Destpêk 41 - Kurmanji Încîl

Xewnên Firewn

¹ Piştî du salan, Firewn xewnek dît: Ew li ber keviya Nîlê sekinîbû.

² Ji çem heft çêlekên xweşik û qelew derketin û di nava qamîşan de çêriyan.

³ Piştî wan, heft çêlekên qor û bêmirêz ji Nîlê derketin, li keviya çem, li ba çêlekên din sekinîn.

⁴ Çêlekên ku qor û bêmirêz bûn, heft çêlekên xweşik û qelew xwarin. Piştre Firewn hişyar bû.

⁵ Ew dîsa di xew re çû û xewneke din dît: Di tayekî genim de heft simbilên dagirtî û baş derdiketin.

⁶ Piştî wan, heft simbilên din ên qels û ji bayê rojhilat kizirandî zîl dan.

⁷ Simbilên qels, heft simbilên dagirtî û baş daqurtandin. Piştre Firewn hişyar bû û fêm kir ku xewn e.

⁸ Serê sibê rabû dît ku aciz e. Wî şand pey hemû sêrbaz û aqilmendên Misrî. Wî ji wan re xewna xwe got, lê kesek tunebû ku xewnên wî şirove bike.

⁹ Sermeyger ji Firewn re got: “Îro sûcê min tê bîra min.

¹⁰ Carekê Firewn ji xizmetkarê xwe hêrs bû, wî ez û sernanpêj li mala fermandarê parêzvanan hepis kirin.

¹¹ Me herduyan di şevekê de xewn dît û her xewnek wateyeka wê hebû.

¹² Li wir bi me re xulamekî fermandarê parêzvanan, xortekî Îbranî hebû. Me jê re xewnên xwe gotin, wî xewnên me şirove kirin. Xewnên me ji hev cuda bûn.

¹³ Her tişt bi awayê ku wî ji me re şirove kir derket. Ez vegeriyam karê xwe lê yê din hat daleqandin.”

¹⁴ Firewn şand pey Ûsiv û wî yekser ji hebsê da berdan. Piştî ku Ûsiv rih û porê xwe kur kirin û cilên xwe guhertin, hat hizûra Firewn.

¹⁵ Firewn ji Ûsiv re got: “Min xewnek dît, lê kesek tuneye ku şirove bike. Min bihîst ku tu xewnan şirove dikî.”

¹⁶ Ûsiv lê vegerand û got: “Ez nikarim lê wê Xwedê bersiveke xêrê bide Firewn.”

¹⁷ Firewn ji Ûsiv re got: “Di xewna xwe de ez li keviya Nîlê sekinîbûm.

¹⁸ Ji çem heft çêlekên xweşik û qelew derketin û di nav qamîşan de çêriyan.

¹⁹ Piştî wan, heft çêlekên din ên qor û bêmirêz derketin. Min li seranserê welatê Misrê tu caran çêlekên bi qasî wan bêmirêz nedîtibûn.

²⁰ Çêlekên bêmirêz, heft çêlekên qelew ên ku beriya wan derketibûn xwarin.

²¹ Piştî ku wan ew xwarin, kesî nikaribû bigota ku wan ev kiriye. Çimkî wekî berê, ew bêmirêz bûn. Piştre ez hişyar bûm.

²² “Min dîsa di xewna xwe de dît ku di tayekî genim de heft simbilên dagirtî û baş derketin.

²³ Piştî wan, heft simbilên din ên çilmisî, qels û ji bayê rojhilat kizirî zîl dan.

²⁴ Simbilên qels her heft simbilên baş daqurtandin. Min ev ji sêrbazan re got, lê kesî nikaribû ji min re şirove bike.”

²⁵ Ûsiv ji Firewn re got: “Herdu xewnên Firewn yek in. Xwedê Firewn ji tiştê ku wê bike haydar kir.

²⁶ Heft çêlekên baş, heft sal in. Heft simbilên baş jî heft sal in. Xewn yek e.

²⁷ Heft çêlekên qor û bêmirêz ên ku li pey derketin û heft simbilên bêqîmet ên ku ji bayê rojhilat kizirîbûn jî heft sal in. Ev heft salên xelayê ne.

²⁸ “Çawa ku min ji te re got, Xwedê tiştê ku wê bike nîşanî Firewn daye.

²⁹ Va ye wê li seranserê welatê Misrê heft salên têr û tije bên.

³⁰ Lê wê heft salên xelayê li pey wan bên. Wê hemû têr û tijebûna welatê Misrê ji bîr bibe û wê xela welêt wêran bike.

³¹ Wê têr û tijebûna welêt neyê bîra kesî, çimkî wê xela gelek giran be.

³² Sedema ku xewn du caran ji aliyê Firewn ve hat dîtin ev e ku Xwedê biryara xwe li ser vê yekê dayê û wê di demeke nêzîk de bi cih bîne.

³³ “Bila niha Firewn mirovekî fêmdar û şehreza bibîne û wî bîne ser welatê Misrê.

³⁴ Bila karmendên xwe peywirdar bike ku di her heft salên firehiyê de, ji dexlê welatê Misrê ji pêncan yekî ber bistînin.

³⁵ Divê ew xwarina van salên baş ên ku tên bicivînin û genim di bin desthilatiya Firewn de, li bajaran bê lodkirin û parastin.

³⁶ Divê ev xwarin ji bo heft salên xelayê ji welatê Misrê re bibe qût ku welat ji ber xelayê neşikê.”

Ûsivê Pêxember dibe serwerê Misrê

³⁷ Ev pêşniyar ji aliyê Firewn û hemû karmendên wî ve baş hat dîtin.

³⁸ Firewn ji wan re got: “Ma em dikarin kesekî wekî vî mirovî bibînin ku ruhê Xwedê pê re ye?”

³⁹ Firewn ji Ûsiv re got: “Madem Xwedê kir ku tu bi van hemû tiştan bizanî, yekî ji te fêmdartir û şehrezatir tuneye.

⁴⁰ Tê li ser mala min bî û wê hemû gelê min emrên te pêk bîne. Ezê tenê bi tac û textê xwe ji te mezintir bim.”

⁴¹ Firewn ji Ûsiv re got: “Va ye ez te datînim ser seranserê welatê Misrê.”

⁴² Piştre Firewn gustîla morê ji tiliya xwe derxist û xist tiliya Ûsiv. Wî cilên kitan ên hêja lê kirin û zincîreke zêrîn xist stûyê wî.

⁴³ Wî ew kir cîgirê xwe û li erebeya cîgir siwar kir, zilam li pêş wî qîriyan û gotin: “Rê vekin!” Bi wî awayî Firewn ew anî ser seranserê welatê Misrê.

⁴⁴ Firewn ji Ûsiv re got: “Firewn ez im, lê wê li seranserê welatê Misrê bêyî peyva te tu kes destê xwe raneke û ne jî lingê xwe bileqîne.”

⁴⁵ Firewn navê Safnat-Panêah li Ûsiv danî û Asenata keça Potîferayê kahinê bajarê Onê jê re anî. Ûsiv li seranserê welatê Misrê geriya.

⁴⁶ Çaxê Ûsiv ket xizmeta Firewnê Padîşahê Misrê, sî salî bû. Ûsiv ji dîwana Firewn rabû û li seranserê welatê Misrê geriya.

⁴⁷ Di heft salên firehiyê de axê bi zêdebarî ber da.

⁴⁸ Ûsiv ji her berên ku di nav heft salan de li welatê Misrê çêbûn dan hev û di embarên bajaran de lod kirin. Wî li her bajarî, ji qûtên zeviyên ku li der û dora bajêr çêdibin lod çêkirin.

⁴⁹ Ûsiv bi qasî sêlaka deryayê genim lod kir. Ewqas pir bû ku wî dev ji hesabkirinê berda. Genimê wan nedihat hesabkirin, ewqas ku zêde bû.

⁵⁰ Beriya salên xelayê, ji Asenata keça Potîfera yê kahinê Onê du kur ji Ûsiv re çêbûn.

⁵¹ Ûsiv navê nixuriyê xwe Minaşşe danî û got: “Xwedê kir ku ez hemû derdên xwe û mala bavê xwe ji bîr bikim.”

⁵² Wî navê kurê xwe yê diduyan Efrayîm danî û got: “Xwedê ez li welatê ku min lê tengasî kişand berdar kirim.”

⁵³ Heft salên firehiyê li welatê Misrê qediyan

⁵⁴ û çawa ku Ûsiv gotibû, heft salên xelayê destpê kirin. Li hemû welatên din xela hebû, lê li seranserê welatê Misrê xwarin hebû.

⁵⁵ Çaxê ku li seranserê welatê Misrê birçîbûnê destpê kir, xelkê ji bo nan ji Firewn lava kir. Firewn ji hemû Misriyan re got: “Herin ba Ûsiv. Ew çi ji we re bibêje, bikin.”

⁵⁶ Gava xela li tevahiya welêt belav bû, Ûsiv embarên genim vekirin û genim firot Misriyan. Çimkî xelaya giran li welatê Misrê belav bûbû.

⁵⁷ Mirovên hemû welatan dihatin Misrê ku genim ji Ûsiv bikire. Çimkî li tevahiya dinyayê xelayeke giran hebû.