Dîrok I, 23 - Kurmanji Încîl

¹ Gava Dawid kal bû û ji jiyanê têr bû, wî Silêmanê kurê xwe kir Padîşahê gelê Îsraêl.

Peywira Lêwiyiyan

² Wî kahin, Lêwiyî û tevahiya serekên gelê Îsraêl civandin.

³ Lêwiyiyên sî salî û mezintir hatin hejmartin, hejmara wan sî û heşt hezar kes bû.

⁴ Bîst û çar hezar ji wan serkarên Mala Xudan bûn. Şeş hezarên wan peywirdar û dadger bûn.

⁵ Çar hezarên wan dergevan bûn. Çar hezar kes jî, bi amûrên muzîkê ku Dawid ji bo pesindana Xudan digot min ew çêkirine, şikirdariya Xudan dikir.

⁶ Dawid ew li gorî kurên Lêwî; Gêrşon, Qohat û Mêrarî dabeş kirin.

⁷ Kurên Gêrşoniyan: Ladan û Şîmî.

⁸ Kurên Ladan: Yehiyêlê kurê mezin, Zêtam û Yoêl. Sê kes bûn.

⁹ Kurên Şîmî: Şelomît, Haziyêl û Heran. Sê kes bûn. Ew serekên binemalên Ladaniyan bûn.

¹⁰ Kurên Şîmî yên din: Yahat, Zîza, Yeûş û Beriya. Ev çar kes kurên Şîmî bûn.

¹¹ Yahat kurê mezin, Zîza duyemîn. Lê kurên Yeûş û Beriya kêm bûn, ew wekî binemalekê hatin hesibandin.

¹² Kurên Qohat: Emram, Yîshar, Hevron, Ûzziyêl. Çar kes.

¹³ Kurên Emram: Harûn û Mûsa. Harûn û kurên wî, ji bo ku tiştên herî pîroz veqetînin, li ber Xudan bixûr bişewitînin, xizmeta wî bikin û ji bo ku heta hetayê li ser navê wî gel pîroz bikin, hatin kifşkirin.

¹⁴ Herçî zilamê Xwedê Mûsa bû, kurên wî ji eşîra Lêwiyiyan hatin hesibandin.

¹⁵ Kurên Mûsa: Gêrşom û Êliyezer.

¹⁶ Kurê Gêrşom: Şevûêlê Serek.

¹⁷ Kurên Êliyezer: Rehavyayê Serek. Wekî din kurên Êliyezer tunebûn. Lê gelek kurên Rehavya hebûn.

¹⁸ Kurê Yîshar: Şelomîtê Serek.

¹⁹ Kurên Hevron: Yeriya kurê mezin, Amarya duyemîn, Yahaziyêl sêyemîn û Yeqamam çaremîn.

²⁰ Kurên Ûzziyêl: Kurê mezin Mîxa û yê duyemîn Yîşşiya.

²¹ Kurên Mêrarî: Mahlî û Mûşî. Kurên Mahlî: Êlezar û Qîş.

²² Êlezar mir. Kurên wî tunebûn, lê keçên wî hebûn. Mirovên wan ên ku kurên Qîş bûn ew ji xwe re anîn.

²³ Kurên Mûşî: Mahlî, Eder û Yerêmot. Sê kes bûn.

²⁴ Li gorî malbatên wan, Lêwiyî ev bûn. Her serekekî binemalê bi navê xwe hat pejirandin. Her Lêwiyiyê bîst salî û mezintir, di karê xizmeta Mala Xudan de kar dikir.

²⁵ Çimkî Dawid got: “Xwedayê Îsraêl Xudan, rihetî da gelê xwe. Wê heta hetayê li Orşelîmê bimîne.

²⁶ Ji ber vê yekê wê Lêwiyî êdî mesken û taximên xizmetê hilnegirin.”

²⁷ Li ser gotinên Dawid ên dawî, Lêwiyiyên bîst salî û mezintir hatin hejmartin.

²⁸ Peywira Lêwiyiyan ew bû ku di xizmeta Mala Xudan de alîkariya kurên Harûn bikin. Ew ji ode, hewş û ji paqijkirina her karê taximên pîroz ên Mala Xwedê berpirsiyar bûn

²⁹ û herwiha bi Nanê Xêrê, arvanê hûr ê pêşkêşiya dexlê, nanê şikeva, nanê sêlê yê din, pêşkêşiya bi zeytê hatiye hevîrkirin û bi her cure elb û pîvanî alîkarî kir.

³⁰ Herwiha divê ew ji bo ku her sibe û her êvar şikirdarî û pesindana Xudan bikin amade bibûna.

³¹ Di rojên Septê, cejnên Heyva Nû û cejnên kifşkirî yên din de, gava qurbanên şewitandinê li ber Xudan dihatin pêşkêşkirin, wê li gorî hejmarên di rê û rêbazên wan hatine diyarkirin de, herdem amade bibûna.

³² Bi vî awayî Lêwiyiyan ji bo xizmeta Mala Xudan, peywira nobedariya Konê Hevdîtinê û Cihê Herî Pîroz û alîkariya birayên xwe Harûniyan pêk anîn.