Eyûb 6 - Kurmanji Încîl

Eyûbê Pêxember

¹ Eyûb lê vegerand û got:

² “Xwezî kedera min bihata kişandin Û bi belaya min re bixistana mêzînê!

³ Wê ji sêlaka deryayê girantir bûya, Loma wisa tewşo mewşo axivîm.

⁴ Çimkî tîrên Karîndar di nava min de ne, Ruhê min ji jehra wan vedixwe, Tirs û xofên Xwedê li pêşberî min rêz dibin.

⁵ Gelo kerê çolê li ber giyayê şîn dizire? Yan ga li ser êmê xwe dike borebor?

⁶ Gelo tiştekî bêtehm û bêxwê tê xwarin? Yan di spîka hêkê de tehm heye?

⁷ Dilê min naçe wan, Ew xurek min nexweş dikin.

⁸ “Xwezî daxwaza min pêk bihata Û Xwedê ya ku min bêrî kiriye bida min.

⁹ Xwezî Xwedê bi kerema xwe ez biperçiqandama, Destê xwe serbest berda û benê jiyana min bibiriya.

¹⁰ Wê ev ji min re bibûya teselî Û ezê di nav êşa xwe ya bêdawî de şa bûma. Çimkî min gotinên Yê Pîroz red nekir.

¹¹ Qey hêza min çi ye ku ez bisekinim? Dawiya min çi ye ku ez sebir bikim?

¹² Qey hêza min mîna keviran xurt e? Yan qey goştê min ji tûnc e?

¹³ Xêra min ji min re tuneye, Serketin ji min dûr e.

¹⁴ “Ji kesê dilkeder re, dilovaniya hevalan divê, Ew dev ji tirsa Karîndar berde jî.

¹⁵ Birayên min, wekî geliyekî bi min re xayîntî kir, Wekî newala ku carna diherike û carna naherike,

¹⁶ Ew bi qeşayê şîlo ye Û berf tê de veşartî ye.

¹⁷ Gava germ dibe nayê dîtin, Di kelakela germê de, di cihê xwe de tune dibe.

¹⁸ Di rê de ji bo çûna newalê karwan averê dibin Û di beriyê de tune dibin.

¹⁹ Karwanên Têmayê li avê digerin, Rêwiyên Sebayê bi hêvî lê dinêrin.

²⁰ Ji ber ku pê ewle bûn, şermezar bûn Gihîştin wê derê lê hêvîşikestî bûn.

²¹ Niha hûn jî bûn wekî wê, Sawê dibînin û ditirsin.

²² Ma min ji we re gotibû: ‘Tiştekî bidin min, Ji bo min ji malê xwe bertîlê bidin,

²³ Min ji destê dijmin xilas bikin An min ji destê zordaran azad bikin’?

²⁴ “Hînî min bikin, ezê hiş bim, Min di çi de şaşîtî kir, ji min re eşkere bikin.

²⁵ Gotinên rast çiqas hêzdar in! Erzşikandina we, ji bo çi ye?

²⁶ Qey hûn dixwazin gotinên min rast bikin? Peyvên kesê neçar, qey wekî bayê ne?

²⁷ Erê, we yê li ser sêwiyan pişk biavêta Li ser hevalê xwe bazarê bikira.

²⁸ “Ji kerema xwe niha bala xwe bidin min! Ezê li rûyê we derewan li we nekim.

²⁹ De bala xwe bidin min, bila neheqî çênebe, Dîsa bifikirin, rastbûna min di xeterê de ye.

³⁰ Qey li ser zimanê min gotina neheq heye? Qey devê min niyeta xerab ji hev dernaxe?