Hejmartin 25 - Kurmanji Încîl

Gunehê li Peorê

¹ Gava gelê Îsraêl li Şîttîmê dima, hinek mêrên wan bi keçên Moaviyan re zina kirin.

² Çaxê van jinan, qurban pêşkêşî îlahên xwe kir, wan gazî wan Îsraêliyan kir. Wan jî xwarina Moaviyan xwar û li ber îlahên wan çûn ser çokan.

³ Bi vî awayî gelê Îsraêl xwe bi Baal-Peor ve girê da û hêrsa Xudan li dijî gel rabû.

⁴ Xudan ji Mûsa re got: “Hemû serekên gel hilde û wan nava rojê li ber min daleqîne ku hêrsa min a dijwar ji gelê Îsraêl bizivire.”

⁵ Li ser vê yekê Mûsa ji dadgerên gelê Îsraêl re got: “Her yekî ji we, mêrên ku xwe bi Baal-Peor ve girê dane bikujin.”

⁶ Di vê navberê de Îsraêliyek hat ku jineke Mîdyanî li ber çavê Mûsa û tevahiya civaka Îsraêl ji birayekî xwe re anî. Ew li ber deriyê Konê Hevdîtinê digiriyan.

⁷ Gava Pînehasê kurê Êlezarê kurê Harûnê Kahin ev yek dît, ji nav civatê rabû û rimek da destê xwe.

⁸ Wî da pey wî Îsraêlî, ket hundirê kon û bi rima destê xwe li zikê wî û jinikê xist. Bi vî awayî kula bi ser gelê Îsraêl de hat, sekinî.

⁹ Kesên ji ber vê kulê mirin 24.000 kes bûn.

¹⁰ Xudan ji Mûsa re got:

¹¹ “Pînehasê kurê Êlezarê kurê Harûnê Kahin kir ku xezeba min ji ser gelê Îsraêl vegere. Wî ji bo xatirê min xîretkêşiyeke wisa nîşan da ku ez bi xîretkêşiya xwe dawiya gelê Îsraêl neyînim.

¹² Loma jê re bêje: ‘Va ye ezê peymana xwe ya aştiyê bidim wî.

¹³ Wê ji wî û ziriyeta wî re bibe peymana herheyî ya kahintiyê. Çimkî ew ji Xwedayê xwe re xîretkêş bû û ji bo gelê Îsraêl kefaret da.’”

¹⁴ Navê Îsraêliyê ku bi jinika Mîdyanî re hat kuştin Zîmriyê kurê Salû bû. Ew serekekî malbatên Şimûniyan bû.

¹⁵ Navê jinika Mîdyanî ya ku hat kuştin, Kozbiya keça Sûrê serekê eşîrekê bû. Ew mîrê malbatên Mîdyaniyan bû.

¹⁶ Xudan ji Mûsa re got:

¹⁷ “Tu dijminatiya Mîdyaniyan bike û êrîşî wan bike.

¹⁸ Çimkî wan di meseleya Peor de û piştre jî di meseleya kuştina Kozbiya keça serekê Mîdyanî de, li we hîlekarî û dijminatî kirin ku di roja kulê ya ji ber sedema Peor derket de hat kuştin.”