Dîrok I, 15 - Kurmanji Încîl

Sindoqa Peymanê tînin Orşelîmê

¹ Dawid ji bo xwe li Bajarê Dawid mal ava kirin. Wî ji bo Sindoqa Xwedê jî cih amade kir û ji bo wê kon veda.

² Wê gavê Dawid got: “Xudan Lêwiyî hilbijartin ku Sindoqa Xudan hilgirin û heta hetayê jê re xizmetê bikin. Loma ji bilî Lêwiyiyan, wê kesek Sindoqa Xwedê hilnegire.”

³ Dawid tevahiya gelê Îsraêl li Orşelîmê civand ku Sindoqa Xudan derxin cihê ku wî amade kiriye.

⁴ Dawid kurên Harûn û Lêwiyî civandin:

⁵ Ji Qohatiyan, Ûriyêlê Serek û sed û bîst merivên wî,

⁶ ji Mêrariyiyan, Esayayê Serek û du sed û bîst merivên wî,

⁷ ji Gêrşoniyan, Yoêlê Serek û sed û sî merivên wî,

⁸ ji Êlîsafaniyan, Şemayayê Serek û du sed merivên wî,

⁹ ji Hevroniyan, Êliyêlê Serek û heştê merivên wî

¹⁰ û ji Ûzziyêliyan, Emmînadavê Serek û sed û duwanzdeh merivên wî.

¹¹ Paşê Dawid gazî Sadoqê Kahin, Aviyatarê Kahin û Ûriyêl, Esaya, Yoêl, Şemaya, Êliyêl û Emmînadav kir ku Lêwiyî bûn.

¹² Ji wan re got: “Hûn serekên binemalên Lêwiyiyan in. Hûn û birayên xwe, xwe paqij û pîroz bikin û Sindoqa Xwedayê Îsraêl Xudan derxin cihê ku min amade kiriye.

¹³ Ji ber ku cara din we ew hilnegirt, Xwedayê me Xudan em ceza kirin. Çimkî em li gorî rêbazan tevnegeriyabûn.”

¹⁴ Kahin û Lêwiyiyan xwe paqij û pîroz kir ku Sindoqa Xwedayê Îsraêl Xudan derxin jor.

¹⁵ Li gorî gotina Xudan û emrê Mûsa, Lêwiyiyan destiyên Sindoqa Xwedê hildan ser milên xwe.

¹⁶ Dawid, ji serekên Lêwiyiyan xwest ku ew stranbêjên ku li amûrên muzîkê, li çeng, tembûr û zîlan dixin û bi şahî û dengên bilind distrên, peywirdar bikin.

¹⁷ Îcar Lêwiyiyan Hêmanê kurê Yoêl, ji mirovên wî Asafê kurê Berekya û Êtanê kurê Qûşayayê Mêrarî peywirdar kirin.

¹⁸ Ji bo alîkariya wan bikin, wan ji dergevanan Zekeriya, Yaeziyêl, Şemîramot, Yehiyêl, Ûnnî, Êliyav, Benaya, Maesêya, Mattîtya, Êlîfelêhû, Mîqnêya, Ovêd-Edom û Yeiyêl jî peywirdar kirin.

¹⁹ Ji stranbêjan, ji bo lêxistina zîlên tûncî, Hêman, Asaf û Êtan,

²⁰ ji bo lêxistina tembûran bi awayê Elamot, Zekeriya, Eziyêl, Şemîramot, Yehiyêl, Ûnnî, Êliyav, Maesêya û Benaya

²¹ û ji bo serkariya bi lêxistina sazên heşt têlî, Mattîtya, Êlîfelêhû, Mîqnêya, Ovêd-Edom, Yeiyêl û Ezazya hatin peywirdarkirin.

²² Kenanyayê serekê Lêwiyiyan, serkarê sazbendiyê bû. Çimkî ew fêmdarê van tiştan bû.

²³ Berekya û Êlqana dergevanên Sindoqa Peymanê bûn.

²⁴ Şevanya, Yoşafat, Natanêl, Emasay, Zekeriya, Benaya û Êliyezer ku kahin bûn, li ber Sindoqa Xwedê li boriyan dixistin. Ovêd-Edom û Yehiya dergevanên cihê Sindoqa Peymanê bûn.

²⁵ Dawid bi rîspiyên gelê Îsraêl û serhezaran re çû ku Sindoqa Peymana Xudan bi kêfxweşî ji mala Ovêd-Edom bîne.

²⁶ Ji ber ku Xwedê alîkariya Lêwiyiyên ku Sindoqa Peymana Xudan hildigirtin kir, wan heft conega û heft beran qurban kirin.

²⁷ Dawid, tevahiya Lêwiyiyên ku sindoq hildigirtin, stranbêj û Kenanyayê serkarê sazbendiyê, xiftanên kitan li xwe kiribûn. Dawid êfoda kitanê tenik jî li xwe kiribû.

²⁸ Bi vî awayî tevahiya gelê Îsraêl bi qîrînên şahiyê û dengê boriyê, bi zirne, bi zîl, bi çeng û bi tembûran Sindoqa Peymana Xudan dianî.

²⁹ Gava Sindoqa Peymana Xudan hat Bajarê Dawid, Mîkala keça Şawûl di pencereyê re nêrî. Dema wê dît Dawidê Padîşah direqise û şahî dike, Mîkalê di dilê xwe de ew kêm dît.