Dîrok I, 16 - Kurmanji Încîl

¹ Wan Sindoqa Xwedê anî û li nav konê ku Dawid ji bo wê çêkiriye danî. Wan qurbanên aştiyê û şewitandinê pêşkêşî Xwedê kirin.

² Piştî ku Dawid qurbanên aştiyê û şewitandinê pêşkêş kirin, wî bi navê Xudan gel pîroz kir.

³ Wî li her kesekî ji gelê Îsraêl, çi jin çi mêr, nanek, bastîqê tirî û bastîqê xurmeyan belav kirin.

⁴ Ji bo ku li ber Sindoqa Xudan xizmetê bikin, navê Xwedayê Îsraêl Xudan bilêv bikin, şikir bikin û pesindanê xwe pê bikin, wî ev Lêwiyî peywirdar kirin:

⁵ Serekê wan Asaf, kesê duyê Zekeriya, kesên din jî Yeiyêl, Şemîramot, Yehiyêl, Mattîtya, Êliyav, Benaya, Ovêd-Edom û Yeiyêl bûn. Wê ev kes li çeng û tembûran bixistana, Asaf wê li zîlên dengbilind bixista,

⁶ Benayayê Kahin û Yahaziyêlê Kahin jî wê li ber Sindoqa Peymana Xwedê herdem li boriyê bixistana.

Lavija şikirdariya Dawidê Padîşah

⁷ Wê rojê Dawid cara pêşî karê pesindana Xudan da destê Asaf û birayên wî.

⁸ Şikir ji Xudan re bikin, gazî navê wî bikin! Di nav miletan de bidin bihîstin karên wî!

⁹ Bi stran û lavijan pesnê wî bidin, Hemû kerametên wî bêjin!

¹⁰ Bi navê wî yê pîroz pesnê xwe bidin, Bila dilê kesên li Xudan digerin şa bibe!

¹¹ Li Xudan û li hêza wî bigerin, Herdem li rûyê wî bigerin.

¹² Nîşan û kerametên wî, Hikmên ku ji devê wî derketine, bi bîr bînin!

¹³ Ya ziriyeta Îsraêlê xulamê wî! Ya kurên Aqûb ên hilbijartî!

¹⁴ Xwedayê me Xudan ew e, Hikmên wî li seranserê dinyayê ne.

¹⁵ Heta hetayê peymana wî Û gotina wî ya ku ji hezar nifşî re gotiye bi bîr bînin

¹⁶ Peymana ku bi Îbrahîm re çêkir Û sonda ku ji Îshaq re xwariye.

¹⁷ Wî ev wekî qanûn bi Aqûb re, Wekî peymaneke herheyî bi Îsraêl re çêkir

¹⁸ Û got: “Wekî para we ya ji mîrasê, Ezê welatê Kenanê bidim we.”

¹⁹ Wê gavê hejmara we hindik bû, Gelek kêm bûn, li wir xerîb bûn.

²⁰ Ew milet bi milet, Ji padîşahiyekê derbasî nav miletên din dibûn.

²¹ Lê Xudan nehişt ku kes zorê li wan bike Û ji bo xatirê wan erzê padîşahan şikand.

²² Wî got: “Dest nedin kifşkiriyên min, Xerabiyê bi pêxemberên min nekin.”

²³ Ya tevahiya dinyayê, stranekê ji Xudan re bistrînin! Mizgîniya rizgariya wî roj bi roj bidin.

²⁴ Rûmeta wî li nav miletan, Karên wî yên nedîtî li nav hemû gelan belav bikin!

²⁵ Çimkî Xudan mezin e û pir hêjayî pesindanê ye, Ji nav hemû îlahan, ê herî biheybet ew e.

²⁶ Çimkî her îlahekî gelan tenê pût e, Lê Yê ku ezman afirandin Xudan e.

²⁷ Heşmet û rewnaqî li ber wî ne, Hêz û şahî li dera wî ne.

²⁸ Ya binemalên gelan, pesnê Xudan bidin! Pesnê hêz û rûmeta Xudan bidin,

²⁹ Pesnê rûmeta navê Xudan bidin. Pêşkêşiyan bînin û bikevin hizûra wî. Bi cilên pîroz li ber Xudan herin ser çokan!

³⁰ Ya tevahiya dinyayê, li ber wî bilerizin! Dinya asê hat dayîn, naleqe.

³¹ Bila ezman şa be, erd dilgeş be! Bila di nav miletan de bê gotin: “Xudan padîşah e!”

³² Bila derya bi hemû tiştên di nav de bike xuşîn! Bila zevî û hemû yên tê de dilgeş bin!

³³ Bila darên daristanê li ber Xudan bi kêfxweşî biqîrin. Çimkî ew tê ku dîwana dinyayê bike.

³⁴ Şikir bikin ji Xudan re çimkî ew qenc e. Dilovaniya wî her û her e.

³⁵ Bêjin: “Ya rizgarkarê me Xwedê, me rizgar bike! Me bicivîne, me ji nav miletan xilas bike Ku em ji navê te yê pîroz re şikir bikin, Bi rûmeta te pesnê xwe bidin.

³⁶ Bila Xwedayê Îsraêl Xudan, Ji herheyiyê heta hetayê pîroz be!” Hemû gel got: “Amîn!” û pesnê Xudan da.

Lêwiyî dibin xizmetkarên Sindoqa Peymanê

³⁷ Dawid hişt ku Asaf û birayên wî li ber Sindoqa Peymana Xudan, her roj li gorî karê rojê, xizmetê bikin.

³⁸ Ovêd-Edom û ji birayên wî şêst û heşt kes jî li wir bûn. Hosa û Ovêd-Edomê kurê Yedûtûn dergevanên wir bûn.

³⁹ Sadoqê Kahin û birayên wî yên kahin li bilindciyê perizînê yê Gîvonê, li ber Meskenê Xudan mabûn

⁴⁰ ku li gorî tevahiya nivîsandina di Şerîeta ku Xudan li gelê Îsraêl emir kir, her sibe û êvar li ser gorîgeha qurbana şewitandinê pêşkêşiyên şewitandinê pêşkêşî Xudan bikin.

⁴¹ Tevî wan jî Hêman, Yedûtûn û yên din ên hatin hilbijartin û peywirdarkirin ku şikirdariya Xudan şikir bikin. Çimkî “Dilovaniya wî her û her e.”

⁴² Hêman û Yedûtûn ji borî, zîl û amûrên muzîkê yên ku ji bo stranên pesindana Xwedê pêwist bûn, berpirsiyar bûn. Yedûtûnî jî bûn dergevan.

⁴³ Paşê tevahiya gel vegeriya mala xwe. Dawid ji bo ku mala xwe pîroz bike, vegeriya malê.