Hejmartin 13 - Kurmanji Încîl

Lêkolîna welatê Kenanê

¹ Xudan ji Mûsa re got:

² “Hinek kesan bişîne, bila lêkolîna welatê Kenanê bikin ku ez didim gelê Îsraêl. Ji her eşîreke bav û kalên xwe serekekî bişîne.”

³ Li ser fermana devê Xudan, Mûsa ji Beriya Paranê ew şandin. Hemû ji serekên gelê Îsraêl bûn.

⁴ Navên wan ev bûn: Ji eşîra Rûbên Şammûayê kurê Zakkûr,

⁵ ji eşîra Şimûn Şafatê kurê Horî,

⁶ ji eşîra Cihûda Kalêvê kurê Yefûnne,

⁷ ji eşîra Îssexar Yîgalê kurê Ûsiv,

⁸ ji eşîra Efrayîm Hoşêyayê kurê Nûn,

⁹ ji eşîra Binyamîn Paltiyê kurê Rafû,

¹⁰ ji eşîra Zevûlon Gaddiyêlê kurê Sodî,

¹¹ ji eşîra Ûsiv –ji eşîra Minaşşe– Gaddiyê kurê Sûsî,

¹² ji eşîra Dan Emmiyêlê kurê Gemallî,

¹³ ji eşîra Aşêr Setûrê kurê Mîxayîl,

¹⁴ ji eşîra Neftelî Nahbiyê kurê Wofsî

¹⁵ û ji eşîra Gad Geûêlê kurê Maxî.

¹⁶ Kesên ku Mûsa ji bo lêkolîna welêt şandibûn ev bûn. Mûsa navê Hoşêyayê kurê Nûn guhert û kir Yêşû.

¹⁷ Gava Mûsa ew şandin ku lêkolîna welatê Kenanê bikin, wî ji wan re got: “Herin Negevê. Herin herêma çiyayî

¹⁸ û hîn bibin ka welat çawa ye. Mirovên wir qels in an hêzdar in, gelek in an hindik in?

¹⁹ Binêrin, welatê wan çawa ye. Ew qenc e yan xerab e? Bajarên wan vekirî ne yan sûrkirî ne?

²⁰ Binêrin ax berdar e yan bêber e? Tê de dar hene yan tunene? Hûn hêzdar bin û ji fêkiyên welêt bînin.” Wî çaxî wextê tiriyê pêşî bû.

²¹ Zilam rabûn bi rê ketin, ji Beriya Zînê ber bi Levo-Hamatê, heta Rehovê lêkolîna welêt kir.

²² Herwiha wan Negevê derbas kir û hatin Hevrona ku ji binemalên Enaqiyan; Ahîman, Şêşay û Talmay li wir diman. –Hevron heft sal beriya Bajarê Soanê hatibû avakirin ku ew bajar li Misrê bû.–

²³ Gava ew gihîştin Newala Eşkolê, wan guliyekî dêliyê ku gûşiyek tirî pê ve bû jêkir. Du zilaman gulî li ser darekî hilgirt. Wan ji hinar û hejîran jî anîn.

²⁴ Ji ber ku gelê Îsraêl gûşiyê tirî jêkir, wan navê wê derê Newala Eşkolê danî.

²⁵ Piştî çil rojan ew ji lêkolîna welêt vegeriyan.

²⁶ Li Qadêşa li Beriya Paranê hatin ba Mûsa, Harûn û tevahiya civaka Îsraêl. Wan ya ku dîtine ji wan re û ji tevahiya civaka Îsraêl re got û fêkiyên welêt nîşanî wan da.

²⁷ Wan ji Mûsa re got: “Em gihîştin wî welatê ku te em şandinê. Bi rastî şîr û hingiv jê diherike û ev jî fêkiyê wî ye.

²⁸ Lê miletê li wir dijî hêzdar e, bajar bisûr û gelekî mezin in. Me li wir kesên ji ziriyeta Enaqî jî dîtin.

²⁹ Li Negevê Emalêqî dimînin. Li herêma çiyayî Hîtîtî, Yevûsî û Amorî dimînin. Li kêleka deryayê û keviyên Çemê Şerîayê Kenanî dimînin.”

³⁰ Kalêv li pêş Mûsa gel bêdeng kir û got: “Rabin em herin û desteser bikin. Çimkî hêza me têra vê yekê dike.”

³¹ Lê kesên pê re çûbûn wir got: “Hêza me tuneye ku em li dijî vî gelî rabin. Ew ji me hêzdartir in.”

³² Wan li ser welêt xebera nebaş li nav gelê Îsraêl belav kir ku li wir lêkolîn kiribûn. Wan digot: “Welatê ku me li ser sixûrî kir, welatekî wisa ye ku şêniyên wî hev dixwin! Hemû kesên me li wir dîtin, bejinbilind bûn.

³³ Me li wir Nefîlî dîtin ku ji ziriyeta Enaqiyan in. Em li ber wan wekî kuliyan bûn. Di çavê wan de jî em wisa bûn.”