Hejmartin 24 - Kurmanji Încîl

¹ Çaxê Balam dît ku pîrozkirina gelê Îsraêl di çavê Xudan de qenc e, wekî carên din li pey falan neket û berê xwe da beriyê.

² Balam serê xwe rakir û dît ku gelê Îsraêl li gorî eşîrên xwe rûniştine. Gava dît ku Ruhê Xwedê hat ser wî,

³ rabû meseleya xwe got: “Gotina Balamê kurê Beor, Gotina zilamê çavê wî vebûye,

⁴ Gotina kesê ku peyvên Xwedê bihîstine Û dîtiniya Karîndar dîtiye, Gotina kesê ku ketiye erdê, Lê Xwedê çavên wî vekirine, ev e:

⁵ ‘Aqûbo, konên te, Îsraêlo, malên te çiqas xweşik in!

⁶ Wekî geliyan dirêj bûne, Wekî bexçeyên ber çeman, Wekî darên ûdê ku Xudan danîne, Wekî darên sedrê yên li ber avan.

⁷ Wê ji satilên wî av biherike, Tovê wî bi ava zêde bê avdan. Wê padîşahê wî ji Agag bilindtir be Û padîşahiya wî bê berzkirin.

⁸ Xwedayê ku ew ji Misrê deranîn, Bi qasî qiloçên gakoviyan hêzdar e. Wê miletên jê re dijmin in daqurtîne Û hestiyên wan bişikêne. Bi tîrê xwe wan qul bike.

⁹ Ew mexel dibe, wekî şêrekî razayî, Wekî şêremê, kî dikare wan rake? Kesê te pîroz dike, bila pîroz be, Kesê naletê li te tîne, bila naletî be.’”

¹⁰ Wî çaxî Balaq li Balam hêrs bû. Wî destên xwe li hev xistin û ji Balam re got: “Ji bo tu naletê li dijminên min bînî min gazî te kir, lê ev sê car in tu wan pîroz dikî.

¹¹ Niha derkeve here mala xwe! Min gotibû ezê te xelat bikim. Lê Xudan tu bêxelat hiştî.”

¹² Balam ji Balaq re got: “Ma min ji qasidên te şandin ba min re negot:

¹³ ‘Heke Balaq qesra xwe tije zêr û zîv bike û bide min jî, ez nikarim ji gotina Xudan derkevim ku ji ber xwe nikarim qencî yan xerabiyê bikim. Xudan çi bêje ezê wê bêjim’?

¹⁴ Va ye ez diçim nav gelê xwe. De tu were ez ji te re bêjim ka wê ev gel di rojên pêş de çi bîne serê gelê te.”

Gotina çaran a Balamê kurê Beor

¹⁵ Paşê Balam dest bi vê meseleya xwe kir û got: “Gotina Balamê kurê Beor, Gotina zilamê çavê wî vebûye,

¹⁶ Gotina kesê ku gotinên Xwedê bihîstine, Dîtiniya Karîndar dîtiye Û haya wî ji Yê Herî Berz heye, Gotina kesê ku ketiye erdê, Lê Xwedê çavên wî vekirine, ev e:

¹⁷ ‘Ez wî dibînim, lê ne niha. Ez lê dinêrim, lê ne nêzîk. Wê ji nav Aqûb stêrek derkeve, Wê ji nav Îsraêl serwerek rabe. Wê eniya Moaviyan, Wê serê ziriyeta Şêtiyan biperçiqîne.

¹⁸ Edoma ku jê re dijmin e, wê bibe milkê wî, Wê Seîr bê standin. Lê wê Îsraêl mezin bibe.

¹⁹ Wê yekî ji ziriyeta Aqûb serwerî bike Û dawiya wan kesan bîne ku li bajêr sax mane.’”

Gotina dawî ya Balamê kurê Beor

²⁰ Gava Balam Emalêqî dîtin, dest bi mesela xwe kir û got: “Emalêqî di nav miletan de yekem e, Lê wê di dawiyê de tune bibe.”

²¹ Wî Qênî dîtin, dest bi mesela xwe kir û got: “Warê we hêzdar e, Hêlîna we di zinêr de hatiye avakirin.

²² Gava Aşûrî we dîl bigirin, Hûnê bişewitin û biqedin.”

²³ Wî mesela xwe domand û got: “Ax, gava Xwedê vê yekê bike, Wê kî bijî?

²⁴ Wê ji keviyên Kîttîmê gemî werin, Wê Aşûrê nizim bikin, Wê Êverê nizim bikin Wê ew bi xwe jî tune bibin.”

²⁵ Piştre Balam rabû çû cihê xwe. Balaq jî bi riya xwe ve çû.