Eyûb 35 - Kurmanji Încîl

¹ Êlîhû gotina xwe berdewam kir û got:

² “Gelo tu vê yekê rast dibînî? Tu dibêjî: ‘Ez li ber Xwedê rast im.’

³ Lê tu wisa jî dibêjî: ‘Heke ez guneh nekim, Wê çi feydeya te hebe Û çi qezenca min hebe?’

⁴ “Ezê bersiva te û hevalên te bidim.

⁵ Li ezmanan binêre û bibîne, Bala xwe bide ewrên ji te bilindtir.

⁶ Tu guneh bikî, wê çi bi Xwedê were? Neheqiyên te zêde bin, wê çi pê were?

⁷ Heke tu rast bî, tu çi didî wî, Yan jî ew çi ji destê te distîne?

⁸ Xerabiya te ji bo mirovan e, Ji bo kesên wekî te ye, Rastiya te jî, ji bo kurê mirovan e.

⁹ “Mirov di bin zordariya zêde de dikin hewar, Gava di bin zendê hêzdaran de gazî alîkariyê dikin.

¹⁰ Lê kes nabêje: ‘Ka Xwedê, Afirînerê min?’ Ew Xwedayê ku bi şev stranan dide,

¹¹ Ji heywanên erdê bêtir me hîn dike Û ji teyrên ezmanan me şehrezatir dike.

¹² Ji ber quretiya xeraban, Li wir dikin hewar, lê ew bersiva wan nade.

¹³ Xwedê esse guhdariya hewara vala nake, Karîndar bala xwe nade vê yekê.

¹⁴ Herçiqas tu dibêjî: ‘Ez wî nabînim’ jî, Doza te li ber wî ye û tê zehf li benda wî bimînî!

¹⁵ Herwiha, ji ber ku wî bi hêrsa xwe ceza nekir Û zêde bala xwe neda serhildanê,

¹⁶ Eyûb beredayî devê xwe vedike, Ew bi nezanî gotinan zêde dike.”