Hejmartin 31 - Kurmanji Încîl

Heyf ji Mîdyanê tê standin

¹ Xudan ji Mûsa re got:

² “Heyfa gelê Îsraêl ji Mîdyaniyan bistîne. Piştre tê bimirî û bigihîjî pêşiyên xwe.”

³ Mûsa ji gel re got: “Ji bo ku li dijî Mîdyaniyan şer bikin û heyfa Xudan ji wan bistînin, ji nav xwe zilaman çekdar bikin.

⁴ Ji her eşîreke Îsraêl, hezar mêran bişînin şer.”

⁵ Li ser vê yekê ji eşîrên Îsraêl, ji her eşîrekê hezar mêr hatin hilbijartin. Wan duwanzdeh hezar zilam çekdar kirin.

⁶ Mûsa ji her eşîrê hezar zilamên çekdar û Pînehasê kurê Êlezarê Kahin şandin şer. Pînehas hinek taximên Pîrozgehê û boriyên dengbilind hildan ba xwe.

⁷ Çawa ku Xudan li Mûsa emir kir, wan li dijî Mîdyaniyan şer kir û hemû şervanên wan kuştin.

⁸ Wan pênc padîşahên Mîdyanê kuştin: Ewî, Reqem, Sûr, Hûr û Reva. Wan Balamê kurê Beor jî da ber şûran.

⁹ Gelê Îsraêl jin û zarokên Mîdyaniyan dîl girtin. Wan hemû heywan, kerî û malê wan talan kirin.

¹⁰ Hemû war û bajarên Mîdyanî lê diman şewitandin

¹¹ û hemû tişt, çi mirov, çi heywan talan kirin.

¹² Wan êsîr û talan anîn ba Mûsa, Êlezarê Kahin û civata gelê Îsraêl. Wan ew anîn artêşgeha ku li pêşberî Erîhayê, li deştên Moavê, li rojhilatê Çemê Şerîayê bû.

¹³ Mûsa, Êlezarê Kahin û hemû serekên civakê derketin derveyî artêşgehê ku bên pêşiya wan.

¹⁴ Mûsa li fermandarên artêşê, serhezar û sersedan hêrs bû ku ji şer dihatin.

¹⁵ Mûsa ji wan re got: “Ma we hemû jin sax hiştine?!

¹⁶ Ew jin ew in ku guhdariya şîreta Balam kir! Ew di meseleya Peor de bûn sedema nedilsoziya gelê Îsraêl a bi Xudan re. Loma kul ket nav civaka Xudan.

¹⁷ Niha hemû zarokên kurîn û jinên ku bi mêran re razane bikujin.

¹⁸ Lê keçên ciwan ên ku bi mêran re ranezane ji bo xwe sax bihêlin.

¹⁹ Bila her kesê ji we ku mirovekî kuştiye yan dest daye miriyekî, heft rojan li derveyî artêşgehê bimîne. Herwiha bila di roja sisêyan û di roja heftan de xwe û êsîrên xwe ji gunehan pak bike.

²⁰ Hûnê her cilî, her tiştê çermîn, her tiştê ji mûyê bizinê hatiye çêkirin û her tiştê darîn pak bikin.”

²¹ Êlezarê Kahin ji leşkerên ji şer vegeriyane re got: “Rêbaza şerîeta ku Xudan li Mûsa emir kiriye ev e:

²² ‘Zêr, zîv, tûnc, hesin, qelay û risas,

²³ wê her tiştê li ber êgir li ber xwe dide, di êgir re derbas bibe û pak bibe. Herwiha hûnê bi ava paqijkirinê pak bikin û her tiştê li ber êgir li ber xwe nade jî di avê re derbas bikin.

²⁴ Hûnê roja heftan cilên xwe bişon û pak bibin. Piştre hûn dikarin bikevin artêşgehê.’”

Parvekirina malên talankirî

²⁵ Xudan ji Mûsa re got:

²⁶ “Tu, Êlezarê Kahin û serekên binemalên civakê, çi mirov, çi heywan tevahiya talên bijmêrin.

²⁷ Paşê talên di navbera kesên çûne şer û tevahiya civakê de parve bikin.

²⁸ Ji para leşkerên çûne şer, ji mirov, ker û pez û dewêr, tê ji bo Xudan ji pêncsedan yekî bac bistînî.

²⁹ Tê vê bacê ji nîvê para ji leşkeran re ketiye bistînî û ji bo Xudan wekî pêşkêşî bidî Êlezarê Kahin.

³⁰ Ji nîvê para din a gelê Îsraêl ji mirov û hemû heywanan –pez, ker an dewar– ji pênciyan yekî bistînî û bidî Lêwiyiyên ku nobedariya Meskenê Xudan dikin.”

³¹ Çawa ku Xudan li Mûsa emir kiriye, Mûsa û Êlezarê Kahin wiha kir.

³² Talanê mayî yê ku leşkeran di şer de anîbû, ev bû: 675.000 pez,

³³ 72.000 dewar,

³⁴ 61.000 ker,

³⁵ 32.000 keçên ku bi mêran re ranezane.

³⁶ Nîvê para ji leşkerên ku çûbûn şer re ket jî ev bû: 337.500 pez,

³⁷ baca Xudan a ji van 675 pez,

³⁸ 36.000 dewar, baca Xudan a ji van 72 dewar,

³⁹ 30.500 ker, baca Xudan a ji van 61 ker

⁴⁰ û 16.000 kes, baca Xudan a ji van 32 kes.

⁴¹ Çawa ku Xudan lê emir kiribû, Mûsa baca ji Xudan re hatiye veqetandin da Êlezarê Kahin.

⁴² Nîvê para ku Mûsa ji leşkerên ku çûne şer stand û da gelê Îsraêl

⁴³ ango nîvê ku bû para civakê, ev bû: 337.500 pez,

⁴⁴ 36.000 dewar,

⁴⁵ 30.500 ker

⁴⁶ û 16.000 kes.

⁴⁷ Çawa ku Xudan lê emir kiriye, Mûsa ji nîvê para ji gelê Îsraêl re ketiye, ji her pêncî kesî yekî û ji her pêncî heywanî yekî hilda û da Lêwiyiyên ku nobedariya Meskenê Xudan dikin.

⁴⁸ Fermandarên serhezar û sersed nêzîkî Mûsa bûn

⁴⁹ û jê re got: “Em xulamên te, me tevahiya zilamên ku me biribû şer hejmartin û ji me tu kes kêm tuneye.

⁵⁰ Herwiha me pêşkêşiyên Xudan anîn. Hemû ji me çi tiştê dîtibe; tiştên zêrîn, bazbend, bazin, gustîl, guhar û gerdenî me anîn ku ji bo bexişandina canê xwe wekî kefaret bidin Xudan.”

⁵¹ Mûsa û Êlezarê Kahin zêr û her cure tiştên zêrîn ji wan standin.

⁵² Giraniya tevahiya zêrê ku serhezar û sersedan pêşkêşî Xudan kir 16.750 şekel bû.

⁵³ Hemû leşker talanê xwe hildabû.

⁵⁴ Mûsa û Êlezarê Kahin ji serhezar û sersedan zêr stand û wekî pêşkêşiyeke bîranînê ya ji bo gelê Îsraêl li hizûra Xudan anî Konê Hevdîtinê.