Hejmartin 34 - Kurmanji Încîl

Sînorên Kenanê

¹ Xudan ji Mûsa re got:

² “Li gelê Îsraêl emir bike û ji wan re bêje: ‘Gava hûn ketin welatê Kenanê yê ku wê bi milkî para we bikeve, wê sînorên we wiha bin:

³ “‘Sînorê we yê başûr wê ji Beriya Zînê hilkişe sînorê Edomê. Li rojhilat, wê sînorê we yê başûr ji keviyên Gola Xwê destpê bike,

⁴ di başûrê Hevrazê Dûpişkan re bigihîje Zînê û heta başûrê Qadêş-Barnêayê here. Wê ji wê derê here Hasar-Addar û Esmonê,

⁵ ji Esmonê jî dirêjî Geliyê Misrê bibe û li Derya Spî biqede.

⁶ “‘Sînorê we yê rojava wê bibe Derya Spî û keviyên wê. Wê sînorê we yê rojava wiha be.

⁷ “‘Sînorê we yê bakur wê ji Derya Spî bigihîje Çiyayê Horê.

⁸ Wê ji Çiyayê Horê xwe berde Levo-Hamatê, ji wir bigihîje Sedadê,

⁹ ber bi Zîfronê ve dirêj bibe û li Hasar-Eynanê biqede. Wê sînorê we yê bakur wiha be.

¹⁰ “‘Sînorê we yê rojhilat wê ji Hasar-Eynanê heta Şefamê hilkişe

¹¹ û ji Şefamê xwe berde Rîvlaya li rojhilatê Eyînê. Wê ji wir berjêr bibe û bigihîje palên rojhilatê Gola Kînneretê.

¹² Wê sînor dakeve Çemê Şerîayê û bigihîje keviyên Gola Xwê. “‘Wê sînorên welatê we ji her alî ve wiha be.’”

¹³ Mûsa li gelê Îsraêl emir kir û got: “Welatê ku hûnê bi pişkê mîras bistînin ev e. Çawa ku Xudan emir kiriye, wê di nav neh eşîr û nîveşîrê de bê parvekirin.

¹⁴ Çimkî eşîra Rûbên bi tevahiya malbatên xwe ve û eşîra Gad bi tevahiya malbatên xwe ve û nîveşîra Minaşşe mîrasa xwe standin.

¹⁵ Her du eşîr û nîveşîr, mîrasa xwe li rojhilatê Çemê Şerîayê, li pêşberî Erîhayê standin.”

¹⁶ Xudan ji Mûsa re got:

¹⁷ “Navên zilamên ku wê welat li we parve bikin ev in: Êlezarê Kahin û Yêşûyê kurê Nûn.

¹⁸ Ji bo bi mîrasî parvekirina welêt ji her eşîrekê serekekî hildin.

¹⁹ “Navê kesên ku hûnê peywirdar bikin ev in: Ji eşîra Cihûda, Kalêvê kurê Yefûnne,

²⁰ ji eşîra Şimûn, Şemûêlê kurê Emmîhûd,

²¹ ji eşîra Binyamîn, Elîdadê kurê Kîslon,

²² ji eşîra Dan serekek, Bûqiyê kurê Yoglî,

²³ ji kurên Ûsiv; ji eşîra Minaşşe serekek, Hanniyêlê kurê Êfod

²⁴ û ji eşîra Efrayîm serekek, Qemûêlê kurê Şîftan,

²⁵ ji eşîra Zevûlon serekek, Êlîsafanê kurê Parnak,

²⁶ ji eşîra Îssexar serekek, Paltiyêlê kurê Ezzan,

²⁷ ji eşîra Aşêr serekek, Ahîhûdê kurê Şelomî

²⁸ û ji eşîra Neftelî serekek, Pedahêlê kurê Emmîhûd.”

²⁹ Kesên ku Xudan li wan emir kiribû ku li welatê Kenanê mîrasa gelê Îsraêl parve bikin, ev bûn.