Eyûb 40 - Kurmanji Încîl

¹ Xudan bersiva Eyûb da û got:

² “Gelo kesek tiştekî şaş di Karîndar de dibîne, Dikare gazinan jê bike? Kesê doza wî bi Xwedê re heye bila bersivê bide.”

³ Eyûb bersiva Xudan da û got:

⁴ “Ez kêm im, ez kî me ku bersiva te bidim? Loma destê xwe dibim ber devê xwe.

⁵ Carekê min got, ezê bersiv nedim. Careke din ezê nepeyivim.”

⁶ Xudan ji nav bagerê bersiva Eyûb da û got:

⁷ “Niha wekî mêrekî, piştenka xwe girê bide! Ez ji te bipirsim, tu bi min bide zanîn!

⁸ “Gelo tê edaleta min pûç derînî? Ji bo mafdar bêyî dîtin, tê min sûcdar bikî?

⁹ Zendê te wekî zendê Xwedê ye? Dengê te dikare wekî dengê wî bike gurmîn?

¹⁰ Nexwe rabe xwe bi şan û şerefê rapêçe, Heşmet û rewnaqiyê li xwe bike.

¹¹ Xezeba xwe ya zêde vala bike, Li qureyan binêre û wan nizim bike.

¹² Li hemû qureyan binêre û wan kêm bike Û xeraban di cihê wan de biperçiqîne.

¹³ Hemûyan bixe bin axê, Ji bo goristanê rûyê wan bi kincan bipêçe.

¹⁴ Wî çaxî ezê jî qebûl bikim Ku wê destê te yê rastê te rizgar bike.

¹⁵ “Ka li Behêmotê binêre ku min tevî te afirandiye, Binêre çawa wekî dewaran giyê dixwe.

¹⁶ Mêze bike, hêza wî di pişta wî de ye, Taqeta wî di rehên zikê wî de ye.

¹⁷ Dûvê xwe wekî dara sedrê radike, Rehên hêtên wî hatine honandin.

¹⁸ Hestiyên wî wekî boriyên tûncîn in, Beşên bedena wî, wekî şivên hesinî ne.

¹⁹ Ew berhemeke sereke ya Xudan e, Tenê Afirînerê wî dikare bi şûr nêzîkî wî be.

²⁰ Xwarina wî çiya didin, Ew çiyayên ku hemû heywanên çolê li wir dileyizin.

²¹ Ew di bin deviyên hinapê de radize, Li dera qamîş û ritamê.

²² Hinap wî bi siya xwe dinixêmin, Spîndarên gelî dor lê dipêçin.

²³ Çem jî rabe, ew natirse, Çemê Şerîayê bide qirikê jî, ew ewle ye.

²⁴ Gava çavê wî dibîne, kî dikare wî bigire Û bi xelekê pozê wî qul bike?