Ezra 4 - Kurmanji Încîl

Astengiyên li dijî avakirina Perestgehê

¹ Gava dijminên Cihûdayî û Binyamîniyan bihîst ku kesên ji sirgûnê vegeriyan Perestgeha Xwedayê Îsraêl Xudan çêdikin,

² rabûn çûn ba Zerûbbabîl û serekên binemalan û ji wan re gotin: “Em bi we re ava bikin. Em jî diperizin Xwedayê we û ji roja Êsar-Haddonê Padîşahê Aşûrê em anîne vir ve, em qurbanan pêşkêşî Xwedayê we dikin.”

³ Lê Zerûbbabîl, Yêşû û serekên binemalan ên din ji wan re got: “Avakirina Mala Xwedayê me ne karê we ye. Çawa ku Koreşê Padîşahê Parsê li me emir kiriye, tenê emê ji Xwedayê Îsraêl Xudan re wê ava bikin.”

⁴ Wê gavê gelê welêt Cihûdayî tirsandin û hêviyên wan şikandin ku dev ji avakirinê berdin.

⁵ Ji rojên padîşahiya Koreşê Padîşahê Parsê heta padîşahiya Daryûs wan bi bertîl şêwirmend girtin ku pîlana wan xera bikin.

Lidijderketina jinûveavakirina Orşelîmê

⁶ Di destpêka padîşahiya Ahaşwêroş de dijminan li dijî şêniyên Orşelîmê û Cihûdayê nameyeke sûcdarkirinê nivîsand.

⁷ Di rojên Artahşastayê Padîşahê Parsê de, Bîşlam, Mîtredat, Tavêl û hemû hevalbendên wan ên din, nameyek ji Artahşasta re nivîsandin. Name bi zimanê aramî hat nivîsandin û wergerandin.

⁸ Rehûmê Walî û Şîmşayê Nivîsende ji Artahşastayê Padîşah re li dijî Orşelîmê nameyeke sûcdarkirinê nivîsand. Name bi vî awayî bû:

⁹ “Rehûmê Walî, Şîmşayê Nivîsende û hevalbendên wan ên din, dadger, serek, peywirdar, Parsî, Erexî, Babîlî, Sûsayî –ku Elamî ne–

¹⁰ tevî gelên din ên ku Asurbanîpalê mezin û birûmet ajot û li bajarên Sameryayê û li herêma rojavayê Feratê bi cih kir.”

¹¹ Nûsxeyeke nameya ku wan ji Artahşastayê Padîşah re şand ev e. “Ji Artahşastayê Padîşah re, ji xulamên wî yên ku li herêma rojavayê Feratê dijîn:

¹² “Bila padîşah bizanibe ku Cihûyên ji ba te derketin, hatin Orşelîmê ba me, vî bajarê serhildêr û xerab ji nû ve çêdikin. Ew dîwarên wê diqedînin û hîmê wê zexim dikin.

¹³ Bila padîşah bizanibe ku heke ev bajar ji nû ve bê avakirin û dîwar bên lêkirin, wê esse bac û xeracê nedin. Ev yek wê ji padîşahiyê re bi zirar be.

¹⁴ Niha ji bo ku em nanê qesrê dixwin, li me nayê ku em bibînin şermezariya padîşah. Ji ber vê yekê me xeber ji te re şand

¹⁵ ku ev yek di nivîsên qewimînên bav û kalên te de bê lêkolandin. Tê di nivîsên qewimînan de bibînî ku ev bajar serhildêr e û ji bo padîşahan û waliyan bi zirar e. Wan ji berê ve li vî bajarî bêbextî kir. Ji ber vê sedemê ev bajar hat helakirin.

¹⁶ Gotina me ji padîşah re ev e: Heke ev bajar ji nû ve bê avakirin û dîwarên wê bên qedandin, li herêma rojavayê Feratê tu para te wê nemîne.”

¹⁷ Padîşah wiha bersiv da û got: “Ji Rehûmê Walî, Şîmşayê Nivîsende û ji hevalbendên xwe yên din ên li Sameryayê û li cihên din ên herêma rojavayê Feratê re, silav û rêz.

¹⁸ “Nameya we ji min re şand, hat wergerandin û li ber min hat xwendin.

¹⁹ Min ferman da, lêkolîn hat kirin û hat dîtin ku ev bajar ji berê ve li dijî padîşahan rabûye û tê de serhildan û bêbextî hatine kirin.

²⁰ Li ser Orşelîmê padîşahên hêzdar hebûn ku serweriyê li ser tevahiya herêma rojavayê Feratê kirin. Ji wan re bac û xerac jî dihat dayîn.

²¹ Niha fermanê bidin ku ev mirov bisekinin. Heta ez fermanê nedim bila ew bajar ji nû ve neyê avakirin.

²² Xwe di vî warî de sist nekin. Bila padîşahî zêdetir zirarê nebîne.”

²³ Gava nûsxeya nameya Artahşastayê Padîşah, li ber Rehûm, Şîmşayê Nivîsende û hevalbendên wan hat xwendin, bi lez çûn Orşelîmê ba Cihûyan û bi zorê ew dan sekinandin.

²⁴ Karê avakirina Mala Xudan a li Orşelîmê wê gavê sekinî. Heta dusaliya padîşahiya Daryûsê Padîşahê Parsê avakirina perestgehê sekinî.