Hejmartin 6 - Kurmanji Încîl

Sozdana Nezîriyê

¹ Xudan ji Mûsa re got:

² “Bi gelê Îsraêl re bipeyive û ji wan re bêje: ‘Heke mêrek an jinek, bi sozdana taybet ango sozdana nezîriyê ji Xudan re veqetîne,

³ wê xwe ji mey û şerabê dûr bixe. Divê sihika şerabê û sihika meyê venexwe û ava tirî venexwe. Divê tirî an mêwîjan jî nexwe.

⁴ Di hemû dema xwe veqetandiye de, ji sîsik heta qalikê wê, wê tu tiştekî ku ji mêwê çêdibe nexwe.

⁵ “‘Di hemû rojên ku xwe ji Xudan re veqetandiye de, wê gûzan bi serê wî nekeve. Heta dawiya rojên ku xwe ji Xudan re veqetandiye, wê pîroz be û porê xwe dirêj bike.

⁶ “‘Di hemû rojên ku ji Xudan re xwe veqetandiyê de, wê nêzîkî miriyan nebe.

⁷ Gava bavê wî, diya wî, birayê wî, xwişka wî jî bimire, wê ji bo wan xwe qirêj neke. Çimkî soza xwe ya ji Xwedê re veqetandinê li ser wî ye.

⁸ Di hemû rojên xwe yên veqetandinê de ji Xudan re pîroz e.

⁹ “‘Heke jinişkave kesek li ba kesê bi sozdana nezîriyê veqetandî bimire û serê wî qirêj bike, wê di roja ku xwe paqij dike de ango di roja heftan de porê xwe kur bike.

¹⁰ Wê di roja heştan de, du qumrî yan du têjikên kevokan ji kahin re bîne ber deriyê Konê Hevdîtinê.

¹¹ Wê kahin yekê wekî pêşkêşiya paqijiyê û ya din jî wekî qurbana şewitandinê pêşkêş bike û ji bo wî kefaret bike. Çimkî kesê veqetandî bi mirî sûcdar bûye. Wê hema wê rojê ji nû ve serê xwe pak bike

¹² û ji bo rojên sozdanê dîsa ji Xudan re xwe veqetîne. Wê wekî pêşkêşiya berdêlê berxekî nêr û yeksalî bîne. Wê rojên wî yên berê beredayî herin, çimkî veqetandina wî qirêj bûye.

¹³ “‘Rê û rêbaza sozdana nezîriyê ev e: Çaxê rojên wî yên veqetandinê temam bûn, wê wî bînin ber deriyê Konê Hevdîtinê.

¹⁴ Wê kesê sozdana nezîriyê daye wekî qurbana şewitandinê berxekî nêr ê yeksalî yê bêqisûr û wekî pêşkêşiya paqijiyê berxeke mê ya yeksalî ya bêqisûr, wekî pêşkêşiya aştiyê beranekî bêqisûr,

¹⁵ selikeke nanê şikeva, ji arvanê hûr kilorên bi zeytê hatine hevîrkirin, nanê sêlê yê şikeva yê ku zeyt li ser hatiye kirin, bi pêşkêşiya dexlê û pêşkêşiya rijandinê re bîne û pêşkêşî Xudan bike.

¹⁶ “‘Wê kahin van wekî pêşkêşiya paqijiyê û qurbana şewitandinê li hizûra Xudan pêşkêş bike.

¹⁷ Wê berên bi selika nanê şikeva re, wekî qurbana aştiyê pêşkêşî Xudan bike. Wê kahin pêşkêşiya dexlê û pêşkêşiya rijandinê jî pêşkêş bike.

¹⁸ “‘Piştre kesê sozdana nezîriyê daye, wê li ber deriyê Konê Hevdîtinê porê xwe kur bike, ji porê xwe hilde û deyne ser agirê bin qurbana aştiyê.

¹⁹ Piştî wî porê xwe kur kir, wê kahin hêta beranê kelandî, bi nanekî şikeva yê selikê û nanê şikeva yê sêlê re têxe destê kesê veqetandî.

²⁰ Wê kahin wan wekî pêşkêşiya raberkirinê li hizûra Xudan raber bike. Ev singê raberkirî û hêta ku hat pêşkêşkirin para pîroz a kahin in. Piştre kesê xwe veqetandiye dikare şerabê vexwe.

²¹ “‘Rê û rêbaza sozdana nezîriyê ev e. Divê pêşkêşiya wî ya Xudan li gorî sozdana nezîriyê be û heke jê were, dikare zêdetir jî bide. Divê li gorî rê û rêbaza nezîriyê, wê sozê pêk bîne.’”

Pîrozkirina ku kahin dikin

²² Xudan ji Mûsa re got:

²³ “Ji Harûn û kurên wî re bêje: ‘Hûnê gelê Îsraêl wiha pîroz bikin. Hûnê ji wan re bêjî:

²⁴ “‘Bila Xudan te bereket bike û biparêze.

²⁵ Bila Xudan rûyê xwe ji te re ronî bike Û ji te re keremdar be.

²⁶ Bila Xudan berê xwe bide te Û aştiyê bide te.’

²⁷ “Bi vî awayî wê navê min deynin ser gelê Îsraêl û ezê wan pîroz bikim.”