Dîrok I, 22 - Kurmanji Încîl

¹ Dawid got: “Wê Mala Xwedê Xudan û gorîgeha qurbana şewitandinê ya ji bo gelê Îsraêl li vir bin.”

Amadekariyên Perestgehê

² Dawid ferman da ku xerîbên li welatê Îsraêl bicivînin û kevirbiran peywirdar bikin ku ji bo avakirina Mala Xwedê kevirên necirandî amade bikin.

³ Dawid ji bo baskên deriyan bizmar, hesinên pevgirtinê û ji bo milên wê bi qasî ku nayê pîvandin tûnc peyda kir.

⁴ Wî bi qasî ku nayên hejmartin, darên sedrê jî peyda kirin. Çimkî Saydayî û Sûrî ji Dawid re gelek darên sedrê anîbûn.

⁵ Dawid got: “Kurê min Silêman xort û xeşîm e û Mala ku ji bo Xudan bê avakirin, divê gelek mezin û li hemû welatan navdar û birûmet be. Ji ber vê yekê ezê amadekariya wê bikim.” Dawid beriya mirina xwe, amadekariyeke mezin kir.

⁶ Dawid gazî kurê xwe Silêman kir û lê emir kir ku ji bo Xwedayê Îsraêl Xudan malekê ava bike.

⁷ Dawid ji Silêman re got: “Kurê min, di dilê min de hebû ku ji bo navê Xwedayê xwe Xudan min malekê ava bikira.

⁸ Lê gotina Xudan ji min re hat û got: ‘Te gelek xwîn rijand û şerên mezin kirin. Tê ji bo navê min Malê ava nekî, çimkî te li dinyayê li ber çavê min gelek xwîn rijand.

⁹ Va ye, wê kurek ji te re çêbe ku wê bibe mirovê aştiyê. Ezê li her derê, ji hemû dijminên wî aştiyê bidim wî. Wê navê wî, Silêman be û ezê di rojên wî de aştî û aramiyê bidim gelê Îsraêl.

¹⁰ Wê bi navê min Malê ava bike. Wê ji min re bibe kur, ezê jê re bibim bav. Ezê textê padîşahiya wî li ser gelê Îsraêl her û her bidomînim.’

¹¹ “Ya kurê min! Bila Xudan bi te re be ku tu bi avakirina Mala Xwedayê xwe Xudan bi ser bikevî, çawa ku wî li ser te got.

¹² Bila Xudan serwextî û fêmdariyê jî bide te ku gava ew te bike serwerê gelê Îsraêl, tê Şerîeta Xwedayê xwe Xudan pêk binî.

¹³ Heke tu qanûn û hikmên ku Xudan ji bo gelê Îsraêl li Mûsa emir kir, pêk bînî, wê karê te baş pêşve here. Hêzdar û wêrek be, netirse û neşikê.

¹⁴ “Min bi zehmetî ji bo Mala Xudan sed hezar telant zêr, milyonek telant zîv û tûnc û hesinê ku nayê pîvan, peyda kirin. Min dar û kevir jî peyda kirin. Tê li wan zêde jî bikî.

¹⁵ Li ba te gelek karker hene: Kevirbir, karkerên dar û keviran û her cure hosteyên jêhatî.

¹⁶ Zêr, zîv, tûnc, hesinê te yê bêhejmar heye. Rabe, destpê bike! Bila Xudan bi te re be.”

¹⁷ Dawid, li hemû serekên gelê Îsraêl emir kir ku alîkariya Silêmanê kurê wî bikin û got:

¹⁸ “Ma Xwedayê we Xudan ne bi we re ye? Ma li her derê rihetî neda we? Wî şêniyên welêt dan destê min û welat di bin destê Xudan û gelê wî de ye.

¹⁹ Niha bi dil û can biryar bidin ku hûn li Xwedayê xwe Xudan bigerin. Rabin, Pîrozgeha Xwedê Xudan ava bikin. Bila Sindoqa Peymana Xudan û taximên wî yên pîroz bînin nav maleke ku ji bo navê Xudan bê avakirin.”