Hejmartin 1 - Kurmanji Încîl

Hejmartina pêşî ya gelê Îsraêl

¹ Di sala diduyan a derketina ji welatê Misrê de, di roja pêşî ya meha diduyan de, Xudan li Beriya Sînayê, li Konê Hevdîtinê ji Mûsa re got:

² “Tevahiya civaka Îsraêl li gorî malbat û binemalên wan, her mêrî yek bi yek li gorî navê wan bijmêrin.

³ Tu û Harûn, hûnê her Îsraêliyê bîst salî û mezintir ê ku diçe şer, li gorî yekîneyên wan bijmêrin.

⁴ Wê ji her eşîrekê kesek bi we re be û wê ew kes serekê malbata xwe be.

⁵ “Navê kesên ku wê alîkariya we bikin ev in: Ji Rûbêniyan, Êlîsûrê kurê Şedêûr,

⁶ ji Şimûniyan, Şelûmiyêlê kurê Sûrîşadday,

⁷ ji Cihûdayiyan, Nahşonê kurê Emmînadav,

⁸ ji Îssexariyan, Natanêlê kurê Sûar,

⁹ ji Zevûloniyan, Êliyavê kurê Hêlon,

¹⁰ ji herdu kurên Ûsiv, ji Efrayîmiyan, Êlîşamayê kurê Emmîhûd û ji Minaşşeyiyan, Gamliyêlê kurê Pedahsûr,

¹¹ ji Binyamîniyan, Avîdanê kurê Gîdonî,

¹² ji Daniyan, Ahiyezerê kurê Emmîşadday,

¹³ ji Aşêriyan, Pagiyêlê kurê Oxran,

¹⁴ ji Gadiyan, Êlyasafê kurê Deûêl

¹⁵ û ji Nefteliyiyan, Ahîrayê kurê Eynan.”

¹⁶ Ew ji civaka Îsraêl hatin hilbijartin. Ew mîrên eşîrên bav û kalên xwe û serekên eşîrên Îsraêl bûn.

¹⁷ Mûsa û Harûn kesên ku navê wan hatine diyarkirin anîn

¹⁸ û di yekê meha diduyan de tevahiya civakê kom kir. Wan kesên bîst salî û mezintir li gorî malbat û binemalên wan, li gorî navê wan yek bi yek nivîsandin û hejmartin,

¹⁹ çawa ku Xudan li Mûsa emir kiribû. Bi vî awayî Mûsa li Beriya Sînayê ew hejmartin.

²⁰ Ji kurên Rûbênê kurê pêşî yê Îsraêl, mêrên bîst salî û mezintir ên ku dikarin herin şer, li gorî qeydên malbat û binemalên xwe, li gorî navê wan yek bi yek hatin hejmartin.

²¹ Hejmara kesên ji eşîra Rûbên 46.500 bû.

²² Ji Şimûniyan, mêrên bîst salî û mezintir ên ku dikarin herin şer, li gorî qeydên malbat û binemalên xwe, li gorî navê xwe yek bi yek hatin hejmartin.

²³ Hejmara kesên ji eşîra Şimûn 59.300 bû.

²⁴ Ji Gadiyan, mêrên bîst salî û mezintir ên ku dikarin herin şer, li gorî qeydên malbat û binemalên xwe, li gorî navê xwe hatin hejmartin.

²⁵ Hejmara kesên ji eşîra Gad 45.650 bû.

²⁶ Ji Cihûdayiyan, mêrên bîst salî û mezintir ên ku dikarin herin şer, li gorî qeydên malbat û binemalên xwe, li gorî navê xwe hatin hejmartin.

²⁷ Hejmara kesên ji eşîra Cihûda 74.600 bû.

²⁸ Ji Îssexariyan, mêrên bîst salî û mezintir ên ku dikarin herin şer, li gorî qeydên malbat û binemalên xwe, li gorî navê xwe hatin hejmartin.

²⁹ Hejmara kesên ji eşîra Îssexar 54.400 bû.

³⁰ Ji Zevûloniyan, mêrên bîst salî û mezintir ên ku dikarin herin şer, li gorî qeydên malbat û binemalên xwe, li gorî navê xwe hatin hejmartin.

³¹ Hejmara kesên ji eşîra Zevûlon 57.400 bû.

³² Ji herdu kurên Ûsiv, ji Efrayîmiyan, mêrên bîst salî û mezintir ên ku dikarin herin şer, li gorî qeydên malbat û binemalên xwe, li gorî navê xwe hatin hejmartin.

³³ Hejmara kesên ji eşîra Efrayîm 40.500 bû.

³⁴ Ji Minaşşeyiyan jî mêrên bîst salî û mezintir ên ku dikarin herin şer, li gorî qeydên malbat û binemalên xwe, li gorî navê xwe hatin hejmartin.

³⁵ Hejmara kesên ji eşîra Minaşşe 32.200 bû.

³⁶ Ji Binyamîniyan, mêrên bîst salî û mezintir ên ku dikarin herin şer, li gorî qeydên malbat û binemalên xwe, li gorî navê xwe hatin hejmartin.

³⁷ Hejmara kesên ji eşîra Binyamîn 35.400 bû.

³⁸ Ji Daniyan, mêrên bîst salî û mezintir ên ku dikarin herin şer, li gorî qeydên malbat û binemalên xwe, li gorî navê xwe hatin hejmartin.

³⁹ Hejmara kesên ji eşîra Dan 62.700 bû.

⁴⁰ Ji Aşêriyan, mêrên bîst salî û mezintir ên ku dikarin herin şer, li gorî qeydên malbat û binemalên xwe, li gorî navê xwe hatin hejmartin.

⁴¹ Hejmara kesên ji eşîra Aşêr 41.500 bû.

⁴² Ji Nefteliyiyan, mêrên bîst salî û mezintir ên ku dikarin herin şer, li gorî qeydên malbat û binemalên xwe, li gorî navê xwe hatin hejmartin.

⁴³ Hejmara kesên ji eşîra Neftelî 53.400 bû.

⁴⁴ Kesên ku ji hêla Mûsa, Harûn û duwanzdeh serekên gelê Îsraêl ve hatin hejmartin ev bûn. Her yekî ji duwanzdehan malbata xwe temsîl dikir.

⁴⁵ Li gorî malbatên xwe, mêrên ji gelê Îsraêl ên ku ji bîst salî û mezintir in û dikarin herin şer, hatin hejmartin.

⁴⁶ Hejmara hemûyan 603.550 bû.

⁴⁷ Lê Lêwiyî di nav wan de nehatin hejmartin.

⁴⁸ Çimkî Xudan ji Mûsa re gotibû:

⁴⁹ “Eşîra Lêwî nejmêre û wan tevî hejmartina gelê Îsraêl neke.

⁵⁰ Tê Lêwiyiyan li ser meskenê ku Sindoqa Şahidiyê tê de ye, hemû taximên wî û her tiştê girêdayî meskên bikî berpirsiyar. Wê meskên û hemû taximên wî hilgirin, jê re xizmetê bikin û li dora meskên kon vedin.

⁵¹ Gava mesken tê veguhestin, wê Lêwiyî bidin hev, gava bê danîn wê Lêwiyî dîsa vedin. Gava kesekî ne Lêwiyî nêzîkî wê bibe, divê bê kuştin.

⁵² Wê Îsraêlî konên xwe bi awayê yekîneyan deynin. Wê herkes li artêşgeha xwe, di bin ala xwe de kon vede.

⁵³ Wê Lêwiyî li dora meskenê ku Sindoqa Şahidiyê tê de ye kon vedin ku xezeb bi ser civaka Îsraêl de neyê. Wê nobedariya meskên bikin.”

⁵⁴ Gelê Îsraêl her tiştî bi awayê ku Xudan li Mûsa emir kiriye pêk anî.