Ester 5 - Kurmanji Încîl

Ester daxwaza xwe ji padîşah re dibêje

¹ Di roja sisêyan de Esterê cil û bergên şahbanûtiyê li xwe kirin û li hewşa hundir a qesra padîşah, li ber odeya text sekinî. Padîşah jî li ser textê xwe yê ku li pêşberî deriyê ketinê rûniştibû.

² Gava wî dît ku Estera Sahbanû li hewşê sekinî ye, dilê wî pê xweş bû û wî gopalê xwe yê zêrîn dirêjî wê kir. Ester nêzîk bû û destê xwe da serê gopêl.

³ Padîşah jê re got: “Te xêr e, Estera Şahbanû? Daxwaza te çi ye? Heke tu bixwazî, wê nîvê padîşahiyê jî, ji te re bê dayîn.”

⁴ Esterê ji padîşah re got: “Heke bi dilê padîşah be, bila padîşah tevî Haman keremke îro were ziyafeta ku ezê ji bo padîşah amade bikim.”

⁵ Padîşah got: “Ji bo em daxwaza Esterê pêk bînin, yekser gazî Haman bikin.” Padîşah û Haman çûn ziyafeta ku wê Ester bide.

⁶ Gava şerab vedixwarin, padîşah careke din ji Esterê re got: “De ka bêje, tu çi dixwazî? Wê ji te re bê dayîn. Daxwaza te çi ye? Heke tu bixwazî, wê nîvê padîşahiyê jî, ji te re be.”

⁷ Esterê got: “Hêvî û daxwaza min,

⁸ heke bi dilê padîşah bi min xweş be, bixwaze daxwazên min bi cih bîne, dîsa bila padîşah û Haman sibê keremkin bên ziyafeta ku ezê ji bo wan bidim. Wî çaxî ezê bersiva pirsa padîşah bidim.”

Hêrsa Haman

⁹ Haman wê rojê bi şahî û dilgeşî derket. Mordexay li ber dergehê qesrê bû, ji ber ku ew ranabû û rûmet nîşanî wî nade. Li ser vê yekê Haman gelekî hêrs bû.

¹⁰ Dîsa jî xwe ragirt û berê xwe da malê. Paşê wî gazî dostên xwe û jina xwe Zereşê kir.

¹¹ Wî ji wan re behsa dewlemendiya xwe ya mezin, pirbûna kurên xwe û ji aliyê padîşah ve rûmetdana xwe kir. Behsa wê yekê kir ku çawa di nav serek û karmendan de, di ser hemûyan re tê dîtin.

¹² Paşê Haman wiha berdewam kir: “Bi ser de Estera Şahbanû, ji bo ziyafeta ku dide, bi padîşah re tenê gazî min kir. Sibê jî bi tenê ezê bi padîşah re herim ziyafeta wê.

¹³ Heta ku ez Mordexayê Cihû li ber dergehê padîşah bibînim, tu qedrê van tiştan li ber çavê min namîne.”

¹⁴ Jina wî Zereş û hemû dostên wî jê re got: “Bila darekî ku pêncî gaz bilind e bê daçikandin û ji padîşah re bêje ku serê sibê Mordexay li wir bê daleqandin. Paşê bi dilekî rihet bi padîşah re here ziyafetê.” Ev pêşniyar bi dilê Haman bû û wî darê daleqandinê daçikand.