Destpêk 40 - Kurmanji Încîl

Xewnên sermeyger û sernanpêj

¹ Piştî demekê meyger û nanpêjê Padîşahê Misrê li dijî malxweyê xwe şaşî kir.

² Firewn li herdu peywirdarên xwe hêrs bû ku ew sermeyger û sernanpêjê wî bûn.

³ Wî ew li mala fermandarê parêzvanan, zîndana ku Ûsiv tê de bû, hepis kir.

⁴ Fermandarê parêzvanan, Ûsiv da ber destê wan. Ew demekê di girtîgehê de man.

⁵ Sermeyger û sernanpêjê Padîşahê Misrê ku di zîndanê de bûn, di şevekê de xewn dîtin. Xewnên wan ji hev cuda bûn.

⁶ Serê sibê Ûsiv hat ba wan û dît ku ew bikeder bûn.

⁷ Wî ji karmendên Firewn ên ku li mala malxweyê wî, pê re di girtîgehê de bûn pirsî û got: “Çima îro mirûzê we tirş e?”

⁸ Wan got: “Me herduyan xewn dît, lê kesê ku şirove bike tuneye.” Ûsiv ji wan re got: “Ma şirovekirin ne karê Xwedê ye? Kerem bikin, xewnên xwe ji min re bêjin.”

⁹ Sermeyger xewna xwe ji Ûsiv re got: “Di xewna xwe de, min li pêş xwe mêwek dît.

¹⁰ Sê guliyên mêwê hebûn. Bi bişkivînê re kulîlk dan û gûşiyên tirî gihîştin.

¹¹ Tasa Firewn di destê min de bû, min bi tirî girt, guvaşt hundirê tasa Firewn û tas da destê wî.”

¹² Ûsiv got: “Ev tê vê wateyê: Sê gulî sê roj in.

¹³ Wê di nav sê rojan de Firewn serê te bilind bike û te bîne ser karê te yê berê. Wekî ku berê tu sermeygerê wî bûyî û te wisa dikir, tê dîsa kasa Firewn bidî destê wî.

¹⁴ Lê çaxê ku qencî bi te re hat kirin, ji kerema xwe tu min bîne bîra xwe. Qenciyê bi min bike û giliyê min ji Firewn re bike ku ez ji vê zîndanê derkevim.

¹⁵ Çimkî ez bi zorê ji welatê Îbraniyan hatim revandin. Li vir jî, min tiştekî ku ezê pê bikevim zîndanê nekir.”

¹⁶ Çaxê sernanpêj dît ku Ûsiv şiroveyeke baş kir, wî jê re got: “Min jî xewnek dît. Li ser serê min sê selik nanê spî hebû.

¹⁷ Di selika herî jorîn de, her cureyê pasteyên pehtî yên ji bo Firewn hebûn, lê teyran ji selikên li ser serê min dixwarin.”

¹⁸ Ûsiv got: “Ev tê vê wateyê: Sê selik sê roj in.

¹⁹ Wê di nav sê rojan de Firewn serê te rake û te bi darê ve daleqîne. Wê teyr goştê te bixwin.”

²⁰ Roja sisêyan rojbûyîna Firewn bû û wî ziyafetek da hemû karmendên xwe. Wî li pêş karmendên xwe serê sermeyger û sernanpêj bilind kirin.

²¹ Sermeyger vegeriya ser karê xwe. Careke din wî tas da destê Firewn.

²² Lê çawa ku Ûsiv şirove kiribû, wî sernanpêj daleqand.

²³ Lê sermeyger Ûsiv neanî bîra xwe û ew ji bîr kir.