Eyûb 5 - Kurmanji Încîl

¹ “Ka gazî bike! Gelo kesê bersiva te bide heye? Tê berê xwe bidî kîjan hebûnên pîroz?

² Bi rastî keder kesê ehmeq dikuje, Hesûdî mirovê sexik tune dike.

³ Min dît kesê ehmeq kok dide, Lê min yekser naletê li warê wî anî.

⁴ Zarokên wî ji ewlebûnê dûr in, Li ber dergehê dadgehê diperçiqin, Kes wan rizgar nake.

⁵ Mirovên birçî berê wî dixwin, Ew ji nav diriyan jî didin hev, Kesên tî li ber mal û milkê wî devê xwe vekirine.

⁶ Çimkî ne xerabî ji axê derdikeve, Ne jî derd ji erdê dipişkive.

⁷ Lê mirov ji bo derd û kulan tê dinyayê, Wekî çirûskên êgir ber bi jor dibin.

⁸ “Lê belê ez bûma, ezê li Xwedê bigeriyama, Min ê doza xwe ji Xwedê re bihişta.

⁹ Ew Xwedayê ku karên mezin ên nayên keşifkirin, Bêhejmar karên nûwaze dike.

¹⁰ Ew baranê dide rûyê erdê Û avê bi ser zeviyan ve dişîne.

¹¹ Ew kesên nizim bilind dike Û şîniyan derdixe ewlehiyê.

¹² Ew fikrên hîlekaran xera dike Ku destên wan bi ser nekevin.

¹³ Ew fenekan di fen û fûtên wan de digire Û şêwra xeraban yekser xera dike.

¹⁴ Ew bi roj rastî tariyê tên, Nava rojê, çawa ku şev e, bi dest û lepan dimeşin.

¹⁵ Lê ew hejaran ji ber devê şûrê wan, Ji destê hêzdaran rizgar dike.

¹⁶ Wî çaxî ji bo belengazan hêvî çêdibe, Xerabî devê xwe digire.

¹⁷ “Xwezî bi wî mirovê ku ji aliyê Xwedê ve hatiye erzşikandin, Loma jî tu terbiyekirina Karîndar kêm nebîne.

¹⁸ Çimkî ew diêşîne, ew dipêçe, Ew birîndar dike û destên wî baş dikin.

¹⁹ Wê te ji şeş tengasiyan rizgar bike, Cara heftan bela nêzîkî te nabe.

²⁰ Wê te di xelayê de ji mirinê, Di şerî de ji destê şûr rizgar bike.

²¹ Tê ji qemçîkirina zimên dûr bimînî, Gava hilweşîn hat jê netirsî.

²² Tê li hilweşîn û xelayê bikenî Û ji heywanên hov netirsî.

²³ Çimkî tê bi kevirên zeviyê re li hev bikî Û wê heywanên çolê bi te re aştiyê çêkin.

²⁴ Tê bizanibî ku konê te di aştiyê de ye, Tê bala xwe bidî cihê xwe û kêmahiyekê nebînî.

²⁵ Tê bibînî wê ziriyeta te zêde be Û şaxên te wekî giyayê erdê be.

²⁶ Tê di pîrbûna xwe de herî gorê, Çawa ku qevdek di wextê xwe de tê civandin.

²⁷ “Va ye me lê kola ku rast e, Loma guh bide û ji bo xwe bizanibe.”