Eyûb 12 - Kurmanji Încîl

Eyûbê Pêxember

¹ Eyûb lê vegerand û got:

² “Bêguman gel hûn in Ku şehrezayî pê re bimire.

³ Lê aqilê min jî bi qasî aqilê we heye, Ez ji we ne kêmtir im. Gelo kî tiştên wiha nizane?

⁴ “Ez ji bo hevalên xwe bûm pêkenok, Ez ê ku min gazî Xwedê dikir Û wî bersiva min dida. Zilamê rast û kamil bû pêkenok!

⁵ Kesên bêxem felaketê biçûk dibînin, Lê felaket ji bo kesên lingê wan şemitiye amade ye.

⁶ Konên rêbiran di rihetiyê de ne, Kesên hêrsa Xwedê rakirine di ewlehiyê de ne. Xwedê ev tişt dane destê wan.

⁷ “Niha tu ji heywanan bipirse, bila hînî te bikin, Ji teyrên ezmanan bipirse, bila ji te re bêjin.

⁸ An ji axê bipirse, bila hînî te bike, Masiyên deryayê jî dikarin ji te re eşkere bikin.

⁹ Ji van hemûyan kî nizane Ku destê Xudan ev yek kiriye.

¹⁰ Ew Xudanê ku canê her jîndarî, Hilma hemû beşerê di destê wî de ye.

¹¹ Çawa dev, tehma tiştê dixwe hiltîne, Gelo guh jî gotinê wisa naceribîne?

¹² Şehrezayî bi pîran re ye, Fêmdarî jî di emrê dirêj de.

¹³ “Hêz û şehrezayî li ba Xwedê ne, Şêwir û fêmdarî yên wî ne.

¹⁴ Yê ku ew hilweşîne, ji nû ve ava nabe, Deriyê ku ew li ser kesekî bigire, nayê vekirin.

¹⁵ Gava ew avê dide sekinandin, her der hişk dibe, Gava avê berdide, dinyayê serobino dike.

¹⁶ Hêz û serketin li ba wî ne, Kesê dixapîne û tê xapandin jî yên wî ne.

¹⁷ Ew şêwirmendan pêxwas dişîne Û dadgeran dîn dike.

¹⁸ Girêka ku padîşahan girê daye vedike Û bi werîsan nava wan girê dide.

¹⁹ Kahinan pêxwas dişîne Û xurtan serobino dike.

²⁰ Peyva mirovên ewle ji navê radike Û aqilê pîran ji serê wan distîne.

²¹ Ew rezaletê bi ser esilzadeyan ve dirijîne Û piştênka hêzdaran sist dike.

²² Ew ji tariyê, kûrahiyan derdixe Û taristana kûr dike ronahî.

²³ Miletan mezin dike û wan tune dike, Wan berfireh dike û wan dişîne sirgûnan.

²⁴ Ew hişê serekên dinyayê distîne Û di beriyeke bê ser û ber de digerîne.

²⁵ Ew di tariyê de bi dest û lepan dimeşin û ronahiyê nabînin Û wan wekî serxweşan digerîne.