Habaqûq 1 - Kurmanji Încîl

¹ Peyama ku bi riya dîtiniyê ji Habaqûqê Pêxember re hat.

Habaqûqê Pêxember gazinan ji Xwedê dike

² Ya Xudan, heta kengê ezê li te bikim hewar Û tê min nebihîzî? Ez ji te re diqîrim û dibêjim: “Zordarî heye!” Lê tu rizgar nakî!

³ Tu çima ewqas xerabiyê nîşanî min didî? Tu çima li ber ewqas neheqiyê xemsar î? Ez li ku dinêrim, xerakirin û zordarî heye. Pevçûn û berberî zêde dibe.

⁴ Loma hêza Şerîetê nemaye, Edalet qet pêk nayê. Xerab rastan dorpêç dikin, Jixwe edalet jî tuneye.

Bersiva Xwedê

⁵ “Li miletan binêrin! Şaş û metel bimînin! Çimkî ezê di rojên we de tiştekî wisa bikim, Gava bê gotin, hûnê bawer nekin.

⁶ Ez Kildaniyan xurt dikim, Ew miletekî bêrehm û êrîşkar in. Dibezin tevahiya dinyayê, Warên ne yê wan e bi dest dixin.

⁷ Erjeng û tirsdar in, Rê û rêbazên xwe ew çêdikin, Li pey navê xwe ne.

⁸ Hespên wan ji pilingan leztir in, Ji gurên êvarê çalaktir in. Siwarên wan ji dûrî ve bi çargavî tên, Wekî teyr difirin, xwe davêjin ser nêçîrê.

⁹ Hemû ji bo zordariyê tên. Wekî bayê beriyê pêş ve diçin, Wek sêlakê êsîran kom dikin.

¹⁰ Tinazan bi padîşahan dikin, Henekan bi mîran dikin. Bi her kelehê dikenin, Axê li ber kom dikin û desteser dikin.

¹¹ Paşê wek bayê tên û diçin. Ew sûcdar in, Hêza wan îlahê wan e.”

Habaqûqê Pêxember gazinên xwe didomîne

¹² Ma yê ji herheyiyê ne tu yî, Ya Xudan, Xwedayê min ê pîroz? Tê nemirî. Ya Xudan, ji bo dîwana me te Kildanî hilbijartin? Ya zinarê me, ji bo cezayê me te ew diyar kirin?

¹³ Çavên te ewqas paqij in Ku li xerabiyê nanêrin. Tu nikarî neheqiyê ragirî. Tu çima li xayînan dinêrî? Gava xerab kesên ji xwe rastir dadiqurtînin, Tu çima bêdeng dimînî?

¹⁴ Te mirov kirine wek masiyên deryayan, Wekî afirîdên dişêlin bêserwer in.

¹⁵ Kildanî wan hemûyan bi şewkê derdixin. Bi torebenên xwe wan digirin, Bi torên xwe yên mezin berhev dikin. Ew şa û kêfxweş dibin.

¹⁶ Loma ji bo torên xwe qurbanan serjê dikin, Ji torên xwe yên mezin bixûrê pêdixin. Çimkî bi wan para wan gelek e, Xwarina wan zêde ye.

¹⁷ Ma wê bi berdewamî torên xwe vala bikin? Ma wê bi bêrehmî hemû miletan tune bikin?