Hejmartin 16 - Kurmanji Încîl

Serhildana Qorax, Datan û Avîramê Serek

¹ Qoraxê kurê Yîsharê kurê Qohatê kurê Lêwî, Datan û Avîramê kurên Êliyav, ji ziriyeta Rûbên û Onê kurê Pelet,

² bi du sed û pêncî serekên Îsraêlî yên navdar û ji aliyê civakê ve hatine hilbijartin re li dijî Mûsa serî hilda.

³ Hemû bi hev re çûn ba Mûsa û Harûn û got: “Êdî bes e, tevahiya civakê û her kesê wê pîroz e û Xudan di nav wan de ye. Êdî çima hûn xwe di ser civaka Xudan re dibînin?”

⁴ Gava Mûsa ev yek bihîst deverû çû erdê.

⁵ Wî ji Qorax û hemû alîgirên wî re got: “Wê serê sibê Xudan kifş bike ka kî yê wî ye û kî pîroz e û wê wî nêzîkî xwe bike. Wê Xudan kesê hilbijartiye derxe hizûra xwe.

⁶ Ya Qorax û hemû alîgirên wî! Vê yekê jî bikin! Ji bo xwe bixûrdankan hildin.

⁷ Sibê êgir bixin wan û bixûrê deynin ser. Ew kesê wê Xudan hilbijêre, wê pîroz be. Lêwiyîno! We ji xwe zêde kir!”

⁸ Îcar Mûsa ji Qorax re got: “Lêwiyîno, guhdar bin!

⁹ Xwedayê Îsraêl, ji nav civaka Îsraêl ji bo ku we nêzîkî xwe bike, xizmeta Meskenê Xudan bi we bide kirin, ji bo xizmeta civakê û sekna li ber hizûra wan, hûn veqetandin. Ma ev têra we nake?

¹⁰ Wî tu û hemû birayên te yên Lêwiyî nêzîkî xwe kirin. Hûn daxwaza kahintiyê jî dikin?!

¹¹ Ya Qorax! Hûn gilî û gazinên xwe li Harûn dikin. Lê civîn û kombûna we li dijî Xudan e!”

¹² Mûsa şand pey Datan û Avîramê kurên Êliyav. Lê wan got: “Em nayên!

¹³ Ji bo ku tu me li beriyê bikujî, te em ji welatê ku şîr û hingiv jê diherikî deranîn. Ev kêm bû tu niha dixwazî xwe li ser serê me bikî serek jî!

¹⁴ Tevî ku te em nebirin welatê ku şîr û hingiv jê diherike, te rez û zevî jî wekî mîras nedan me. Ma ji te kirî ev zilam kor in? Na, em nayên.”

¹⁵ Mûsayê ku pir hêrs bû ji Xudan re got: “Pêşkêşiyên wan qebûl neke! Min ji wan kerekî jî nestand û neheqiyê li yekî ji wan jî nekir.”

¹⁶ Piştre Mûsa ji Qorax re got: “Tu û hemû alîgirên xwe, tu jî ew jî sibê werin hizûra Xudan. Bila Harûn jî were.

¹⁷ Bila herkes ji we bixûrdanka xwe hilde û bixûrê deyne ser. Bila her yekî ji we bixûrdanka xwe hilde û du sed û pêncî bixûrdankan bînin hizûra Xudan. Tu û Harûn jî bixûrdankên xwe bînin.”

¹⁸ Îcar her yekî bixûrdanka xwe rakir, agir danî ser û bixûr danî ser êgir. Mûsa û Harûn bi hev re li ber deriyê Konê Hevdîtinê sekinîn.

¹⁹ Qorax tevahiya civakê li dijî Mûsa û Harûn, li ber deriyê Konê Hevdîtinê civand. Rûmeta Xudan li tevahiya civakê xuya bû.

²⁰ Xudan ji Mûsa û Harûn re got:

²¹ “Ji vê civakê dûr bin ku ez hemûyan yekser tune bikim.”

²² Mûsa û Harûn deverû çûn erdê û wan got: “Ya Xwedê, Xwedayê ruhên hemû beşerê, gava kesek guneh dike, tu li tevahiya civakê hêrs dibî?”

²³ Xudan ji Mûsa re got:

²⁴ “Ji civakê re bibêje, bila xwe ji konên Qorax, Datan û Avîram dûr bixe.”

²⁵ Mûsa rabû, çû ba Datan û Avîram. Rîspiyên gelê Îsraêl pê re çûn.

²⁶ Wî ji civakê re got: “Ez lavayî we dikim, ji bo ku hûn bi hemû gunehên wan re tune nebin, xwe ji dora konên van zilamên xerab dûr bixin. Destê xwe nedin tiştekî wan.”

²⁷ Wan xwe ji konên Qorax, Datan û Avîram dûr kir. Datan û Avîram rabûn bi hemû jin û zarokên xwe yên hûr û gir re li ber konan sekinîn.

²⁸ Mûsa got: “Hûnê ji vê yekê fêm bikin ku ji bo van karan bikim, Xudan ez şandime û ez tu tiştî ji ber xwe ve nakim:

²⁹ Heke ev zilam wekî her kesî bimirin û rastî bûyerekê werin ku tê serê her kesî, wî çaxî bizanibin ku Xudan ez neşandime.

³⁰ Lê heke Xudan tiştekî nû çêke ku erd devê xwe veke, wan û her tiştê wan daqurtîne û bi saxî bikevin diyarê miriyan, wî çaxî hûnê fêm bikin ku wan Xudan kêm dît.”

³¹ Çawa ku Mûsa gotina xwe temam kir, axa bin wan qelişî.

³² Erd qelişî, ew û maliyên xwe, hemû zilamên Qorax û tevahiya mal û milkê wan daqurtandin.

³³ Ew û hemû tiştên wan bi saxî ketin diyarê miriyan. Erdê, ew nixamtin û di nav civakê de tune bûn.

³⁴ Tevahiya gelê Îsraêl ê li derdorê ji ber qîrîna wan reviya û got: “Bila erd me jî danequrtîne.”

³⁵ Agir ji ber Xudan derket û du sed û pêncî kesên ku bixûr pêşkêş dikirin daqurtandin.

³⁶ Xudan ji Mûsa re got:

³⁷ “Ji Êlezarê kurê Harûnê Kahin re bêje, bila bixûrdankan ji nav êgir derxe û tu jî pizotên êgir belav bike. Çimkî tepsik pîroz in.

³⁸ Ji bo wan kesên ku guneh kirine, ev bixûrdank êdî pîroz in. Wan bikutin û ji bo gorîgehê bikin lewheyên nixamtinê. Ji ber ku tepsik li ber Xudan hatine pêşkêşkirin, pîroz in. Bila ev ji bo gelê Îsraêl bibin nîşan.”

³⁹ Êlezarê Kahin bixûrdankên tûnc ên ku mirovên şewitandî pêşkêş kiribûn hildan û ji bo gorîgehê wekî lewheyên nixamtinê kutan.

⁴⁰ Çawa ku Xudan bi riya Mûsa gotiye, ev yek ji bo gelê Îsraêl bû bîranîneke ku kesekî ne ji ziriyeta Harûn e nêzîk nebe û li ber Xudan bixûrê pênexe û ya ku hatiye serê Qorax û alîgirên wî neyê serê wî jî.

⁴¹ Dotira rojê tevahiya civaka Îsraêl li dijî Mûsa û Harûn gilî û gazinên xwe kir. Wan got: “We gelê Xudan kuşt.”

⁴² Gava civak li dijî Mûsa û Harûn civiya, wan berê xwe da Konê Hevdîtinê. Ewr kon nixamt û rûmeta Xudan xuya bû.

⁴³ Mûsa û Harûn hatin ber Konê Hevdîtinê.

⁴⁴ Xudan ji Mûsa re got:

⁴⁵ “Ji nav vê civakê xwe dûr bixin. Ezê wan yekser tune bikim.” Ew deverû çûn erdê.

⁴⁶ Mûsa ji Harûn re got: “Bixûrdanka xwe rake û ji ser gorîgehê agir deyne ser û bixûrê jî deyne ser wî. Zûka bibe ba civakê û ji bo wan kefaretê bide. Çimkî xezeb ji ber Xudan derket û kulê destpê kir.”

⁴⁷ Bi awayê ku Mûsa got, Harûn tepsik rakir û danî nav civakê. Kul êdî ketibû nav gel. Harûn bixûr wekî kefareta gel pêşkêş kir.

⁴⁸ Gava Harûn di navbera mirî û zindiyan de sekinî kul nema.

⁴⁹ Ji bilî kesên di mesela Qorax de mirin, hejmara kesên ji ber kulê mirin 14.700 kes bû.

⁵⁰ Piştre gava kul nema, Harûn vegeriya ber deriyê Konê Hevdîtinê ba Mûsa.