunehkar

²¹ Ma bajarê dilsoziyê çawa bû fahîşe! Ew bajarê ku bi edaletê tije bû. Berê rastî lê dima, Niha kujer!

²² Zîvê te bû çanc, Şeraba te av tevlêkirî.

²³ Serekên te serhildêr, Bûne hevparên dizan. Tev ji bertîlê hez dikin, Dane pey diyariyan. Mafê sêwiyan nadin, Nakin doza jinebiyan.

²⁴ Loma gotina Reb Xudanê Karîndar, Hêzdarê Îsraêl ev e: “Ox, ezê ji neyarên xwe rihet bibim! Ezê heyfa xwe ji dijminên xwe bistînim.

²⁵ Wê destê min li dijî te bizivire. Ezê çanca te bi tevahî paqij bikim, Hemû qirêjiya te bavêjim.

²⁶ Ezê serdarên te dîsa bikim mîna yên berê, Ezê şêwirmendên te bikim kesên destpêkê. Piştre wê ji bo te bêjin: ‘Bajarê Edaletê, Bajarê Dilsoziyê.’”

²⁷ Wê Siyon bi heqiyê, Tobedarên wê bi edaletê rizgar bibin.

²⁸ Lê wê şikestina serhildêr û gunehkaran bi hev re bê, Kesên dev ji Xudan berdane wê tune bibin.

²⁹ Wê ji darberûyên ku li binê wan şa bûn şerm bikin, Ji bexçeyên hilbijartine rûyê wan sor bibin.

³⁰ Çimkî hûnê bibin wek darberûya pelçilmisî, Mîna bexçeyê bêav.

³¹ Wê zilamê hêzdar bibe wekî pûş Û karên wî bibe mîna çirûsk. Wê herdu bi hev re bişewitin û wê kes netefîne.