Ester 4 - Kurmanji Încîl

Mordexay ji Esterê alîkariyê dixwaze

¹ Piştî ku Mordexay ji wan tiştan haydar bû, cilên xwe çirand, çûx li xwe kir û xwelî bi ser xwe de kir. Bi dengekî bilind kir qîrîn û hewar û nalîneke kûr çû nava bajêr.

² Li ber dergehê qesrê sekinî. Ji ber ku kesekî çûx li xwe kiriye, nikaribû ji dergehê qesrê biketa hundir.

³ Li her herêma ku gotin û fermana padîşah gihîştê, Cihû ketin nav şîneke mezin, giriyan, rojî girtin û li xwe xistin. Gelek kesên ji wan çûx li xwe kirin û xwe li ser xweliyê gevizandin.

⁴ Keçik û axayên haremê yên Esterê hatin û behsa meselê jê re kirin. Estera Şahbanû gelekî xemgîn bû. Wê cil ji Mordexay re şandin ku lê bikin û çûx jê bêxin, lê wî qebûl nekir.

⁵ Li ser vê yekê Esterê gazî Hatak kir. Hatak xadimkirî bû ku padîşah xistibû xizmeta Esterê. Wê jê xwest ku here, sedema vê yekê ji Mordexay bipirse.

⁶ Hatak rabû çû meydana ku diçe ber dergehê qesrê ba Mordexay.

⁷ Mordexay her tiştê ku hatiye serê wî yek bi yek jê re got. Pereyê ku Haman ji bo helakirina Cihûyan bexşî xezîneya qesrê kiriye bêkêmahî jê re got.

⁸ Herwiha wî nûsxeyeke nivîseke li ser tunekirina Cihûyan da wî ku li Susayê hatiye belavkirin. Mordexay xwest ku ew kes wê nîşanî Esterê bide û li ser wê pê re biaxive. Mordexay dixwest Ester here ba padîşah û ji bo gelê xwe jê hêvî û lava bike.

⁹ Hatak çû û gotinên Mordexay ji Esterê re got.

¹⁰ Esterê ji Hatak re got ku vegere, ji Mordexay re wiha bêje:

¹¹ “Hemû karmendên padîşah û miletên ku li herêmên wî rûdinin dizanin ku bêyî ku hatibe gazîkirin ji bo her kesê ku dikeve hewşa hundir a qesrê û nêzîkî padîşah dibe tenê rêzikek heye: Heta ku padîşah gopalê xwe yê zêrîn dirêj neke û canên wan nebexişîne, ew kes tên kuştin. Ev sî roj in ku ez jî, ji bo hizûra padîşah nehatime gazîkirin.”

¹² Gava ev gotinên Esterê jê re hatin ragihandin,

¹³ Mordexay xwest ku ew vê bersivê ji Esterê re bibin: “Nefikire ji ber tu li qesra padîşah î, ji hemû Cihûyan tenê tê rizgar bibî.

¹⁴ Heke tu niha bêdeng bimînî, wê alîkarî û rizgariya Cihûyan ji cihekî din bê. Lê tu û mala bavê te, hûnê bi tevahî helak bibin. Dibe ku tu ji bo rojeke wisa bûyî şahbanû.”

¹⁵ Li ser vê yekê Esterê ev bersiv ji Mordexay re şand:

¹⁶ “Here û tevahiya Cihûyên li Sûsayê bicivîne, ji bo min rojiyê bigirin. Sê şev û sê rojan ne bixwin, ne jî vexwin. Ez û xizmetkarên xwe jî, emê rojî bigirin. Paşê tevî ku ne li gorî qanûnê ye jî, ezê herim ba padîşah. Ez bimirim jî, ne xem e.”

¹⁷ Mordexay ji wir çû û li gorî emrê Esterê her tiştî kir.