Eyûb 36 - Kurmanji Încîl

¹ Êlîhû gotina xwe berdewam kir û got:

² “Hinekî bisekine ez nîşanî te bidim, Çimkî hê gotina min heye ku bi xatirê Xwedê ye.

³ Ezê zanîna xwe ji dûrî ve bînim Û rastiyê bidim Afirînerê xwe.

⁴ Bêguman peyvên min ne derew in, Mirovekî bi zanabûna kamil li ber te ye.

⁵ “Bi rastî Xwedê mezin e û tu kesî kêm nabîne, Ew di qeweta dil de hêzdar e.

⁶ Ew xeraban nade jiyandin Û heqê bindestan dide.

⁷ Ew çavê xwe ji ser rastan nade alî, Lê wan bi padîşahan re ser textan dide rûniştandin Û ew her û her berz dibin.

⁸ Heke ew li zincîran bên xistin Û bi benê tengasiyê ve bêne girêdan,

⁹ Wê gavê ew kirin û neheqiyên wan Ku kirêtî ne, Ji wan re eşkere dike.

¹⁰ Ew terbiyekirinê bi wan dide guhdarîkirin Û ferman dike ku ji xerabiyê bizivirin.

¹¹ Heke guh bidin û xulamiya wî bikin, Ew rojên xwe bi qenciyê Û salên xwe di kêfxweşiyê de derbas dikin.

¹² Lê heke guh nedin, Wê bi şûr tune bibin Û ji ber nezaniyê bimirin.

¹³ “Kesên ji dil xwedênenas in, hêrsê dicivînin, Xwedê wan girê bide jî, ew nakin hewar.

¹⁴ Ew di xortaniya xwe de dimirin, Jiyana wan di nav fahîşeyên pûtperest de diqede.

¹⁵ Ew bindestan di bindestiya wan de rizgar dike, Ew di tengasiyê de wan dide guhdarîkirin.

¹⁶ “Bi rastî wî bala te kişand Ku te ji devê tengasiyê derîne Û te bibe dereke fireh û bêasteng. Sifreya te bi rûn û aramiyê tije bû.

¹⁷ Lê tu bi cezayê xeraban tije bûyî, Ceza û edalet te digirin.

¹⁸ Hay ji xwe hebe, bila hêrs bala me nekişîne Ku em nebin tinazkar. Bila bertîla zêde jî te averê neke.

¹⁹ Wê hewara te, te ji tengasiyê bikişîne? Wê hemû hêz û qeweta te, têr bike?

²⁰ Tu bêriya wê şevê neke Ku gel ji cihê xwe tên rakirin.

²¹ Hay ji xwe hebe, xwe ber bi xerabiyê ve nebe, Çimkî ji ber vê yekê tu bi tengasiyan hatî ceribandin.

²² “Va ye Xwedê bi hêza xwe bilind e, Gelo Mamosteyê wekî wî heye?

²³ Kî riya wî li ber wî kifş kir? Kî dikare jê re bêje: ‘Te neheqî kir’?

²⁴ Pesindana karê wî bi bîr bîne, Mirov li ser wî stranan jî dibêjin.

²⁵ Herkes li karê wî mêze dike, Her mirov ji dûrî ve lê dinêre.

²⁶ Bi rastî Xwedê ewqas mezin e Ku em nikarin fêm bikin. Hejmara salên wî nayê hesibandin.

²⁷ “Ew dilopên avê bi jor ve dikişîne Û dilopên baranê bi hilma xwe disefîne.

²⁸ Ewr baranê diherikînin Û bi têra xwe bi ser mirovan ve dilop dikin.

²⁹ Gelo mirov belavbûna ewran Û gurmîna konê wî dikare fêm bike?

³⁰ Va ye, ew bi brûskên xwe derdora xwe ronahî dike Û kûrahiya deryayan dinixême.

³¹ Çimkî ew bi vê yekê serweriya gelan dike Û bi zêdebarî xwarinê dide.

³² Bi brûskan destên xwe dinixême Û emir dike ku li armanca wî bixe.

³³ Gurmîna wî bahoza wî eşkere dike, Dewar jî hatina wê radigihîne.