Destpêk 46 - Kurmanji Încîl

Aqûbê Pêxember diçe Misrê

¹ Îsraêl bi her tiştê xwe re bi rê ket. Gava gihîşt Beêr-Şevayê, wî qurban ji Xwedayê bavê xwe Îshaq re serjê kirin.

² Wê şevê Xwedê di xewnê de bi Îsraêl re peyivî û got: “Aqûb, Aqûb!” Aqûb got: “Belê ezbenî!”

³ Xwedê got: “Ez Xwedê me, Xwedayê bavê te. Ji çûna Misrê netirse, çimkî ezê li wê derê ziriyeta te bikim miletekî mezin.

⁴ Ezê bi te re werim Misrê û dîsa te vegerînim. Çaxê tu bimirî, wê Ûsiv li ber serê te be.”

⁵ Aqûb ji Beêr-Şevayê derket. Kurên Îsraêl bavê xwe Aqûb, zarokên xwe û jinên xwe hildan û li erebeyên ku Firewn ji bo wan şandibûn siwar kirin.

⁶ Aqûb hemû maliyên xwe, heywanên xwe û her tiştê ku li welatê Kenanê kar kiribû hildan û çû Misrê.

⁷ Wî bi xwe re kurên xwe, keçên xwe, neviyên xwe, hemû ziriyeta xwe, anîn Misrê.

⁸ Navê kurên Îsraêl, ango Aqûb ên ku çûn Misrê ev in: Rûbên nixuriyê Aqûb.

⁹ Kurên Rûbên: Henox, Pallû, Hesron û Karmî.

¹⁰ Kurên Şimûn: Yemûêl, Yamîn, Ohad, Yaxîn, Sohar û kurê jineke Kenanî Şawûl.

¹¹ Kurên Lêwî: Gêrşon, Qohat û Mêrarî.

¹² Kurên Cihûda: Êr, Onan, Şêla, Peres û Zerah. Lê Êr û Onan li welatê Kenanê miribûn. Kurên Peres: Hesron û Hamûl.

¹³ Kurên Îssexar: Tola, Pûwa, Yov û Şîmron.

¹⁴ Kurên Zevûlon: Serêd, Elon û Yahleyêl.

¹⁵ Lêa ev kur û keça xwe Dînayê li Paddan-Aramê ji Aqûb re anîbûn. Kur û keçên Aqûb li ser hev sî û sisê bûn.

¹⁶ Kurên Gad: Sîfyon, Haggî, Şûnî, Esbon, Êrî, Arodî û Arêlî.

¹⁷ Kurên Aşêr: Yîmna, Yîşwa, Yîşwî, Beriya û xwişka wan Serah. Kurên Beriya: Hever û Malkiyêl.

¹⁸ Ev kur, ji Zîlpayê ya ku Lavan dabû keça xwe Lêayê ji Aqûb re çêbûbûn. Ev li ser hev şanzdeh kes bûn.

¹⁹ Kurên Rahêla jina Aqûb: Ûsiv û Binyamîn.

²⁰ Herdu kurên Ûsiv, Minaşşe û Efrayîm, li welatê Misrê ji Asenata keça Potîfera yê kahinê bajarê Onê çêbûn.

²¹ Kurên Binyamîn: Bela, Bexer, Aşbêl, Gêra, Naeman, Êhî, Roş, Muppîm, Huppîm û Ard.

²² Rahêlê ev herdu ji Aqûb re anîbûn. Hemû li ser hev çardeh kes bûn.

²³ Kurê Dan: Huşîm.

²⁴ Kurên Neftelî: Yahseyêl, Gûnî, Yêser û Şîllêm.

²⁵ Ev kurên Bîlhayê bûn a ku Lavan dabû keça xwe Rahêlê. Hemû li ser hev heft kur ji Aqûb re anîbûn.

Malbata Aqûbê Pêxember li Goşenê bi cih dibe

²⁶ Kesên ku bi ziriyeta Aqûb re çûn Misrê, jinên kurên wî ne tê de, tevahiya yên ku rast jê çêbûbûn şêst û şeş kes bûn.

²⁷ Bi herdu kurên Ûsiv ên ku li Misrê çêbûbûn, hejmara Mala Aqûb a ku çûn Misrê li ser hev heftê kes bûn.

²⁸ Aqûb, Cihûda li pêşiya xwe şand ba Ûsiv ku riya Goşenê nîşan bide. Gava ew gihîştin Goşenê,

²⁹ Ûsiv erebeya xwe amade kir û çû Goşenê pêşiya bavê xwe Îsraêl. Wî çawa bavê xwe dît, xwe avêt stûyê wî û demeke dirêj giriya.

³⁰ Îsraêl ji Ûsiv re got: “Piştî ku min bi çavê xwe dît ku tu dijî, êdî ez bimirim jî ne xem e.”

³¹ Ûsiv ji birayên xwe û ji malbata bavê xwe re got: “Ezê rabim hevraz bim û ji Firewn re bêjim: ‘Birayên min û malbata bavê min ên ku li welatê Kenanê rûniştibûn, hatin ba min.

³² Ew şivan in û xweyê keriyan in. Wan pezên xwe, dewarên xwe û her tiştê xwe anîne.’

³³ Firewn wê gazî we bike û bipirse: ‘Hûn çi karî dikin?’

³⁴ Wê gavê hûnê bêjin: ‘Em xulamên te, ji zarokatiya xwe ve, wekî bav û kalan xweyî pez in.’ Wê ji we re destûr bê dayîn ku hûn li herêma Goşenê bi cih bibin. Çimkî şivantî li ba Misriyan kirêt e.”