Dubarekirina Şerîetê 11 - Kurmanji Încîl

Mezinbûna Xudan

¹ “Hûnê ji Xwedayê xwe Xudan hez bikin û emir, peywir, qanûn û rêbazên wî herdem pêk bînin.

² Îro bizanin ku kesên terbiyekirina Xwedayê we Xudan dîtin û fêmkirin, ne kurên we, lê hûn bixwe bûn. Divê hûn mezinahiya wî, destê wî yê hêzdar, zendê wî yê dirêjkirî,

³ nîşan û karên ku wî li Misrê anîn serê Firewnê Padîşahê Misrê û seranserê welatê wî,

⁴ ya ku anî serê artêşa Misrê, hespên wan û erebeyên wan ên şer, çawa ku gava ew li pey we bûn, wî ew di bin ava Derya Sor de hiştibûn û heta îro ew tune kiribûn,

⁵ ya ku heta ku hûn gihîştin vir ji bo we li beriyê kir,

⁶ bi ser de jî ya ku wî anî serê Datan û Avîramê kurên Êliyavê kurê Rûbên, çawa ku li nav tevahiya gelê Îsraêl erdê devê xwe vekir û ew, maliyên wan, konên wan û her jîndarên li pey wan diçûn daqurtandin, divê hûn baş bizanin.

⁷ Çimkî hemû karên mezin ên ku Xudan kirin, we bi çavên xwe dîtin.

⁸ “Hemû emrên ez îro li we dikim pêk bînin ku hûn hêzdar bibin, herin welatê hûn derbasî wir bûbûn û ji xwe re bikin milk.

⁹ Bila emrê we, li axa ku şîr û hingiv jê diherike û Xudan sond xwar ku bide bav û kalên we û ziriyeta wan, dirêj be.

¹⁰ Welatê hûnê herinê û ji xwe re bikin milk, ne wekî welatê Misrê ye ku hûn jê derketin. We li wir tov direşand û tevahiya erdê wekî bostên bi zehmetî av dida.

¹¹ Lê li welatê ku hûnê herinê û ji xwe re bikin milk, çiya û newal hene. Axa wê, bi barana ezmanan tê avdan.

¹² Çavê Xwedayê we Xudan li ser wî welatî ye. Ji serê salê heta dawiyê, çavê Xwedayê we Xudan hergav li ser wê derê ye.

¹³ “Heke hûn ji Xwedayê xwe Xudan hez bikin, bi hemû dilê xwe û bi hemû canê xwe xulamiya wî bikin û van emrên ku ez îro li we dikim baş guhdarî bikin,

¹⁴ wî çaxî wê Xudan barana pêşî û paşî di wextê de li welatê we bibarîne ku hûn dexlê xwe, şeraba nû û rûnê xwe yê zeytê bicivînin.

¹⁵ Wê Xudan li zeviyan ji bo heywanên we giya bide û hûnê bixwin û têr bibin.

¹⁶ Hay jê hebin ku dilê we neyê xapandin û averê nebin, xulamiya îlahan nekin û li ber wan neçin ser çokan.

¹⁷ Bila hêrsa Xudan li dijî we ranebe û ew ezmanan negire ku baran nebare, ax berê xwe nede û hûn li welatê qenc ê ku ew dide we zû helak nebin.

¹⁸ “Van gotinên min bixin dil û canê xwe. Wekî nîşanekê wan bi destê xwe ve girê bidin, wekî berenîkekê li ser eniya xwe bixin.

¹⁹ Hûnê wan qenc hînî zarokên xwe bikin, çaxê hûn li mala xwe rûdinin, dimeşin, radizin û radibin, divê hûn li ser wan bipeyivin.

²⁰ Wan li ser kêlekên deriyên malên xwe û dergehên bajarên xwe binivîsin.

²¹ Bila li welatê ku Xudan bi sondxwarin dabû bav û kalên we, hûn û zarokên we, heta ku ezman li ser erdê be, hebin.

²² “Heke hûn tevahiya van emrên ku ez li we dikim pêk bînin, ji Xwedayê xwe Xudan hez bikin, di riyên wî de bimeşin û pê ve girêdayî bin,

²³ wê Xudan li ber we tevahiya van miletan biqewitîne. Hûnê welatên miletên ku ji we mezintir û hêzdartir in ji xwe re bikin milk.

²⁴ Her cihê pehniya piyê we lê bikeve, wê bibe ya we. Wê sînorên we ji beriyê heta Lubnanê, ji Çemê Feratê heta Derya Spî dirêj bibin.

²⁵ Wê tu kes li ber we nesekine. Wê Xwedayê we Xudan çawa ku soz daye we, li tevahiya welatê ku pehniya piyê we lê bikeve, wê tirs û sawa we serdest bike.

²⁶ “Binêrin, îro ez bereket û naletê datînim ber we.

²⁷ Heke hûn guhdariya emrên Xwedayê we Xudan ên ku ez îro li we emir dikim bikin, wê para we bibe bereket.

²⁸ Heke hûn guhdariya emrên Xwedayê xwe Xudan nekin, ji riya ku ez îro li we emir dikim averê bibin û bidin pey îlahên ku we nizanibûn, wê para we bibe nalet.

²⁹ “Çaxê Xwedayê we Xudan we bîne welatê ku hûnê herinê û ji xwe re bikin milk, hûnê li ser Çiyayê Gerizîmê bereketê, li ser Çiyayê Êvalê naletê bixwînin.

³⁰ Herdu çiya li aliyê din ê Çemê Şerîayê, li rojavayê rê, li welatê Kenaniyan ên ku li Eravayê rûdinin, li hember Gîlgalê, li ba darmaziya Moreyê ne.

³¹ Gava hûn Çemê Şerîayê derbas dikin, herin welatê Xwedayê we Xudan dide we û wî ji xwe re dikin milk û paşê we ew kir milk û hûn tê de rûnin,

³² hay jê hebin ku hemû qanûn û rêbazên ez îro ji we re dibêjim, pêk bînin.