Hejmartin 35 - Kurmanji Încîl

Bajarên ji bo Lêwiyiyan hatin kifşkirin

¹ Xudan li pêşberî Erîhayê, li deştên Moavê, li rojhilatê Çemê Şerîayê ji Mûsa re got:

² “Li gelê Îsraêl emir bike û bibêje: ‘Bila ji milkê ku mîrasa wan e, bajarên ku wê Lêwiyî lê rûnin bidin wan.’ Mêrgên li kêleka bajaran jî bidin wan.

³ Wê ev bajar, ên wan bin ku ew lê rûnin. Wê ev mêrg jî, ji bo pez, dewar û heywanên wan bin.

⁴ “Mêrgên bajarên ku hûnê bidin Lêwiyiyan wê bi qasî hezar gazan ji sûra bajêr wêdetir bin.

⁵ Hûnê li derveyî bajêr bi aliyê rojhilat ve du hezar, bi aliyê başûr ve du hezar, bi aliyê rojava ve du hezar û bi aliyê bakur ve du hezar gaz bipîvin. Wê ev der bibe mêrgên bajarên wan.

Bajarên Sitargehê

⁶ “Ji bajarên ku hûn didin Lêwiyiyan, wê şeş bajar bibin bajarên sitargehê ku kujer birevinê. Ji xeynî van hûnê çil û du bajarên din bidin Lêwiyiyan.

⁷ Wê hejmara bajarên ku hûn wan bi mêrgên wan ve bidin Lêwiyiyan, çil û heşt be.

⁸ Hûnê ji milkê her eşîrê gelê Îsraêl bajaran bidin Lêwiyiyan. Li gorî mîrasa wê, hûnê ji eşîra ku bajarê wê pir in, pir û ji eşîra ku bajarên wê hindik in, hindik bidin.”

⁹ Xudan ji Mûsa re got:

¹⁰ “Bi gelê Îsraêl re bipeyive û ji wan re bêje: ‘Gava hûn Çemê Şerîayê derbas bikin û bigihîjin welatê Kenanê,

¹¹ hûnê ji bo xwe hinek bajaran wekî bajarên sitargehê kifş bikin ku kesê bi şaşî zilamekî bikuje wê bireve wir.

¹² Wê ev bajar bibin sitargeh ku kesê ku zilamekî kuştiye, ji kesê dixwaze heyfê bistîne, bireve û heta li pêş civakê neyê dadbarkirin, wê neyê kuştin.

¹³ Wê her şeş bajarê ku hûn kifş bikin bibin bajarên sitargehê.

¹⁴ Hûnê sê bajaran li rojhilatê Çemê Şerîayê û sê bajaran jî li welatê Kenanê wekî bajarên sitargehê kifş bikin.

¹⁵ Wê ev şeş bajar ji kesên gelê Îsraêl û xerîbên nav wan re bibin sitargeh. Kesê bi şaşî zilamekî kuştiye wê bireve wir.

¹⁶ “‘Heke kesek bi amûreke hesin li kesekî bixe û wî bikuje, ew kujer e û divê bê kuştin.

¹⁷ Heke kesek kevirekî ku dikare mirovan bikuje hilde, pê li kesekî bixe û wî bikuje, ew kujer e û divê esse bê kuştin.

¹⁸ An di destê kesekî de darekî ku mirov pê tê kuştin hebe, ew pê li yekî bixe û bikuje, ew kujer e û divê bê kuştin.

¹⁹ Kesê dixwaze heyfa xwînê bistîne, wê kujer bikuje. Çaxê ew li kujer rast hat, wê wî bikuje.

²⁰ Heke kesek ji ber nefretê kesekî din dehf bide yan ji kemînê tiştekî bavêje ser wî û wî bikuje,

²¹ yan jî heke kesek ji ber dijminatiyê bi kulman li kesekî din bixe û wî bikuje, ew kes kujer e. Çaxê kesê dixwaze heyfa xwînê bistîne lê rast bê, wê wî bikuje.

²² “‘Heke kesek bêyî dijminatiyê jinişkave kesekî din dehf bide yan gava ne di kemînê de ye tiştekî bavêjê,

²³ yan jî heke kesek kevirekî ku mirov dikuje hilde û bêyî ku haya wî jê hebe, bi ser yekî ve tera bike û wî bikuje, ji ber ku dijminatiya kujer bi kuştî re tunebû û ne xwestiye zirarê bidê,

²⁴ wê civak di navbera kujer û kesê dixwaze heyfa xwînê bistîne de, li gorî van rê û rêbazan dîwanê bike:

²⁵ Wê civak kujer ji destê kesê dixwaze heyfa xwînê bistîne rizgar bike û wî bişîne bajarê sitargehê ku jê reviyaye. Wê ew kes, heta serkahinê ku bi rûnê pîroz hatiye kifşkirin bimire, li wê derê bimîne.

²⁶ “‘Lê heke kujer sînorê bajarê sitargehê derbas bike

²⁷ û kesê dixwaze heyfa xwînê bistîne wî li derveyî sînorê bajarê sitargehê bikuje, wê heyfgir sûcdar neyê hesibandin.

²⁸ Çimkî divê kujer heta mirina serkahin li bajarê sitargehê bima. Piştî mirina serkahin, ew dikare vegere ser milkê xwe.

²⁹ “‘Wê ev di nav nifşên we de li her cihê ku hûn lê dimînin bibe rêbaz û qanûn.

³⁰ “‘Heke zilamek kesekî din bikuje, wê kujer li ser gotina şahidan bê kuştin. Lê ji bo kuştina yekî, wê şahidiya şahidekî têrê neke.

³¹ Hûnê di ber canê kujêr de berdêlê nestînin. Kujêr mirin heq kiriye û divê bê kuştin.

³² Hûnê di ber zilamê ji bajarê sitargehê reviyaye berdêlê nestînin ku beriya mirina Serkahin vegere axa xwe û lê rûne.

³³ Hûnê welatê ku hûn lê rûdinin qirêj nekin. Çimkî xwîn welêt qirêj dike. Ji bo welatê ku xwîn lê hatiye rijandin, ne bi tiştekî din, lê tenê bi xwîna kesê ku xwîn rijandiye wê kefaret bê dayîn.

³⁴ Hûnê welatê hûn lê rûdinin û ez jî di nav de me qirêj nekin. Çimkî ez Xudan di nav gelê Îsraêl de rûdinim.’”