Dîrok I, 10 - Kurmanji Încîl

Mirina Şawûlê Padîşah û kurên wî

¹ Filîstî bi gelê Îsraêl re ketin şer. Ew ji ber Filîstiyan reviyan. Gelek kuştî li Çiyayê Gilboayê ketin.

² Filîstî ketin pey Şawûl û kurên wî. Wan Yonatan, Avînadav û Malkî-Şûayê kurên Şawûl kuştin.

³ Şer bi Şawûl re giran bû. Ew ji aliyê tîravêjên Filîstî ve hat birîndarkirin.

⁴ Şawûl ji çekdarê xwe re got: “Şûrê xwe bikişîne û li min bixe. Yan na, wê ev bêsinet bên û tinazên xwe bi min bikin.” Lê çekdarê wî gelek tirsiya û nexwest. Li ser vê yekê Şawûl rabû şûrê xwe kişand û xwe avêt ser şûr.

⁵ Gava çekdar dît Şawûl miriye, wî jî xwe avêt ser şûr û mir.

⁶ Şawûl, sê kurên wî û tevahiya mala wî bi hev re mirin.

⁷ Gava hemû gelê Îsraêl ê li deştê dît ku artêş reviyaye û Şawûl û kurên wî jî mirine, wan jî bajarên xwe berdan û reviyan. Filîstî hatin û li wan bajaran bicih bûn.

⁸ Roja din Filîstî vegeriyan ku kuştiyan bişelînin. Wan cendekê Şawûl û kurên wî jî li Çiyayê Gilboayê dîtin.

⁹ Wan Şawûl şeland. Wan ser û çekên wî rakirin. Piştre wan qasid şandin seranserê welatê xwe ku vê xebera baş di nav gel û pûtên xwe de belav bikin.

¹⁰ Çekên Şawûl xistin mala îlahên xwe û serê wî li perestgeha Dagon mîx kir.

¹¹ Lê gava Yavêş-Gîladiyan bihîst ku Filîstiyan ev tişt aniye serê Şawûl,

¹² hemû mêrxas rabûn, cendekên Şawûl û kurên wî hildan, birin Yavêşê. Piştre hestiyên wan di bin darberûya li Yavêşê de veşartin. Heft rojan rojî girtin.

¹³ Bi vî awayî Şawûl ji ber nedilsoziya xwe mir. Ew bi Xudan re nedilsoz bû û gotina Xudan pêk neanî. Bi ser de jî, ji bo riyekê nîşanî wî bide, wî şêwra xwe bi cinbazekê kir.

¹⁴ Wî ji Xudan şîretê nexwest. Xudan ew kuşt û padîşahî spart Dawidê kurê Yêşa.