Hejmartin 4 - Kurmanji Încîl

Berpirsiyariya Qohatiyan

¹ Xudan bi Mûsa û Harûn re peyivî û got:

² “Di nav eşîra Lêwî de, li gorî malbat û binemalên wan tenê Qohatiyan cuda bijmêrin.

³ Hemû mêrên ji sî heta pêncî salî ne ku dikarin xizmeta Konê Hevdîtinê bikin, bijmêrin.

⁴ Xizmeta ku Qohatî li Konê Hevdîtinê dikin, li ser hilgirtina taximên herî pîroz e.

⁵ “Gava artêşgeh bi rê dikeve, wê Harûn û kurên xwe bikevin hundir, perdeya jihevqetandinê bînin xwarê û Sindoqa Şahidiyê pê binixêmin.

⁶ Piştre wê bi xêliyeke çermê beran ê şînê tarî ser wê binixêmin. Wê kincekî bi tevahî şînê tarî deynin ser û destiyên wê lêxin.

⁷ “Wê kincê şînê tarî li ser sifra nanê hizûrê raxin û wê tasik û firaxên bixûrê tevî tas û şerbikên pêşkêşiya rijandinê deynin ser. Wê nanê rojane li ser maseyê hebe.

⁸ Wê kincekî sor raxin ser wan û bi xêliyeke çermê beran ê şînê tarî binixêmin û destiyên wê lêxin.

⁹ “Wê kincekî şînê tarî hildin, şamdank, qendîlên wê, maşikên fitîlan, tepsikên wê û taximên wê yên ku ji bo zeytê tên xebitandin binixêmin.

¹⁰ Wê şamdank û hemû taximên wê bi xêliyeke çermê beran ê şînê tarî binixêmin û deynin ser darbestê.

¹¹ “Wê kincekî şînê tarî bavêjin ser gorîgeha zêrîn û bi xêliyeke çermê beran ê şînê tarî binixêmin û destiyên wê lêxin.

¹² Wê hemû taximên xizmeta Pîrozgehê hildin û wan bixin hundirê kincekî şînê tarî, bi xêliyeke çermê beran ê şînê tarî binixêmin û deynin ser darbestê.

¹³ Wê kincekî ji gorîgehê rakin û wê bi xêliyeke binevşî binixêmin.

¹⁴ Wê hemû taximên ji bo xizmeta gorîgehê tên xebitandin; tepsik, sêgoyên goşt, bêr û tasik hildin, gorîgehê bi xêliyeke çermê beran ê şînê tarî binixêmin û destiyên wê lêxin.

¹⁵ “Gava artêşgeh bi rê dikeve, piştî Harûn û kurên xwe karê nixamtina Pîrozgehê û hemû taximên wê qedandin, wê Qohatî ji bo hilgirtina wê werin. Lê wê dest nedin tiştên pîroz ku nemirin. Barên Konê Hevdîtinê yên ku Qohatî hilgirin, ev in.

¹⁶ “Wê Êlezarê kurê Harûnê Kahin ji Pîrozgehê û taximên wê berpirsiyar be; rûnê ronahiyê, bixûra bêhnxweş, pêşkêşiya dexlê ya rojane, rûnê kifşkirinê, tevahiya meskên û her tiştê tê de.”

¹⁷ Xudan bi Mûsa û Harûn re peyivî û got:

¹⁸ “Binemalên Qohatiyan ji nav eşîra Lêwî kêm nebin.

¹⁹ Gava nêzîkî tiştên pîroz dibin, wiha bikin ku bijîn, nemirin: Wê Harûn û kurên xwe bikevin hundir û her yekî ji wan ji bo kar û barên wan tayîn bikin.

²⁰ Lê wê Qohatî çirkeyek jî, ji bo dîtina tiştên pîroz nekevin hundir ku nemirin.”

Berpirsiyariya Gêrşoniyan

²¹ Xudan ji Mûsa re got:

²² “Li gorî malbat û binemalên wan Gêrşoniyan bijmêre.

²³ Hemû mêrên ji sî heta pêncî salî ne ku dikarin xizmeta Konê Hevdîtinê bikin, bijmêre.

²⁴ “Di xizmeta hilgirtinê de peywira binemalên Gêrşoniyan, ev e:

²⁵ Wê Gêrşonî perdeyên meskên, Konê Hevdîtinê û xêliya wî, xêliya li ser a çermê beran ê şînê tarî, perdeya deriyê Konê Hevdîtinê,

²⁶ perdeyên hewşê, perdeya dergehê hewşa ku meskên û gorîgehê dor dipêçe, qeytanên wan û hemû taximên xizmeta wan hilgirin. Hemû xizmeta li ser van tiştan peywira wan e.

²⁷ Hemû xizmeta Gêrşonî bikin; hilgirtin tevî xizmetên din, wê bi gotina Harûn û kurên wî be. Hûnê wan ji bo kar û barên xwe tayîn bikin.

²⁸ Xizmeta binemalên Gêrşoniyan a li Konê Hevdîtinê ev e. Wê xizmeta wan di bin berpirsiyariya Îtamarê kurê Harûnê Kahin be.

Berpirsiyariya Mêrariyiyan

²⁹ “Mêrariyiyan jî li gorî malbat û binemalên wan bijmêre.

³⁰ Hemû mêrên ji sî heta pêncî salî ne ku dikarin xizmeta hilgirtina Konê Hevdîtinê bikin, bijmêre.

³¹ Kar û barê wan ê li Konê Hevdîtinê ev e: Wê derdora meskên, stûn, girş, binik,

³² seredor stûnên hewşê, binik, sing, qeytan û hemû taximên ku bi van re tên xebitandin hilgirin. Tê her yekî ji wan deynî ser karekî.

³³ Karên binemalên Mêrarî yên li Konê Hevdîtinê ev in. Wê xizmeta wan di bin berpirsiyariya Îtamarê kurê Harûnê Kahin be.”

Hejmartina Lêwiyiyan

³⁴ Îcar Mûsa, Harûn û serekên civakê, Qohatî li gorî malbat û binemalên wan hejmartin.

³⁵ Wan hemû mêrên ji sî heta pêncî salî ku dikarin xizmeta hilgirtina Konê Hevdîtinê bikin, hejmartin.

³⁶ Li gorî binemalên wan hejmara wan 2.750 kes bû.

³⁷ Qohatiyên li Konê Hevdîtinê xizmet dikirin û li gorî binemalên xwe hatin hejmartin ev bûn. Li ser fermana devê Xudan ku bi riya Mûsa hat dayîn, Mûsa û Harûn ew hejmartin.

³⁸ Gêrşonî li gorî malbat û binemalên xwe hatin hejmartin.

³⁹ Hemû mêrên ji sî heta pêncî salî ku dikarin xizmeta hilgirtina Konê Hevdîtinê bikin, hatin hejmartin.

⁴⁰ Li gorî malbat û binemalên xwe yên hejmartî 2.630 kes bûn.

⁴¹ Gêrşoniyên li Konê Hevdîtinê xizmet dikirin û li gorî binemalên xwe hatin hejmartin, ev bûn. Li ser fermana devê Xudan, Mûsa û Harûn ew hejmartin.

⁴² Mêrarî li gorî malbat û binemalên xwe hatin hejmartin.

⁴³ Her mêrên ji sî heta pêncî salî ku dikarin xizmeta hilgirtina Konê Hevdîtinê bikin, hatin hejmartin.

⁴⁴ Li gorî binemalên wan, kesên hejmartî 3.200 kes bûn.

⁴⁵ Hejmartina binemalên Mêrariyiyan ev bû ku Mûsa û Harûn li ser fermana devê Xudan û bi riya Mûsa kiribûn.

⁴⁶ Bi vî awayî Mûsa, Harûn û serekên gelê Îsraêl, Lêwiyiyan li gorî malbat û binemalên wan,

⁴⁷ hemû mêrên ku emrê wan di navbera sî heta pêncî salî de ne hejmartin ku dikarin karê hilgirtinê û xizmetên din ên Konê Hevdîtinê bikin.

⁴⁸ Hejmara wan 8.580 kes bû.

⁴⁹ Li ser fermana devê Xudan, ew li gorî xizmet û karê xwe yê hilgirtinê bi destê Mûsa hatin hejmartin. Bi vî awayî çawa ku Xudan emir kiribû, ew bi riya Mûsa hatin hejmartin.