Hoşêya 8 - Kurmanji Încîl

Xwedê pûtperestan ceza dike

¹ “Li boriyê bixin! Dijmin wekî teyr bi ser Mala Xudan ve tê. Ji ber ku Îsraêl peymana min binpê kir, Li dijî Şerîeta min derket.

² Ew ji min lava dikin û dibêjin: ‘Ya Xwedayê me, em Îsraêlî Te nas dikin!’

³ Îsraêl tiştên qenc red kir, Wê dijmin bikeve pey wan.

⁴ Wan padîşah danîn, lê ji min nepirsîn; Serek ji xwe re kifş kirin, Lê haya min ji wan tunebû. Wan ji zêr û zîvên xwe ji xwe re pût çêkirin, Loma wê helak bibin.

⁵ Ya Samerya, golikê te hate redkirin. Hêrsa min li dijî wan rabû, Ma heta kengê wê negihîjin paqijiyê?

⁶ Ew karê Îsraêliyan e, Hosteyekî ew pûtê golikî çêkir; Ew ne Xwedê ye! Wê golikê Sameryayê bê perçekirin.

⁷ Ji ber ku ew bayê diçînin, Wê bagerê hilînin. Genimê bêsimbil nabe arvan; Bibe jî wê xerîb daqurtînin.

⁸ “Îsraêl hat daqurtandin, Ew niha di nav miletan de, Mîna firaxekî ye ku kesek naecibîne.

⁹ Wekî kerê çolê ku bi tena serê xwe digere, Ew çûn Aşûrê. Efrayîm bi pere yar ji xwe re girtin.

¹⁰ Tevî ku di nav miletan de bi pere yar ji xwe re girtibin jî, Ezê niha wan bidim hev û ceza bikim. Wê di bin nîrê padîşahê serekan de biperçiqin.

¹¹ “Efrayîm ji bo pêşkêşiyên gunehan gorîgeh zêde kirin, Lê ev bûn gorîgehên gunehkirinê.

¹² Min gelek tiştên Şerîeta xwe ji wan re nivîsandin, Lê li gorî wan tiştên ecêb bûn.

¹³ Ew ji min re qurban serjê dikin, Ew bixwe jî dixwin. Lê dîsa jî Xudan ji wan qurbanan ne razî ye. Wê niha neheqiyên wan bîne bîra xwe, Wê cezayê gunehên wan bide; Wê vegerin Misrê.

¹⁴ Îsraêl Afirînerê xwe ji bîr kir. Ji xwe re qesir çêkirin. Cihûda bajarên bisûr zêde kirin. Lê ezê êgir bi ser bajarên wan de bibarînim. Ev agir wê bircên wan daqurtîne û tune bike.”