Hejmartin 32 - Kurmanji Încîl

Eşîrên li rojhilatê Çemê Şerîayê bicih bûne

¹ Gelek zêde pez û dewarên Gadî û Rûbêniyan hebûn. Gava wan dît ku axa Yazêrê û axa Gîladê ji bo xweyîkirina heywanan baş in,

² Gadî û Rûbênî hatin ba Mûsa, Êlezarê Kahin û serekên civakê. Wan got:

³ “Etarot, Dîvon, Yazêr, Nîmra, Heşbon, Êlele, Sevam, Nebo û Beon

⁴ ango ev deverên ku Xudan li ber civaka Îsraêl têk bir, ji bo pez û dewaran baş e û heywanên xulamên we jî hene.

⁵ Heke dilê te bi me xweş be, vê axê wekî milk bide xulamên xwe ku em jî derbasî wî alî Çemê Şerîayê nebin.”

⁶ Mûsa ji Gadî û Rûbêniyan re got: “Wê birayên we herin şer û hûnê li vir bimînin?!

⁷ Hûn çima dilê gelê Îsraêl sar dikin ku diçin welatê Xudan daye wan?

⁸ Bavên we yên ku min ji Qadêş-Barnêayê şandin ku welêt bibînin jî wisa kir.

⁹ Gava ew heta Newala Eşkolê çûn û wan welat dît, wan dilê gelê Îsraêl sar kir ku neçin welatê Xudan daye wan.

¹⁰ Wê rojê hêrsa Xudan rabû. Wî sond xwar û got:

¹¹ ‘Ji kesên bîst salî û mezintir ku ji Misrê derketin, wê welêt nebînin ku min sond xwariye bidim Îbrahîm, Îshaq û Aqûb. Çimkî wan bi tevahî neda pey min.

¹² Wê ji bilî Kalêvê kurê Yefûnneyê Qenîzzî û Yêşûyê kurê Nûn, tu kesekî din wê derê nebîne. Çimkî tenê wan bi tevahî da pey min.’

¹³ Îcar hêrsa Xudan li dijî gelê Îsraêl rabû û heta tevahiya wî nifşê ku tiştên di çavê Xudan de xerab in kiribûn qedand, wî ew çil salan li beriyê da gerandin.

¹⁴ “Nexwe hûn, ya ziriyeta gunehkaran! Hûn ketin şûna bavê xwe û hûn hêrsa Xudan a dijwar li dijî gelê Îsraêl zêdetir dikin.

¹⁵ Heke hûn dev ji rêveçûna pey wî berdin, wê Xudan dîsa wan li beriyê bihêle û hûnê bibin sedema tunebûna tevahiya vî gelî.”

¹⁶ Ew nêzîkî Mûsa bûn û wan jê re got: “Emê li vir ji bo pezê xwe hevşiyan çêkin û ji bo zarokên xwe bajaran ava bikin.

¹⁷ Lê emê çekan hildin û pêşengiya gelê Îsraêl bikin heta ew bigihîjin welatê ku wê bibe yê wan. Lê ji ber şêniyên welêt, wê zarokên me li bajarên bisûr rûnin.

¹⁸ Heta ku hemû gelê Îsraêl mîrasa xwe bistîne, emê nezivirin malên xwe.

¹⁹ Emê li aliyê din ê Çemê Şerîayê û wêdetir bi wan re mîras nestînin. Çimkî rojhilatê Çemê Şerîayê wekî mîras para me ket.”

²⁰ Mûsa ji wan re got: “Heke hûn vê yekê bikin, çekên xwe hildin, li pêşberî Xudan herin şer

²¹ û hemû kesên ji we çekên xwe hildin, heta dijminên Xudan li ber wî bên qewitandin, li pêşiya Xudan Çemê Şerîayê derbas bikin

²² û welat jî li ber wî bikeve dest, wî çaxî hûnê bikaribin vegerin û beramberî Xudan û gelê Îsraêl nekevin bin barekî. Wê gavê wê ev der li ber Xudan bibe milkê we.

²³ “Lê heke hûn wiha nekin, wê gavê hûnê li dijî Xudan guneh bikin û bawer bin wê sûcê we pêsîra we bernede.

²⁴ Ji bo zarokên xwe bajaran û ji bo keriyên xwe hevşiyan çêkin. Lê gotina ji devê we derketiye bikin.”

²⁵ Gadî û Rûbêniyan ji Mûsa re got: “Wê xulamên te çawa ku xweyê me emir kiriye, bikin.

²⁶ Wê jinên me, zarokên me, keriyên me û hemû heywanên me yên din li vir, li bajarên Gîladê bimînin.

²⁷ Lê çawa ku te emir kiriye, wê hemû xulamên te çekên xwe hildin, derbasî aliyê din bibin û li ber Xudan şer bikin.”

²⁸ Mûsa li ser Gadî û Rûbêniyan, li Êlezarê Kahin, Yêşûyê kurê Nûn û serekên binemalên eşîrên gelê Îsraêl emir kir.

²⁹ Mûsa ji wan re got: “Heke Gadî û Rûbêniyên çekdar li ber Xudan bi we re Çemê Şerîayê derbas bikin û welat li ber we bikeve dest, hûnê herêma Gîladê bi milkî bidin wan.

³⁰ Lê heke çekdar bi we re derbas nebin, wê li welatê Kenanê di nav we de milk bistînin.”

³¹ Gadî û Rûbêniyan bersiv da û got: “Çawa ku Xudan ji xulamên te re gotiye, emê wisa bikin.

³² Emê bi awayekî çekdar li ber Xudan derbasî welatê Kenanê bibin, lê milkê ku emê mîras bistînin, wê li rojhilatê Çemê Şerîayê be.”

³³ Mûsa padîşahiya Sîhonê Padîşahê Amoriyan û padîşahiya Ogê Padîşahê Başanê da eşîrên Gad, Rûbên û nîveşîra Minaşşeyê kurê Ûsiv. Wî welat, bajar û axa bajarên derdora wan dan wan.

³⁴ Gadiyan ev bajar ji nû ve ava kirin: Dîvon, Etarot, Eroêr,

³⁵ Etrot-Şofan, Yazêr, Yogboha,

³⁶ Bêtnîmra û Bêtharan. Wan ji bo xwe bajarên bi sûr û hevşiyên pêz çêkirin.

³⁷ Rûbêniyan ev ji nû ve ava kirin: Heşbon, Êlele, Qîryatayîm,

³⁸ Nebo, Baal-Meon –hinek nav hatin guhertin– û Sîvma. Wan navên nû li bajarên ku çêkirin danîn.

³⁹ Kesên ji ziriyeta Maxîrê kurê Minaşşe çûn Gîladê û wan ew desteser kir. Wan Amoriyên wir qewitandin.

⁴⁰ Bi vî awayî Mûsa axa Gîlad da Maxîrê kurê Minaşşe û ew jî li wê derê rûniştin.

⁴¹ Yayîrê ji nîveşîra Minaşşe çû, gundên Amoriyan standin û navê Hawot-Yayîr li wan deran kir.

⁴² Novah jî çû û Qenat û gundên wê standin. Wî navê xwe li wê derê kir.