Hejmartin 15 - Kurmanji Încîl

Rê û rêbazên pêşkêşiyan

¹ Xudan ji Mûsa re got:

² “Bi gelê Îsraêl re bipeyive û ji wan re bêje: ‘Gava hûn ketin wî welatê ez didim we û hûnê lê rûnin

³ û ji pêz an dewêr pêşkêşiya şewitandinê bikin ku bêhna wê bi Xudan xweş tê –dixwazî qurbana şewitandinê, dixwazî qurbaneke din a ku ji bo sozekê pêk bîne, wekî pêşkêşiya dilxwaziyê, yan jî, ji bo cejneke kifşkirî–

⁴ wê kesê ku wê pêşkêşiyê tîne ji bo Xudan wekî pêşkêşiya dexlê, dehyeka efaya arvanê hûr ê ku bi rûnê bi qasî çarîka hîn e hatiye hevîrkirin jî pêşkêş bike.

⁵ Herwiha bi qurbana şewitandinê yan qurbana din re, wê ji bo her berxekî, çarîka hîneke şerabê wekî pêşkêşiya rijandinê pêşkêş bikî.

⁶ “‘Di pêşkêşkirina beranekî de, wekî pêşkêşiya dexlê, tê ji arvanê hûr ê ku ji dehan duduyê efayekê ye û ji sisêyan yekê hîneke zeytê hatiye hevîrkirin pêşkêş bikî.

⁷ Tê wekî pêşkêşiya rijandinê, ji sisêyan yekê hîneke şerabê pêşkêş bikî ku bêhna wê bi Xudan xweş tê.

⁸ Gava tu ji Xudan re qurbana şewitandinê yan qurbaneke din pêşkêş bikî ku sozekê pêk bîne yan wekî qurbana aştiyê,

⁹ tê bi conega re wekî pêşkêşiyeke dexlê, ji dehan sisêya efayeke arvanê hûr ê ku bi nîv hîna zeytê hatiye hevîrkirin pêşkêş bikî.

¹⁰ Wekî pêşkêşiya rijandinê nîv hîn şerabê pêşkêş bike. Wê ev pêşkêşiya şewitandinê be ku bêhna wê bi Xudan xweş tê.

¹¹ Her conega, beran, berx û karik wê wiha bê amadekirin.

¹² Li gorî hejmara tu amade dikî, çend heywan bin, tê ji bo her yekê wiha bikî.

¹³ “‘Her Îsraêlî yê welatî, gava pêşkêşiya şewitandinê pêşkêş bike, wê van tiştan bike ku bêhna wê bi Xudan xweş be.

¹⁴ Gava xerîbekî mêvan an xerîbekî ku di nav we de dimîne dixwaze pêşkêşiya şewitandinê pêşkêş bike, wê çawa ku hûn bikin, wisa jî bike ku bêhna wê bi Xudan xweş be.

¹⁵ Wê ev yek ji bo tevahiya civakê, ji bo we û xerîbên di nav we de, di nav nifşên we de qanûneke herheyî be. Li hizûra Xudan hûn çawa bin, wê xerîbên di nav we de jî wisa bin.

¹⁶ Wê ji bo we û xerîbên di nav we de ne, şerîet yek be û rêbaz yek be.’”

¹⁷ Xudan ji Mûsa re got:

¹⁸ “Bi gelê Îsraêl re bipeyive û ji wan re bêje: ‘Gava hûn ketin welatê ku ez we dibimê,

¹⁹ çaxê we ji genimê wî welatî nan xwar, hûnê hinekî jê wekî diyarî pêşkêşî min bikin.

²⁰ “‘Herwiha hûnê ji hevîrê xwe yê pêşî wekî diyarî kilorekî pêşkêşî min bikin. Hûnê vê wekî pêşkêşiyeke ji bêndera xwe pêşkêşî min bikin.

²¹ Hûnê di nav nifşên we de ji hevîrê xwe yê pêşî wekî diyarî pêşkêşî Xudan bikin.

²² “‘Heke hûn bi nezanî tiştên ku Xudan bi destê Mûsa li we emir kirine, ya ku Xudan ji Mûsa re gotiye,

²³ ji roja ku Xudan emir kiriye û vir ve, di nav nifşên we de hûn van emrên ku we bi riya Mûsa standin pêk neyînin,

²⁴ heke bi şaşî, bêyî ku civak pê bizane gunehek hebe, wê tevahiya civakê, wekî qurbana şewitandina ku bêhna wê bi Xudan xweş tê, conegayek, li gorî rê û rêbazan bi pêşkêşiya dexlê û pêşkêşiya rijandinê re, wekî pêşkêşiya paqijiyê nêriyek bê pêşkêşkirin.

²⁵ Wê kahin ji bo tevahiya civaka Îsraêl kefaretê bide û wê bên bexişandin. Çimkî wan bi şaşî guneh kiribû. Ji ber gunehê wan, wan pêşkêşiyên paqijî û şewitandinê pêşkêşî Xudan kirin.

²⁶ Wî çaxî wê tevahiya civaka Îsraêl û xerîbên di nav wan de dijîn bên bexişandin. Çimkî ev şaşîtiya tevahiya civakê bû.

²⁷ “‘Heke kesek bi nezanî guneh bike, wê wekî pêşkêşiya paqijiyê, bizineke yeksalî pêşkêş bike.

²⁸ Heke kesek li hizûra Xudan bi şaşî guneh bike, wê kahin ji bo kesê ku bi nezanî guneh kiriye kefaretê bide û wê bê bexişandin.

²⁹ Di nav gelê Îsraêl de dixwazî welatî, dixwazî jî xerîbên di nav wan de ne, ji bo kesê bi şaşîtî tiştek kiriye şerîet ev e.

³⁰ “‘Dixwazî welatî, dixwazî xerîb be, kesê bi zanîn guneh kiriye û çêrê Xudan kiriye wê ji nav gel bê avêtin.

³¹ Ji ber ku wî gotina Xudan kêm dîtiye û emrê wî şikandiye, wê esse bê avêtin. Ew sûcdar e.’”

Cezayê negirtina Roja Septê

³² Gava gelê Îsraêl li beriyê bû, wan yekî ji xwe dît ku di Roja Septê de êzing dida hev.

³³ Gava dar dida hev, hinekan ew dît û wan ew anî ba Mûsa, Harûn û tevahiya civakê.

³⁴ Wan ew avêt girtîgehê, çimkî hê ne kifş bû wê çi pê bikin.

³⁵ Xudan ji Mûsa re got: “Wê ew mirov esse bê kuştin. Wê tevahiya civakê, li derveyî artêşgehê wî bide ber keviran.”

³⁶ Tevahiya civakê ew derxist derveyî artêşgehê û çawa ku Xudan li Mûsa emir kiriye, ew da ber keviran û kuşt.

Rêbazên li ser rîşiyan

³⁷ Xudan ji Mûsa re got:

³⁸ “Bi gelê Îsraêl re bipeyive û ji wan re bêje: ‘Bila di dema hemû nifşên xwe de, rîşiyan bi kujên cilên xwe ve berdin. Bila şehbenekî şînê tarî deynin ser rîşiya her kujê.

³⁹ Bi vî awayî hûnê wan bibînin û hemû emrên Xudan bi bîr bînin. Hûnê wan bigirin ku nedin pey dil û çavên xwe yên ku zinayê dikin. Wê ev rîşî ji bo vê yekê hebin.

⁴⁰ Loma hemû emrên min pêk bînin û ji bo Xwedayê xwe pîroz bin.

⁴¹ Ez im Xwedayê we Xudan ku min hûn ji welatê Misrê deranîn. Xwedayê we Xudan ez im.’”