Hejmartin 28 - Kurmanji Încîl

Pêşkêşiyên Rojane

¹ Xudan ji Mûsa re got:

² “Li gelê Îsraêl emir bike û bêje: ‘Haya we jê hebe ku hûnê di demên kifşkirî de xwarina pêşkêşiyên şewitandinê pêşkêşî min bikin ku bêhna wan bi min xweş tê.’

³ Tê ji wan re bibêjî: ‘Pêşkêşiya şewitandinê ya ku hûnê pêşkêşî Xudan bikin ev e: Ji bo qurbana şewitandinê ya rojane, hûnê her roj du berxên nêr ên yeksalî û bêqisûr pêşkêş bikin.

⁴ Hûnê berxekî serê sibê, yê din jî ber êvarê pêşkêş bikin.

⁵ Hûnê pê re jî wekî pêşkêşiya dexlê, dehyeka efaya arvanê hûr ê ku bi çarîka hîneke zeytê hatiye hevîrkirin pêşkêş bikin.

⁶ Ev qurbana şewitandinê ya rojane ye ku li Çiyayê Sînayê hatiye danîn ku wê bêhna wê bi Xudan xweş bê. Ev pêşkêşiya şewitandinê ya Xudan e.

⁷ Herwiha bi berx re wekî pêşkêşiya rijandinê, wê çaryeka hîneke şerabê jî bê pêşkêşkirin. Hûnê pêşkêşiya rijandinê ji Xudan re li Pîrozgehê pêşkêş bikin.

⁸ Çawa ku we serê sibê kiriye, hûnê berxê din ber êvarê jî bi pêşkêşiya dexlê û pêşkêşiya rijandinê pêşkêş bikin. Hûnê wekî pêşkêşiya şewitandinê pêşkêş bikin ku bêhna wê bi Xudan xweş be.’”

Pêşkêşiyên Roja Septê

⁹ Roja Septê hûnê du berxên nêr ên yeksalî û bêqisûr û wekî pêşkêşiya dexlê, ji dehan duduyê efaya arvanê hûr ê ku bi zeytê hatiye hevîrkirin û pêşkêşiya rijandinê pêşkêş bikin.

¹⁰ Ji xeynî qurbana şewitandinê û pêşkêşiya rijandinê ya rojane, qurbana şewitandinê ya Roja Septê ev e.

Pêşkêşiyên Mehane

¹¹ Di serê her heyva nû de hûnê wekî qurbana şewitandinê ya Xudan du conega, beranek û heft berxên nêr ên yeksalî û bêqisûr pêşkêş bikin.

¹² Herwiha hûnê bi her conegayekî re wekî pêşkêşiya dexlê ji dehan sisêyê efaya arvanê hûr ê ku bi zeytê hatiye hevîrkirin û bi berên re ji dehan duduyê efaya arvanê hûr ê ku bi zeytê hatiye hevîrkirin

¹³ û bi her berxî re wekî pêşkêşiya dexlê dehyeka efaya arvanê hûr ê ku bi zeytê hatiye hevîrkirin pêşkêş bikin. Ev qurbana şewitandinê ye ku bêhna wê xweş e. Ev pêşkêşiya şewitandinê ya Xudan e.

¹⁴ Hûnê wekî pêşkêşiya rijandinê bi her conegayekî re nîv hîn, bi berên re sêyeka hînekê û bi her berxî re çarîka hîneke şerabê pêşkêş bikin. Ji bo tevahiya salekê qurbana şewitandinê ya her mehê ev e.

¹⁵ Ji xeynî qurbana şewitandinê ya rojane û pêşkêşiya wê ya rijandinê, hûnê wekî pêşkêşiya paqijiyê nêriyekî pêşkêşî Xudan bikin.

Pêşkêşiyên Cejna Derbasbûnê

¹⁶ Roja çardehê meha pêşî, Cejna Derbasbûnê ya Xudan e.

¹⁷ Roja panzdehan a vê mehê wê cejn be û heft rojan nanê şikeva bê xwarin.

¹⁸ Di roja pêşî de hûnê civîneke pîroz çêkin û karên xwe yên rojane nekin.

¹⁹ Hûnê ji Xudan re wekî qurbana şewitandinê du conega, beranek û heft berxên nêr ên yeksalî pêşkêş bikin. Divê ew bêqisûr bin.

²⁰ Pêşkêşiya wan a dexlê ji arvanê hûr ê ku bi zeytê hatiye hevîrkirin wê wiha be: Bi conegayekî re ji dehan sisêyê efayê, bi berên re ji dehan duyê efayê,

²¹ ji bo heft berxan, bi her berxî re dehyeka efayê

²² û wekî pêşkêşiya paqijiyê nêriyekî ku di ber gunehên we de bibe kefaret bê dayîn.

²³ Ji xeynî qurbana şewitandinê ya serê sibê ku pêşkêşiya rojane ye, hûnê van jî pêşkêş bikin.

²⁴ Bi vî awayî hûnê her roj, xwarina pêşkêşiya şewitandinê ya ku bêhna wê bi Xudan xweş tê, heft rojan pêşkêş bikin. Ji xeynî wan jî hûnê qurbana şewitandinê ya rojane û pêşkêşiya wê ya rijandinê pêşkêş bikin.

²⁵ Hûnê roja heftan jî civîna pîroz bikin û karên xwe yên rojane nekin.

Pêşkêşiyên Cejna Hefteyan

²⁶ Di roja berê pêşî de, gava we pêşkêşiya dexlê nû di Cejna Hefteyan de pêşkêşî Xudan kir, hûnê civîna pîroz bikin û karên xwe yên rojane nekin.

²⁷ Lê hûnê wekî qurbana şewitandinê du conega, beranek, heft berxên nêr ên yeksalî pêşkêş bikin ku bêhna wê bi Xudan xweş bê.

²⁸ Pêşkêşiya wan a dexlê, ji arvanê hûr ê ku bi zeytê hatiye hevîrkirin wê wiha be: Bi conegayekî re ji dehan sisêyê efayê, bi berên re ji dehan duduyê efayê,

²⁹ ji bo heft berxan, bi her berxî re dehyeka efayê

³⁰ û wekî pêşkêşiya paqijiyê nêriyekî ku di ber gunehên we de bibe kefaret.

³¹ Ji xeynî qurbana şewitandinê ya rojane û pêşkêşiya wê ya dexlê, hûnê van û pêşkêşiya wan a rijandinê jî pêşkêş bikin. Divê ew bêqisûr bin.