Eyûb 20 - Kurmanji Încîl

Sofarê Naemayî

¹ Sofarê Naemayî lê vegerand û got:

² “Fikrên min dikin ku ez bersivê bidim, Ji ber vê yekê kelecana min pir e.

³ Erzşikandina ku min rezîl dike, hat guhê min, Ruhekî ji fêmdariya min zêdetir bersiva min dide.

⁴ “Gelo tu vê yekê ji berê ve nizanî? Ji dema ku mirov li ser dinyayê hat danîn,

⁵ Şahiya xeraban kurt e, Şabûna xwedênenasan hema gavek e.

⁶ Bejna wan bigihîjin ezmanan, Serê wan li ewran jî bikevin,

⁷ Wê heta hetayê tune bibin, wekî pîsîtiya xwe. Kesên ew dîtine, wê bêjin: ‘Ew li ku ne?’

⁸ Wê wekî xewnekê bifirin û careke din neyên dîtin, Wê wekî dîtiniyeke şevê bên qewitandin.

⁹ Çavên ku ew dîtine, wê careke din nebînin, Cihê lê mane, wê êdî lê nenêrin.

¹⁰ Wê kurên wî destên xwe ji kerema belengazan re vekin, Wê mal û milkê wî bi destê xwe vegerînin.

¹¹ Hestiyên xeraban ên ku tije xortanî bûn, Wê bi xortaniya wan re di bin axê de razin.

¹² “Tevî ku xerabî di devê wan de şîrîn e Û di bin zimanê xwe de wê veşêrin jî,

¹³ Tevî ku ew biparêzin, bernedin Û di devê xwe de veşêrin jî,

¹⁴ Xwarina ku xwarine di zikê wan de tehl dibe, Li nav wan dibe jehra tîremaran.

¹⁵ Serwetên ku wan daqurtandiye, wê vereşin, Wê Xwedê wan ji zikê wan bavêje der.

¹⁶ Wê jehra koremaran bimijin, Wê zimanê tîremaran wan bikuje.

¹⁷ Wê çem û newalan nebînin Ku bi hingiv û nivişkê diherikin.

¹⁸ Bêyî ku daqurtînin, wê berê keda xwe vegerînin, Wê bi qezenca bazirganiya xwe şa nebin.

¹⁹ Çimkî wan belengaz şikandin û tenê hiştin, Wan xaniyên ku ava nekiribûn bi zorê standin.

²⁰ “Ji têrnexwariyê rihetiya wan tuneye, Ji çavnebariya wan tu tişt nafilite.

²¹ Ji sifreya wan tiştek nema, Loma wê qenciya wan berdewam neke.

²² Di nav firehiyê de jî wê tengasiyê bibînin, Wê her cure dijwarî bi ser wan de were.

²³ Gava zikê wan têr bibe, Wê Xwedê hêrsa xwe ya dijwar bi ser wan de bişîne, Wê xezebê li ser wan bibarîne.

²⁴ Wê ji çekê hesinî birevin, Wê tîrê tûncî bedena wan qul bike.

²⁵ Gava ew tîr ji pişta xwe bikişînin, Wê serê wî yê birqok di ziravê wan re derkeve Û tirs û saw bi ser wan de were.

²⁶ Ji bo xezîneyên wan her cure tarîtî amade ye, Agirê ku tu kesî geş nekir, wê wan daqurtîne. Tiştên ji konê wan mane wê xera bibin.

²⁷ Wê ezman neheqiya wan eşkere bike, Wê erd li dijî wan rabe.

²⁸ Wê hebûna mala wan bibe malê talanê Û di roja xezeba wî de bi lehiyê re here.

²⁹ Para xeraban ji Xwedê ev e, Li gorî gotina Xwedê, ev e mîrasa wan.”