Dîrok I, 14 - Kurmanji Încîl

Malbata Dawidê Padîşah

¹ Hîramê Padîşahê Sûrê ji Dawid re qasid, darên sedrê, necar û hosteyên keviran şandin ku ji bo wî qesrekê çêkin.

² Bi vî awayî Dawid fêm kir ku Xudan ew li ser gelê Îsraêl kir padîşah û ji bo gelê wî Îsraêl padîşahiya wî gelekî mezin kir.

³ Dawid li Orşelîmê ji xwe re zêdetir jin anîn. Dawid careke din bû bavê kur û keçan.

⁴ Navê zarokên wî yên ku jê re li Orşelîmê çêbûn ev in: Şammûa, Şovav, Natan, Silêman,

⁵ Yîvhar, Êlîşûa, Êlpelet,

⁶ Nogah, Nefeg, Yafiya,

⁷ Êlîşama, Bealyada û Êlîfelet.

Filîstî têk diçin

⁸ Gava Filîstiyan bihîst ku Dawid li ser tevahiya gelê Îsraêl wekî padîşah hatiye kifşkirin, hemû Filîstî ji bo li Dawid bigerin ketin rê. Dawid bi vê yekê hesiya û çû pêşwaziya wan.

⁹ Filîstî hatibûn, êrîşî Deşta Refayîmê kiribûn.

¹⁰ Dawid ji Xwedê pirs kir û got: “Ez êrîşî Filîstiyan bikim? Tê wan bidî destê min?” Xudan jê re got: “Bike, ezê wan bidim destê te.”

¹¹ Li ser vê yekê, Dawid çû Baal-Perasîmê û li wir Filîstî têk birin. Paşê wî got: “Çawa ku lehî hildiweşîne, Xwedê jî dijminên min bi destê min hilweşandin.” Ji ber vê yekê, navê wir danîn Baal-Perasîm.

¹² Filîstiyan îlahên xwe li wir hiştin û li gorî fermana Dawid, ew hatin şewitandin.

¹³ Filîstiyan careke din êrîşî wê deştê kir.

¹⁴ Dawid dîsa ji Xwedê pirsî. Xwedê jê re got: “Ji vî alî ve êrîş neke. Wan ji paş ve dorpêç bike û li ber darên belesanê êrîşî wan bike.

¹⁵ Dema te ji jora darên belesanê dengê meşê bihîst, dest bi şer bikî. Çimkî Xwedê da pêşiya te û wê artêşa Filîstiyan têk bibe.”

¹⁶ Çawa ku Xwedê lê emir kiriye, Dawid wiha kir. Wan artêşa Filîstiyan ji Gîvonê heta Gezerê têk bir.

¹⁷ Nav û dengê Dawid li seranserê hemû welatan belav bû. Xudan tirsa Dawid xist dilê tevahiya miletan.