Hejmartin 29 - Kurmanji Încîl

Cejna Borîlêxistinê

¹ “‘Di roja pêşî ya meha heftan de hûnê civîna pîroz çêkin û karên xwe yên rojane nekin. Wê roja borîlêxistinê be.

² Hûnê wekî qurbana şewitandinê ya ku bêhna wê bi Xudan xweş tê, conegayek, beranek û heft berxên nêr ên yeksalî pêşkêş bikin.

³ Pêşkêşiya wan a dexlê ku ji arvanê hûr ê bi zeytê hatiye hevîrkirin wê wiha be: Bi conegê re ji dehan sisêyê efayê, bi berên re ji dehan duyê efayê,

⁴ ji bo heft berxan, bi her berxî re dehyeka efayê

⁵ û wekî pêşkêşiya paqijiyê nêriyekî ku di ber gunehên we de bibe kefaret.

⁶ Ji xeynî pêşkêşiya şewitandinê ya mehane û pêşkêşiya wê ya dexlê, pêşkêşiyên rojane û pêşkêşiya wê ya dexlê û pêşkêşiyên wan ên rijandinê, hûnê van pêşkêşiyan li gorî rêbazên wan pêşkêşî Xudan bikin ku bêhna wan xweş bin.

Pêşkêşiyên Roja Kefaretê

⁷ “‘Di dehê meha heftan de hûnê civîneke pîroz çêkin. Wê rojê hûnê dev ji nefsa xwe berdin û karekî nekin.

⁸ Hûnê qurbana şewitandinê ya ku bêhna wê bi Xudan xweş tê pêşkêş bikin; conegayek, beranek, heft berxên nêr ên yeksalî. Wê bêqisûr bin.

⁹ Pêşkêşiya wan a dexlê ku ji arvanê hûr ê bi zeytê hatiye hevîrkirin wê wiha be: Bi conegê re ji dehan sisêyê efayê, bi berên re ji dehan duduyê efayê,

¹⁰ bi her berxî re dehyeka efayê.

¹¹ Herwiha ji xeynî pêşkêşiya paqijiyê ya ku wekî kefaretê tê dayîn, pêşkêşiya şewitandinê ya rojane, pêşkêşiya wê ya dexlê û pêşkêşiyên wan ên rijandinê, hûnê wekî pêşkêşiya paqijiyê nêriyekî pêşkêş bikin.

Pêşkêşiyên Cejna Holikan

¹² “‘Di panzdehê meha heftan de hûnê civîneke pîroz çêkin û karên xwe yên rojane nekin. Hûnê heft rojan cejna Xudan bikin.

¹³ Hûnê wekî qurbana şewitandinê ya ku bêhna wê bi Xudan xweş tê, sêzdeh conega, du beran, çardeh berxên nêr ên yeksalî pêşkêş bikin. Divê ew bêqisûr bin.

¹⁴ Pêşkêşiya wan a dexlê arvanê hûr ê ku bi zeytê hatiye hevîrkirin wê wiha be: Ji bo sêzdeh conegayan bi her conegayekî re ji dehan sisêyê efayê, ji bo du beranan, bi her beranekî re ji dehan duduyê efayê,

¹⁵ ji bo çardeh berxan bi her berxî re dehyeka efayê.

¹⁶ Herwiha ji xeynî qurbana şewitandinê ya rojane û pêşkêşiyên wê yên dexil û rijandinê, hûnê wekî pêşkêşiya paqijiyê nêriyekî pêşkêş bikin.

¹⁷ “‘Di roja diduyan de hûnê van pêşkêş bikin: Duwanzdeh conega, du beran, çardeh berxên nêr ên yeksalî û bêqisûr,

¹⁸ li gorî rêbaz û hejmarên wan, ji bo conega, beran û berxan pêşkêşiyên wan ên dexlê û rijandinê

¹⁹ û ji xeynî qurbana şewitandinê ya rojane, pêşkêşiya wê ya dexlê û pêşkêşiyên wan ên rijandinê, wekî pêşkêşiya paqijiyê nêriyek.

²⁰ “‘Di roja sisêyan de hûnê van pêşkêş bikin: Yanzdeh conega, du beran, çardeh berxên nêr ên yeksalî û bêqisûr,

²¹ li gorî rêbaz û hejmarên wan, ji bo conega, beran û berxan pêşkêşiyên wan ên dexlê û rijandinê

²² û ji xeynî qurbana şewitandinê ya rojane, pêşkêşiya wê ya dexlê û pêşkêşiya wê ya rijandinê, wekî pêşkêşiya paqijiyê nêriyek.

²³ “‘Di roja çaran de hûnê van pêşkêş bikin: Deh conega, du beran, çardeh berxên nêr ên yeksalî û bêqisûr,

²⁴ li gorî rêbaz û hejmarên wan, ji bo conega, beran û berxan pêşkêşiyên wan ên dexlê û rijandinê

²⁵ û ji xeynî qurbana şewitandinê ya rojane û pêşkêşiyên wê yên dexil û rijandinê, wekî pêşkêşiya paqijiyê nêriyek.

²⁶ “‘Di roja pêncan de hûnê van pêşkêş bikin: Neh conega, du beran, çardeh berxên nêr ên yeksalî û bêqisûr,

²⁷ li gorî rêbaz û hejmarên wan, ji bo conega, beran û berxan pêşkêşiyên wan ên dexlê û rijandinê

²⁸ û ji xeynî qurbana şewitandinê ya rojane, pêşkêşiya wê ya dexlê û pêşkêşiya wê ya rijandinê, wekî pêşkêşiya paqijiyê nêriyek.

²⁹ “‘Di roja şeşan de hûnê van pêşkêş bikin: Heşt conega, du beran, çardeh berxên nêr ên yeksalî û bêqisûr,

³⁰ li gorî rêbaz û hejmarên wan, ji bo conega, beran û berxan pêşkêşiyên wan ên dexlê û rijandinê

³¹ û ji xeynî qurbana şewitandinê ya rojane, pêşkêşiya wê ya dexlê û pêşkêşiya wê ya rijandinê, wekî pêşkêşiya paqijiyê nêriyek.

³² “‘Di roja heftan de hûnê van pêşkêş bikin: Heft conega, du beran, çardeh berxên nêr ên yeksalî û bêqisûr,

³³ li gorî rêbaz û hejmarên wan, ji bo conega, beran û berxan pêşkêşiyên wan ên dexlê û rijandinê

³⁴ û ji xeynî qurbana şewitandinê ya rojane, pêşkêşiya wê ya dexlê û pêşkêşiya wê ya rijandinê, wekî pêşkêşiya paqijiyê nêriyek.

³⁵ “‘Di roja heştan de hûnê civîneke mezin çêkin û karên xwe yên rojane nekin.

³⁶ Hûnê van pêşkêş bikin: Wekî qurbana şewitandinê ya ku bêhna wê bi Xudan xweş tê, conegayek, beranek, heft berxên nêr ên yeksalî û bêqisûr,

³⁷ li gorî rêbaz û hejmarên wan, ji bo conega, beran û berxan pêşkêşiyên wan ên dexlê û rijandinê

³⁸ û ji xeynî qurbana şewitandinê ya rojane, pêşkêşiya wê ya dexlê û rijandinê, wekî pêşkêşiya paqijiyê nêriyek.

³⁹ “‘Di cejnên xwe de, ji xeynî pêşkêşiyên we yên sozdanê û dilxwaziyê, hûnê wan wekî qurbanên şewitandinê û pêşkêşiyên dexlê, rijandinê û aştiyê pêşkêşî Xudan bikin.’”

⁴⁰ Bi vî awayî Mûsa ji gelê Îsraêl re li gorî her tiştê ku Xudan lê emir kiriye, got.