Dîrok I, 18 - Kurmanji Încîl

Serketinên Dawidê Padîşah

¹ Piştî demekê Dawid Filîstî têk birin û kirin bin dest. Wî Gat û gundên wê ji destê Filîstiyan standin.

² Wî Moavî jî têk birin û ew bûn xulam û bacdarên Dawid.

³ Dawid, li nêzîkî Hamayê Hadadezerê Padîşahê Sovayê têk bir. Wî dixwest padîşahiya xwe heta Çemê Feratê xurt bike.

⁴ Dawid hezar erebeyên şer, heft hezar siwarî û bîst hezar leşkerên peya jê girtin. Ji bilî sed hespên erebeyên şer, wî hemû hesp seqet kirin.

⁵ Gava Aramiyên Şamê ji bo ku piştgiriya Hadadezerê Padîşahê Sovayê bikin hatin, Dawid ji Aramiyan bîst û du hezar kes kuştin.

⁶ Paşê li welatê Aramiyên Şamê, leşkerên xwe bi cih kirin. Ew jî bûn xulam û bacdarên wî. Dawid bi ku ve çû Xudan ew bi ser xist.

⁷ Dawid mertalên zêr ên di destên fermandarên Hadadezer de hildan û ew birin Orşelîmê.

⁸ Herwiha ji Tîvhat û Kûnê, wî gelek tûnc talan kir ku ev herdu bajar di bin destê Hadadezer de bûn. Paşê Silêman bi wan, hewza tûncîn, stûn û taximên tûncîn çêkirin.

⁹ Gava Toûyê Padîşahê Hamayê bihîst ku Dawid hemû artêşa Hadadezerê Padîşahê Sovayê têk bir,

¹⁰ wî Hadoramê kurê xwe şand ba Dawidê Padîşah ku silavê bide wî û serketina wî ya li dijî Hadadezer pîroz bike. Çimkî Toû li dijî Hadadezer şer dikir. Di destê Hadoram de diyariyên zêr, zîv û tûnc hebûn.

¹¹ Dawidê Padîşah ew diyarî, tevî zêr û zîvên ji hemû miletan –ji Edomî, Moavî, Emmonî, Filîstî û Emalêqiyan– anîn, ji Xudan re bexişandin.

¹² Avîşayê kurê Serûyayê, li Geliyê Xwê hijdeh hezar Edomî kuştin.

¹³ Wî li Edomê leşkerên xwe bi cih kirin. Edomî bûn xulamên Dawid. Xudan li her derî Dawid serfiraz kir.

Peywirdarên Dawidê Padîşah

¹⁴ Dawid li seranserê welatê Îsraêl padîşahî kir. Wî rastî û edalet da gelê xwe.

¹⁵ Yoavê kurê Serûya serleşkerê artêşê bû. Yehoşafatê kurê Ahîlûd dîroknivîsê dewletê bû.

¹⁶ Sadoqê kurê Ahîtûv û Ahîmelekê kurê Aviyatar kahin bûn. Şawşa nivîsende bû.

¹⁷ Benayayê kurê Yehoyada serekê Kerêtî û Peletiyan bû. Kurên Dawid li ser xizmetkarên padîşah bûn.