Eyûb 23 - Kurmanji Încîl

Eyûbê Pêxember

¹ Eyûb lê vegerand û got:

² “Îro ezê dîsa gazina xwe ya bi keser bikim, Tevî ku nalîna min jî heye, destê Xwedê li ser min giran e.

³ Xwezî min bizanibûya ezê çawa wî bibînim, Ez bigihîştama cihê wî.

⁴ Minê doza xwe li ber wî rêz bikira Û devê xwe bi delîlan tije bikira.

⁵ Ezê bersiva dide min, hîn bibûma Û tişta ji min re dibêje fêm bikira.

⁶ Ma wê bi hêza xwe ya mezin li dijî min rabûya? Na, tenê wê guhdariya min bikira.

⁷ Li wir, kesê rast dikaribû li pêş wî dozekê vekira Û ezê jî, ji dîwanê her û her azad bibûma.

⁸ “Heke ez herim rojhilat, ew ne li wê derê ye, Biçim rojava jî, ez wî nabînim.

⁹ Heke li bakur kar bike, ez wî ji hev dernaxim, Vegere başûr jî, ez wî nabînim.

¹⁰ Lê ew riya ku ez çûm ser dizane, Dema min biceribîne, ezê wekî zêr derkevim.

¹¹ Ji nêz ve min da ser şopa wî, Min da ser riya wî û averê nebûm.

¹² Ez ji emrê ser lêvên wî neqetiyam, Min ji nanê xwe yê rojane zêdetir, Qedir da gotinên devê wî.

¹³ “Ew bi tena serê xwe ye, Kî dikare wî bizivirîne? Canê wî çi bixwaze wî dike.

¹⁴ Çimkî çi para min bikeve, ew dibe serî, Gelek tiştên wiha di hişê wî de ne.

¹⁵ Loma ez li ber wî ditirsim, Çiqas difikirim ewqas dikevim sawê.

¹⁶ Erê, Xwedê wêrekiya dilê min şikand, Karîndar ez tirsandim.

¹⁷ Lê taristan jî nikare min bêdeng bike, Tevî ku taristana şevereşê serçavê min veşêre jî!