Destpêk 5 - Kurmanji Încîl

Ji Ademê Pêxember heta Nûhê Pêxember

¹ Qeyda ziriyeta Adem ev e: Wê rojê gava Xwedê Adem afirand, wî kir ku ew bişibe wî.

² Wî ew nêr û mê afirandin, pîroz û bereket kirin. Roja ku wî ew afirandin, wî navê wan “Mirov” danî.

³ Gava Adem sed û sî salî bû, kurekî wî yê mîna wî û di sûretê wî de çêbû. Wî navê wî Şêt danî.

⁴ Piştî bûyîna Şêt, Adem heşt sed salên din ma û kur û keçên wî yên din çêbûn.

⁵ Adem bi tevahî neh sed û sî sal kir û mir.

⁶ Gava Şêt sed û pênc salî bû kurê wî Enoş çêbû.

⁷ Piştî ku Şêt bû bavê Enoş, ew heşt sed û heft salên din ma û kur û keçên wî yên din çêbûn.

⁸ Şêt bi tevahî neh sed û duwanzdeh sal kir û mir.

⁹ Gava Enoş nod salî bû, kurê wî Qênan çêbû.

¹⁰ Piştî ku Enoş bû bavê Qênan, ew heşt sed û panzdeh sal ma û kur û keçên wî yên din çêbûn.

¹¹ Enoş bi tevahî neh sed û pênc sal kir û mir.

¹² Gava Qênan heftê salî bû, kurê wî Mahalalêl çêbû.

¹³ Piştî ku Qênan bû bavê Mahalalêl, ew heşt sed û çil sal ma û kur û keçên wî yên din çêbûn.

¹⁴ Qênan bi tevahî neh sed û deh sal kir û mir.

¹⁵ Gava Mahalalêl şêst û pênc salî bû, kurê wî Yered çêbû.

¹⁶ Piştî ku Mahalalêl bû bavê Yered, ew heşt sed û sî sal ma û bû bavê kur û keçên din.

¹⁷ Mahalalêl bi tevahî heşt sed û nod û pênc sal kir û mir.

¹⁸ Gava Yered sed û şêst û du salî bû, kurê wî Henox çêbû.

¹⁹ Piştî ku Yered bû bavê Henox, ew heşt sed sal ma û kur û keçên wî yên din çêbûn.

²⁰ Yered bi tevahî neh sed û şêst û du sal kir û mir.

²¹ Gava Henox şêst û pênc salî bû, kurê wî Metûşelah çêbû.

²² Piştî ku Henox bû bavê Metûşelah, Henox sê sed sal bi Xwedê re meşiya, kur û keçên wî yên din çêbûn.

²³ Henox bi tevahî sê sed û şêst û pênc sal kir.

²⁴ Henox bi Xwedê re diçû û êdî nehat dîtin, çimkî Xwedê ew hilkişandibû.

²⁵ Gava Metûşelah sed û heştê û heft salî bû, kurê wî Lamex çêbû.

²⁶ Piştî ku Metûşelah bû bavê Lamex, ew heft sed û heştê û du sal ma û kur û keçên wî yên din çêbûn.

²⁷ Metûşelah bi tevahî neh sed û şêst û neh sal kir û mir.

²⁸ Gava Lamex sed û heştê û du salî bû, kurekî wî çêbû.

²⁹ Wî navê wî Nûh danî û got: “Wê me ji xebat û eziyeta êşdar û vê axa ku Xudan nalet kiriye, rihet bike.”

³⁰ Piştî ku Lamex bû bavê Nûh, ew pênc sed û nod û pênc sal ma û bû bavê kur û keçên din.

³¹ Lamex bi tevahî heft sed û heftê û heft sal kir û mir.

³² Gava Nûh pênc sed sal kir, ew bû bavê Sam, Ham û Yefet.