Hejmartin 23 - Kurmanji Încîl

Gotina yekemîn a Balamê kurê Beor

¹ Balam ji Balaq re got: “Tu li vir ji min re heft gorîgehan çêke. Heft conega û heft beranan jî amade bike.”

² Çawa ku Balam got, Balaq kir. Balaq û Balam li ser her gorîgehê conega û beranekî pêşkêş kirin.

³ Balam ji Balaq re got: “Tu li ba qurbana şewitandinê bisekine, ezê hinekî herim pêş. Belkî Xudan li min xuya bibe û ew her çi ji min re bêje, ezê ji te re bêjim.” Piştre ew derket ser girekî tazî.

⁴ Xwedê li Balam xuya bû. Balam jê re got: “Min heft gorîgeh amade kirin û li ser her yekê conega û beranekî pêşkêş kirin.”

⁵ Xudan gotinek xist devê wî û got: “Vegere ba Balaq û jê re wiha bêje.”

⁶ Balam vegeriya ba Balaq. Ew bi hemû serekên Moavê re li ber qurbana şewitandinê disekinî.

⁷ Wî ev mesele got: “Balaq ez ji Aramê, Padîşahê Moavê ez ji çiyayên rojhilat anîm. Wî got: ‘Were ji bo min naletê li ziriyeta Aqûb bîne. Were li gelê Îsraêl nifiran bike.’

⁸ Xwedê naletê li wan neaniye, Ez çawa li wan bînim? Kesên Xudan nifir li wan nekirine, Ez çawa li wan bikim?

⁹ Ez ji ser zinaran, wan dibînim, Ji ser giran li wan dinêrim. Ew miletekî ku bi tena serê xwe dijî Û xwe di nav miletan de nahesibîne.

¹⁰ Kî dikare toza ziriyeta Aqûb Û çarîka gelê Îsraêl bijmêre? Bila ez bi rastan re bimirim Û dawiya min wekî dawiya wan be!”

¹¹ Balaq ji Balam re got: “Te çi bi min kir? Min tu anî ku tu naletê li dijminên min bînî, lê tu hatî û te ew pîroz kirin.”

¹² Balam lê vegerand û got: “Divê ez bi baldarî ya ku Xudan xistiye devê mirov bêjim, ne wisa?”

Gotina duyemîn a Balamê kurê Beor

¹³ Balaq jê re got: “Lava dikim bi min re were dereke din, tê ji wir wan bibînî. Tê tenê beşekî wan bibînî, tê wan hemûyan nebînî. Li wir ji bo min naletê li wan bîne.”

¹⁴ Balaq Balam bir Deşta Sofîmê a li Girê Pîsgayê. Wî li wir heft gorîgeh çêkirin û li her gorîgehê conega û beranekî pêşkêş kirin.

¹⁵ Balam ji Balaq re got: “Tu li ba qurbana şewitandinê bisekine, ezê li benda wî bim.”

¹⁶ Xudan li Balam xuya bû, gotin xist devê wî û got: “Vegere ba Balaq û wiha bêje.”

¹⁷ Ew hat ba Balaq. Ew bi hemû serekên Moavê re li ba qurbana şewitandinê disekinî. Balaq jê re got: “Xudan çi got?”

¹⁸ Balam ev mesele got: “Ya Balaq, rabe ser xwe û guhdarî bike! Ya kurê Sîppor, tu guh bide min!

¹⁹ Xwedê ne mirov e Ku derewan bike. Ew ne ji kurê mirovan e Ku fikra xwe biguherîne. Ma ew dibêje û nake? Yan jî soz dide û nake?

²⁰ Wî emir kir ku ez pîroz bikim, Wî pîroz kir, ez nikarim biguherînim.

²¹ Ew li ser ziriyeta Aqûb felaketekê nabîne, Neheqiyek jî bi ser gelê Îsraêl ve nayê. Xwedayê wan Xudan bi wan re ye, Ew Padîşahê di nav wan de ye.

²² Xwedayê ku ew ji Misrê deranîn, Bi qasî qiloçên gakoviyan hêzdar e.

²³ Sêrbazî li dijî ziriyeta Aqûb vala ye Û falbazî bandorê li gelê Îsraêl nake. Niha wê ji bo Aqûb û Îsraêl bibêjin: ‘Xwedê ji bo wan çiqas qencî kir!’

²⁴ Va ye gel, wekî şêremê hişyar dibe, Wekî şêrekî ji cihê xwe radibe. Heta ew nêçîra xwe nexwe Û xwîna kuştiyan venexwe ranaze.”

²⁵ Balaq ji Balam re got: “Nexwe ne naletê li wan bîne, ne jî wan pîroz bike.”

²⁶ Lê Balam got: “Min ji te re negot, Xudan çi bêje divê ez wê bikim?”

Gotina sêyemîn a Balamê kurê Beor

²⁷ Balaq ji Balam re got: “Ez lava dikim, were ez te bibim dereke din. Belkî di çavê Xwedê de xweş be û dibe ku tu li wir ji bo min naletê li wan bînî.”

²⁸ Balaq, Balam bir ser Girê Peora pêşberî deştê.

²⁹ Balam, ji Balaq re got: “Tu li vir ji bo min heft gorîgeh çêke, heft conega û heft beran jî amade bike.”

³⁰ Çawa ku Balam jê re got, Balaq wisa kir. Wî li ser her gorîgehê conega û beranekî pêşkêş kirin.